Matokia An’i Jehovah, Ilay Andriamanitra Tena Misy
Efa mba nijery kintana tsy tambo isaina tamin’ny alina tsy semban-drahona ve ianao? Ahoana no anazavanao ny nampisy azy ireny?
TOY ny hoe niresaka tamin’i Davida mpanjakan’ny Isiraely fahiny ny kintana tamin’ny alina mangina, ka voatosika izy hanoratra hoe: “Ny lanitra mitory ny voninahitr’Andriamanitra; ary ny habakabaka manambara ny asan’ny tànany.” (Salamo 19:1) Eny, ny Mpamorona fa tsy ny zavaboary no mendrika “handray ny voninahitra sy ny haja ary ny hery.”—Apokalypsy 4:11; Romana 1:25.
‘Izay nanao ny zavatra rehetra dia Andriamanitra’, hoy ny Baiboly. (Hebreo 3:4) Ilay Andriamanitra marina, “Izay atao hoe Jehovah, no Ilay Avo Indrindra ambonin’ny tany rehetra.” (Salamo 83:18) Tena misy izy. Hoy i Jesosy Kristy momba an’i Jehovah Rainy any an-danitra: “Marina ny naniraka Ahy.”—Jaona 7:28.
Mpanatanteraka ny fikasany i Jehovah
Ao amin’ny Soratra Hebreo fotsiny, dia efa ho im-7 000 no miseho ny anaran’Andriamanitra tsy manan-tsahala hoe Jehovah. Porofo io anarana io fa tena misy izy. Midika ara-bakiteny hoe “Mahatonga Izy” ilay anarany. Koa mampahafantatra ny tenany ho ilay Mpanatanteraka ny fikasany àry i Jehovah Andriamanitra. Rehefa nanontanian’i Mosesy ny anarany, dia nohazavain’i Jehovah toy izao ny hevitr’ilay anarany: “Izaho, Izay Izy Hatrizay Hatrizay ka ho Mandrakizay.” (Eksodosy 3:14) Milaza mivantana toy izao ny dika tenin’i Rotherham: “Ho Tonga izay rehetra tiako Aho.” Mifidy ny hanao izay rehetra tokony hatao i Jehovah mba hanatanterahana ny fikasany sy ny fampanantenany ara-drariny. Noho izany, dia maro be ny anaram-boninahitra entiny, toy ny hoe Mpamorona, Ray, Tompo, Mpiandry, Jehovah Tompon’ny Maro, Mpihaino vavaka, Mpitsara, sy Mpampianatra ary Mpanavotra.—Mpitsara 11:27; Salamo 23:1; 65:2; 73:28; 89:26; Isaia 8:13; 30:20; 40:28; 41:14.
Tsy azo antoka mihitsy raha ho tanteraka foana ny fikasan’olombelona. Koa ilay Andriamanitra marina ihany no afaka mitondra ny anarana hoe Jehovah. (Jakoba 4:13, 14) I Jehovah irery no afaka milaza hoe: “Toy ny ranonorana sy ny orampanala milatsaka avy any an-danitra ka tsy miverina any, raha tsy efa nahavonto ny tany ka nampaniry sy nampahavokatra azy, mba hahatonga voa ho an’ny mpamafy sy hanina ho an’ny mpihinana,—dia ho tahaka izany ny teniko izay aloaky ny vavako: Tsy hiverina amiko foana izy, raha tsy efa mahatanteraka izay sitrako ary ambinina amin’izay ampandehanako azy.”—Isaia 55:10, 11.
Azo antoka aoka izany ny hanatanterahan’i Jehovah ny fikasany, hany ka tena misy aminy na dia ny zavatra toa sarotra inoana amin’ny olombelona aza. Niresaka toy izao momba an’i Abrahama sy Isaka ary Jakoba, izay maty efa ela, i Jesosy: “Fa Izy [Jehovah] tsy mba Andriamanitry ny maty, fa an’ny velona; fa velona ho an’Andriamanitra avokoa izy rehetra.” (Lioka 20:37, 38) Efa maty ireo loham-pianakaviana telo nahatoky ireo, kanefa toy ny hoe velona izy ireo tamin’Andriamanitra, satria azo antoka tokoa fa ho tanteraka ny fikasany hanangana azy ireo. Tsy ho sarotra amin’i Jehovah ny hamelona indray an’ireo mpanompony nahatoky fahiny ireo, satria vitany aza ny namorona ny olombelona voalohany avy tamin’ny vovo-tany.—Genesisy 2:7.
Misy ohatra hafa nomen’ny apostoly Paoly mampiseho fa manao izay hahatanteraka ny fikasany Andriamanitra. Antsoin’ny Soratra Masina hoe “rain’ny firenena maro” i Abrahama. (Romana 4:16, 17) Na dia mbola tsy niteraka aza i Abrama, dia novan’i Jehovah hoe Abrahama, izay midika hoe “Rain’ny Vahoaka Be”, ny anarany. Nataon’i Jehovah izay hanatanterahana ny hevitr’io anarana io. Tamin’ny fomba mahagaga, dia nataony ho afaka hiteraka indray i Abrahama sy Saraha vadiny, izay samy efa be taona.—Hebreo 11:11, 12.
