Fanontanian’ny mpamaky
◼ Rehefa tsy afaka manatrika ny Sakafon’ny Tompo ny kristiana iray, inona no tokony hataony?
Zava-dehibe ny hanatrehan’ny kristiana rehetra ny fankalazana isan-taona ny Sakafon’ny Tompo, satria rehefa nanorina izany fitandremana izany i Jesosy dia nanambara toy izao: “Ataovy hatrany izao ho fahatsiarovana ahy.” (Lioka 22:19, MN ). Nanaja io didy io ireo kristiana voalohany. Araka izany, dia afaka nilaza ny apostoly Paoly fa ireo rahalahiny tany Korinto dia ‘niangona’ na ‘nivory niangona’ indray mandeha isan-taona mba hanao ny fahatsiarovana ny nahafatesan’i Jesosy ho sorona (I Korintiana 11:20, MN; Pierre Beaumont). Inona anefa no ho fandaharana nataony tao anatin’ny toe-javatra sarotra kokoa? Ohatra, inona no nataon’i Paoly tao anatin’ireo taona laniny tany an-tranomaizina (teo ambany fanaraha-maso, na nigadra mihitsy aza) tany Kaisaria? — Asan’ny apostoly 23:35; 24:26, 27.
Rehefa heverina amin’ny baiko hentitra nomen’i Jesosy, na dia nitokana aza i Paoly tamin’ny andron’ny Sakafon’ny Tompo, dia azo antoka fa tsaroany ireo andinin-teny tao amin’ny Soratra masina izay nifandray tamin’io fisehoan-javatra io. Noho izy voahosotry ny fanahy masina, dia tsy maintsy ho nanao izay farany azony natao izy mba hahazoana ireo marika nety indrindra. Koa satria fampiasa ny divay tamin’izany fotoana izany, dia angamba nanana tamin’izany i Paoly na dia tao aza ny toerany. Ambonin’izany, dia azo inoana fa nomena karaza-mofo hohanina izy. Mbola azo inoana kokoa ihany fa toy izany no izy taorian’ny namindrana azy tany Roma, izay nanomezan-dalana ilay apostoly hotsidihina. Tsy isalasalana fa ny antokon’olom-bitsy tany Roma dia nanandrana ‘nivory’ niaraka taminy mba hankalaza ny Sakafon’ny Tompo. — Asan’ny apostoly 28:30.
Ankehitriny, ireo kongregasionan’ny Vavolombelon’i Jehovah dia mivory amin’ny tany manontolo mba hankalazana ny Fahatsiarovana ny nahafatesan’i Kristy amin’ny daty mifanitsy amin’ny 14 Nisana. Mety hisy zava-misakana lehibe hitranga anefa. Efa nisy tafiodrivotra na tondra-drano nisakana kongregasiona na ny sasany tamin’ny mpikambana tao aminy tsy hivory araka ny nikasana izany. Mahalana kokoa, teo ambanin’ny lalàna fampihatra amin’ny tany miady, dia nisy olom-pirenena noterena tamin’ny herin’ny fiadiana hijanona tany an-tranony taorian’ny filentehan’ny masoandro. Tany amin’ny toeran-kafa, ny kristiana sasany dia tsy afaka nankany amin’ny toerana nivorian’ny kongregasiona noho ny fidirana tany amin’ny hopitaly na ny aretina mafy. Inona no hatao amin’ny toe-javatra toy izany?
Mazava ho azy fa tsara ny hivorian’ny kongregasiona manontolo ho amin’io fisehoan-javatra lehibe io. Kanefa, ny toe-javatra sahala amin’izay vao avy nolazalazaintsika teo dia mety hahatonga izany tsy ho azo atao tanteraka. Rehefa misy fivadihan’ny andro, loza aman’antambo araka ny natiora na zava-misakana hafa tsy azo lanjaina tena misakana tokoa fianakaviana iray na maromaro tsy hiaraka amin’ny sisa amin’ny kongregasiona, dia afaka miara-mivory ireo kristiana voakasika amin’izany, mijery fitantarana araka ny Baiboly sahala amin’ireo hita ao amin’ny Lioka 22:7-23, 28-30 sy ao amin’ny I Korintiana 11:20-31, ka miara-mieritreritra ny hevitr’ilay fisehoan-javatra. Toy izany koa, noho ny fepetra arahina amin’ny tany miady, rehefa tsy afaka mivory ny harivan’ny Fahatsiarovana ny kongregasiona iray, dia mety ho hita fa fahendrena ny hiaraha-mivory isam-pihaonana fianarana ny boky na isam-paritany. Amin’ny toe-javatra toy izany, dia holazaina ny fitambaran’ny isan’ny olona tonga ao amin’ireo fivoriana isan-karazany eo amin’ny rapaoron’ny kongregasiona. Raha misy rahalahy mahay ao amin’ilay antokon’olona, dia ho afaka hanonona lahateny fohy izy. Ao anatin’izany tarehin-javatra maningana izany, dia tsy hisy hampanahy ny amin’ny tsy fisian’ny marika mety raha toa hatreo ka tsy nisy mihitsy kristiana voakasika nandray ny mofo sy ny divay fanao marika ho porofo fa voahosotra izy.
Teo ambanin’ny Lalàna nomen’Andriamanitra ny Isiraely, ireo izay tsy afaka nandray anjara tamin’ny Paska dia afaka nankalaza an’io andro firavoravoana io iray volana (30 andro) taty aoriana (Nomery 9:10, 11; II Tantara 30:1-3, 15). Toy izany koa, amin’ny toe-javatra manokana tena tsy hahafahan’ny anankiray anisan’ny Isiraely ara-panahy hanatrika ny Fahatsiarovana na handray ny marika ny 14 Nisana, dia ho afaka hankalaza ny Sakafon’ny Tompo 30 andro atỳ aoriana izy. Izany fandaharana izany dia tsy mihatra afa-tsy amin’ireo kristiana voahosotra izay manana adidy handray ny mofo sy divay. — Galatiana 6:16.
Ny 4 april 1985, taorian’ny filentehan’ny masoandro, ireo kongregasionan’ny kristiana marina dia nivory naneran-tany araka izao baikon’i Jesosy izao: “Ataovy ho fahatsiarovana ahy izany.” — I Korintiana 11:25, Votre Bible.