Aza Matahotra​—Momba Anao i Jehovah!

TAORIANA kelin’ny nipoahan’ny baomba ataomika voalohany, 50 taona mahery lasa izay, dia nilaza toy izao momba ny hoavy i Harold Urey, manam-pahaizana momba ny siansa ataomika: “Hihinana ao anatin’ny tahotra isika, hatory ao anatin’ny tahotra, hiaina ao anatin’ny tahotra, ary ho faty ao anatin’ny tahotra.” Tsy mahagaga raha tena feno tahotra ny tontolo misy antsika ankehitriny! Fampihorohoroana mahatsiravina, heloka bevava sy herisetra, ary aretina tsy fanta-piaviana mantsy no resahin’ny gazety isan’andro.

Kristianina isika ka mahafantatra ny anton’ireny. Asehon’izy ireny fa miaina amin’ny “andro farany” amin’ity tontolo ratsy ity isika, ary efa voalazan’ny Baiboly fa “fotoan-tsarotra tsy mora setraina” no hamantarana izany. (2 Timoty 3:1) Lasa matoky kokoa àry isika fa akaiky ilay tontolo vaovao hitoeran’ny fahamarinana, hataon’i Jehovah Andriamanitra. (2 Petera 3:13) Mbola mety hatahotra ihany ve anefa isika Kristianina?

Natahotra ny mpanompon’Andriamanitra sasany

Samy mpanompon’Andriamanitra i Jakoba sy Davida ary Elia, nefa natahotra rehefa tojo toe-javatra nampidi-doza. (Genesisy 32:7, 8; 1 Samoela 21:12, 13; 1 Mpanjaka 19:2, 3) Tsy hoe tsy nanam-pinoana izy ireo, fa natoky tanteraka an’i Jehovah kosa. Olombelona anefa izy ireo ka nety natahotra. “Olona nanana fihetseham-po toa antsika ihany i Elia”, hoy i Jakoba mpianatra.—Jakoba 5:17.

Mety hatahotra koa isika, rehefa mieritreritra ny olana manjo antsika ankehitriny, na ny olana mety hitranga amin’ny hoavy, ary ara-dalàna izany. Milaza mantsy ny Baiboly, fa tapa-kevitra i Satana Devoly ‘hiady’ amin’ireo ‘mitandrina ny didin’Andriamanitra sy manao ny asa fitoriana momba an’i Jesosy.’ (Apokalypsy 12:17) Marina fa ny Kristianina voahosotra no tena resahina eo. Hoy anefa i Paoly: “Henjehina koa izay rehetra te hiaina ao anatin’ny fahafoizan-tena ho an’Andriamanitra sady tafaray amin’i Kristy Jesosy.” (2 Timoty 3:12) Tsy tokony ho resin-tahotra anefa isika, rehefa tojo olana. Nahoana?

“Andriamanitry ny famonjena”

Hoy i Davida mpanao salamo: “Andriamanitra no Andriamanitry ny famonjena ho antsika.” (Salamo 68:20) Nasehon’i Jehovah foana fa nahay namonjy ny vahoakany izy. Nanafaka azy ireo tamin’ny toe-javatra sarotra izy, na nanome azy ireo hery hiaretana. (Salamo 34:17; Daniela 6:23; 1 Korintianina 10:13) Firy tamin’ireny ‘asam-pamonjena’ nataon’i Jehovah ireny no tadidinao avy tamin’ny fianaranao Baiboly?

Nahoana raha mikaroka ao amin’ny Fanondroana Bokin’ny Vavolombelon’i Jehovah?a Ho hitanao ao, ohatra, ny momba ilay Safodrano naneran-tany tamin’ny andron’i Noa, ny fanafahana an’i Lota sy ny zanany vavy tao Sodoma sy Gomora, ny fifindran’ny Israelita avy tany Ejipta sy ny fiampitany ny Ranomasina Mena, na ilay tetika tsy nahomby nataon’i Hamana hamongorana ny Jiosy. Vao mainka ianao hino fa Andriamanitry ny famonjena i Jehovah, rehefa mamaky sy misaintsaina ireny tantara mampientam-po ireny. Ho afaka hiatrika tsy amin-tahotra ny fitsapana ny finoanao ianao amin’izay.

