Fanontanian’ny Mpamaky

Misy fandaharana azo atao ve, raha misy Kristianina voahosotra efa osa, ka tsy afaka manatrika ny fankalazana ny Sakafo Harivan’ny Tompo miaraka amin’ny fiangonana?

Eny. Azo atao ny manao fandaharana ho an’ny Kristianina voahosotra iray efa osa, izay angamba tsy afa-mitsangana eo am-pandriana. Zava-dehibe ny fanaovana izany, satria tsy afaka manatrika ny Fahatsiarovana ny nahafatesan’i Kristy miaraka amin’ny fiangonana izy. Amin’ny toe-javatra toy izany, dia afaka manendry anti-panahy na rahalahy kristianina matotra ireo anti-panahy, mba hitondra mofo sy divay kely ho azy, ny alin’ny Fahatsiarovana, alohan’ny hiposahan’ny masoandro.

Arakaraka ny toe-javatra, dia afaka manome fanazavana fohy sy mamaky andinin-teny nofidina mialoha ilay anti-panahy na ilay rahalahy hafa. Azony arahina ny ohatra navelan’i Jesosy, tamin’izy nanorina ny Sakafo Harivan’ny Tompo. Mety ho azo vakina, ohatra, ny Matio 26:26, ary atolotra ny mofo tsy nasiana leviora, aorian’ny vavaka iray. Azon’ilay rahalahy vakina avy eo, ny Matio toko faha-26, andininy faha-27 sy 28, ary atolony ny divay, aorian’ny vavaka hafa iray. Azo hazavaina fohy hoe inona no mifanitsy amin’ny mofo sy divay, ary tokony hasiana vavaka famaranana avy eo.

Mazava ho azy fa tokony hiezaka hanatrika ny fankalazana ny Sakafo Harivan’ny Tompo miaraka amin’ny fiangonana ny olona iray, raha mbola azony atao. Inona anefa no azo atao, raha tsy afaka mankalaza ny Fahatsiarovana amin’ny 14 Nisana aorian’ny filentehan’ny masoandro ny Kristianina voahosotra iray, noho ny toe-javatra tsy azony anoharana? Angamba marary mafy izy, na nampidirina hopitaly, na manana olana hafa. Afaka manaraka izay voalazan’ny Lalàn’i Mosesy momba ny toe-javatra toy izany izy, ka hankalaza samirery ny Fahatsiarovana, 30 andro atỳ aoriana.​—Nomery 9:9-14.