Zavatra heverin’ny olombelona fa tsy ho tanteraka dia fantatr’i Jesosy Kristy tsara fa ho tanteraka, noho izy nomena hery sy fahefana lehibe. Na dia maty aza i Lazarosy, namany akaiky, dia hoy i Jesosy tamin’ny mpianany: “Matory Lazarosy sakaizantsika; fa handeha hamoha azy Aho.” (Jaona 11:11) Nahoana no nolazain’i Jesosy fa matory fotsiny ny olona maty?
Rehefa tonga tany Betania, tanànan’i Lazarosy, i Jesosy, dia nankany am-pasana ary nanome baiko ny hanesorana ny vato nanampina ny fidirana tao. Nivavaka tamin’ny feo avo izy, ary nandidy hoe: “Ry Lazarosy, mivoaha!” Raha mbola nibanjina ilay fasana ireo nanatrika teo, “dia nivoaka ny maty nisy fehim-paty ny tànany sy ny tongony, sady voafehy mosara koa ny tavany.” Hoy i Jesosy avy eo: “Vahao izy, ka avelao handeha.” (Jaona 11:43, 44) Natsangan’i Jesosy tamin’ny maty i Lazarosy. Novelominy indray ny lehilahy efa maty efatra andro! Tsy nandainga akory i Kristy rehefa nilaza fa natory ilay namany. Toy ny hoe natory fotsiny i Lazarosy, tamin’i Jehovah sy Jesosy. Eny, miorina amin’ny zavatra tena misy izay rehetra ataon’i Jesosy sy ny Rainy any an-danitra.
Afaka manatanteraka ny fanantenantsika i Jehovah
Samy hafa tokoa ny sampy mamitaka sy ilay Andriamanitra tena misy! Diso hevitra ny mpanompo sampy milaza fa mahery noho ny olombelona ny zavatra ankamasininy. Tsy hahavita fahagagana mihitsy ireny sampy ireny, na ivavahana toy inona aza. Mety kosa anefa ny iresahan’i Jehovah Andriamanitra an’ireo mpanompony maty efa ela toy ny hoe mbola velona, satria afaka mamelona azy ireny indray izy. ‘Andriamanitra tokoa i Jehovah’, ary tsy mamitaka ny olony mihitsy izy.—Jeremia 10:10.
Mampahery erỳ ny mahalala fa amin’ny fotoana voatondron’i Jehovah, dia hatsangany amin’ny maty na hovelominy indray ireo maty ao amin’ny fitadidiany! (Asan’ny Apostoly 24:15) Eny, ireo toetra maha izy ny olona iray no haverina aminy indray, rehefa hatsangana izy. Tsy sarotra amin’ilay Mpamorona ny mitadidy ny toetra maha izy an’ireo olona maty sy ny manangana azy, satria tsy hita fetra ny fahendreny sy ny heriny. (Joba 12:13; Isaia 40:26) Koa satria be fitiavana i Jehovah, dia hampiasa ny fitadidiany tonga lafatra izy mba hamerenana amin’ireo maty ny toetrany talohan’ny nahafatesany, rehefa hovelominy indray izy ireo mba hiaina ao amin’ny paradisa eto an-tany.—1 Jaona 4:8.
Koa satria efa hifarana ny tontolon’i Satana, dia azo antoka fa mahavelom-bolo ny hoavin’ireo matoky an’ilay Andriamanitra marina. (Ohabolana 2:21, 22; Daniela 2:44; 1 Jaona 5:19) Manome toky antsika toy izao ny mpanao salamo: “Rehefa afaka kelikely, dia tsy hisy ny ratsy fanahy; ... Fa ny mpandefitra kosa no handova ny tany ka hiravoravo amin’ny haben’ny fiadanana.” (Salamo 37:10, 11) Ho efa lasa ny heloka bevava sy ny herisetra. Hanjaka ny rariny ary tsy hisy intsony ny fahasahiranana ara-bola. (Salamo 37:6; 72:12, 13; Isaia 65:21-23) Ho voafafa izay mety ho soritry ny fanavakavahana ara-tsosialy sy ara-pirazanana ary ara-poko. (Asan’ny Apostoly 10:34, 35) Tsy hisy ady sy fitaovam-piadiana intsony. (Salamo 46:9) “Tsy hisy amin’ny mponina ao hilaza hoe: Marary aho”, amin’izany fotoana izany. (Isaia 33:24) Ho salama tanteraka ny rehetra. (Apokalypsy 21:3, 4) Tena hisy tsy ho ela ny paradisa an-tany. Izany no fikasan’i Jehovah!
Eny, ho tanteraka tsy ho ela ny fampanantenana rehetra ao amin’ny Baiboly. Nahoana isika no hanaiky ho voafitak’izay ivavahana eto amin’ity tontolo ity, nefa azontsika atao ny mitoky tanteraka amin’i Jehovah? Ny sitrapony dia ny ‘hahavoavonjy ny olona rehetra ka ho tonga amin’ny fahalalana ny marina.’ (1 Timoty 2:3, 4) Aoka isika tsy handany fotoana sy vola amin’ireo zavatra mamitak’ity tontolo ity sy ireo andriamaniny, fa aoka kosa isika hianatra bebe kokoa momba an’ilay Andriamanitra tena misy, sy hatoky azy amin’ny fontsika rehetra.—Ohabolana 3:1-6; Jaona 17:3.
[Sary, pejy 6]
Natory fotsiny i Lazarosy, tamin’i Jehovah sy Jesosy
[Sary, pejy 7]
Hisy tsy ho ela ny paradisa an-tany