Ohatra ankehitriny

Mahafantatra Kristianina fakan-tahaka noho ny fiaretany ve ianao? Angamba migadra noho ny tsy fivadihany izy ireny. Eo koa ireo zokiolona manompo an’i Jehovah hatrany na dia marary aza. Azonao eritreretina ireo tanora mitoetra tsy ho anisan’izao tontolo izao, na eo aza ny fanerena mafy ataon’ny mpiara-mianatra. Misy koa ray aman-dreny mitaiza irery ny zanany, na olona tsy manambady mahatsiaro ho manirery, nefa tsy mitsahatra manompo an’i Jehovah. Inona no ianaranao avy amin’izy ireny? Afaka manampy anao hiaritra tsy amin-tahotra ny fisaintsainana ny tsy fivadihan’izy ireny, na inona na inona fitsapana mihatra aminao.

Tsy rehefa tojo fanoherana na fanenjehana ihany isika no tsy tokony hatahotra, fa rehefa manomboka misalasala ny amin’ny fitiavan’i Jehovah antsika koa. Mila matoky isika fa natao ho antsika isam-batan’olona ny vidim-panavotan’i Kristy. (Galatianina 2:20) Tsy tokony hatahotra hanatona an’i Jehovah àry isika. Afaka misaintsaina ny tenin’i Jesosy tamin’ny mpianany isika, raha mihevitra fa tsy mendrika antsika ny fitiavan’i Jehovah. Hoy izy: “Tsy vola madinika kely vidy ve no ivarotana fody roa? Fa tsy hisy ho latsaka amin’ny tany ireny na iray aza, ka tsy fantatry ny Rainareo. Ary na ny volon-dohanareo aza dia voaisa avokoa. Koa aza matahotra, fa sarobidy noho ny fody maro ianareo.”—Matio 10:29-31.

Matetika Ny Tilikambo Fiambenana sy Mifohaza! no mitantara momba ny Vavolombelon’i Jehovah tsy natahotra niatrika zava-tsarotra. Nampanahy azy ireny ny toe-javatra sarotra nahazo azy, nefa tsy navelany hampijanona ny fanompoany an’i Jehovah. Hanampy anao hiaritra tsy amin-tahotra koa ny tantaram-piainany. Ireto misy ohatra roa:

Nanova ny fiainany ny takaitra nahazo azy

Eo, ohatra, ilay lahatsoratra hoe “Nanova ny Fiainako ny Takaitra Nahazo ahy”, ao amin’ny Mifohaza! 8 Mey 2003. Tantaran’i Stanley Ombeva, Vavolombelon’i Jehovah any Kenya izy io. Resahiny ao ny zava-tsarotra niainany rehefa avy nodonin’ny fiara nirimorimo izy. Namoy ny asany sy ny tombontsoa rehetra azony avy amin’izany izy, rehefa nihanarary. Hoy izy: “Nanjary nifantoka tamin’ny lafy ratsin-javatra sy tsy nahalala afa-tsy ny tenako ary mora sosotra aho, rehefa nanomboka fantatro fa tena mafy ny nanjo ahy. Indraindray aho tezitra sy kizitina.” Tsy natahotra mihitsy anefa izy, na dia tao anatin’ny fahoriana mafy aza. Tsy nanaiky ho kivy tanteraka noho ny fahadisoam-panantenana izy, fa niantehitra tamin’i Jehovah. Hoy ihany izy: “Nanampy ahy be dia be foana izy tamin’ny zava-tsarotra rehetra nandalovako, hany ka menatra ny tenako aho indraindray. Niezahako novakina sy nosaintsainina izay andinin-teny fantatro fa hampionona ahy.”

Nanampy olon-kafa maro hiatrika fitsapana tsy amin-tahotra ny teny feno fahatsorana nolazain’ny Rahalahy Ombeva. Hoy ny anabavy iray: “Nitomany aho rehefa namaky ilay lahatsoratra. Tsapako fa porofon’ny hatsaram-panahin’i Jehovah sy ny fiahiany ary ny fitiavany ahy ilay izy, ary nentiny hampiononana ahy.” Hoy koa ny Vavolombelona iray: “Miaritra toe-javatra toy ilay voatantara ao amin’ilay lahatsoratra ny sasany amintsika nefa tsy mitaraina. Tena mampahery azy ireo ny lahatsoratra toy ireny.”

Niaritra fahakiviana

Manohina ny fo koa ilay tantaram-piainan’i Herbert Jennings hoe “Tsy Mahalala ny ho Ampitso Ianareo.”b Voan’ny karazana aretin-tsaina iray izy. Hoy izy nitantara ny fotoana voalohandohany naharariany: “Tena ady mafy na dia ny fanatrehana ireo fivoriana kristianina fotsiny aza. Na izany aza, dia niaiky tanteraka aho fa sarobidy ny miara-mivory amin’ny mpiray finoana. Mba hiatrehako izany, dia mazàna aho no niditra tao amin’ny Efitrano Fanjakana, rehefa nipetraka daholo ny olona; ary niala aho, talohan’ny tabataba amin’ny faran’ny fandaharana.”

Sarotra taminy koa ny nitory. ‘Tsy nanana herim-po handondonana varavarana akory aho indraindray, rehefa tonga teo amin’ny trano iray. Takatro anefa fa mamonjy ahy sy izay mihaino ahy ny fanompoana, ka tsy nilavo lefona aho. (1 Timoty 4:16) Voafehiko ny fihetseham-poko rehefa afaka kelikely, ka nankeo amin’ny varavarana manaraka aho ary nanandrana indray. Nitory hatrany aho, ka afaka nifandray tsara foana tamin’Andriamanitra. Nanampy ahy bebe kokoa mba hiaritra izany.’

Nanampy mpamaky maro hiatrika fahakiviana tsy amin-tahotra ilay tantara feno fahatsoran’ny Rahalahy Jennings. Izao, ohatra, no nosoratan’ny anabavy iray: “Efa 28 taona no namakiako Ny Tilikambo Fiambenana sy ny Mifohaza!, nefa io no lahatsoratra nanohina ny foko indrindra. Tsy maintsy nijanona tamin’ny fanompoana manontolo andro aho, ka nahatsiaro ho tena meloka. Nihevitra aho fa mbola ho nanohy raha natanjaka kokoa ny finoako. Lasa nijery ny fiainako araka ny tokony ho izy anefa aho, rehefa namaky fa tsy maintsy niala tamin’ny fanendrena azony ny Anadahy Jennings mba hikarakarana ny fahasalamany. Tena valin’ny vavaka nataoko ilay lahatsoratra!”

Nanoratra koa ny rahalahy iray hoe: “Anti-panahy nandritra ny folo taona aho. Tsy maintsy nitsahatra anefa aho noho ny aretin-tsaina. Nahatsapa ho tsy nisy vidiny aho, ka matetika no nalahelo be rehefa namaky tantaram-piainana momba ny zavatra miavaka vitan’ny mpanompon’i Jehovah. Nampahery ahy anefa ny faharetan’ny Rahalahy Jennings. Novakiko imbetsaka ilay lahatsoratra.”

Mandroso amin-toky

Maro ny Vavolombelona mbola manompo an’i Jehovah tsy amin-tahotra, toy ny Rahalahy Ombeva sy Jennings, na eo aza ny toe-javatra tena sarotra. Mendri-piderana ianao raha anisan’izy ireo. Matokia fa: ‘Andriamanitra tsy mba tsy marina ka hanadino izay nataonao, sy ny fitiavana nasehonao ho an’ny anarany, tamin’ny nikarakaranao sady mbola ikarakaranao ny olona masina.’—Hebreo 6:10.

Nampian’i Jehovah handresy ny fahavalony ny vahoakany fahiny. Afaka manampy anao handresy izay olana mety ho tojo anao koa izy. Raiso am-po àry ilay tenin’i Jehovah tamin’ny alalan’i Isaia mpaminany hoe: “Aza matahotra hianao, fa momba anao Aho; ary aza miherikerika foana, fa Izaho no Andriamanitrao; mampahery anao Aho sady mamonjy anao; eny, mitantana anao amin’ny tànana ankavanan’ny fahamarinako Aho.”—Isaia 41:10.

[Fanamarihana ambany pejy]

[Sary, pejy 16]

Maro no manompo an’i Jehovah tsy amin-tahotra, toa an’i Stanley Ombeva (ambony) sy Herbert Jennings (ankavanana)

[Sary nahazoan-dalana, pejy 14]

Sary USAF