Tadidinao Ve?

Tianao ve ny namaky ireo nomerao faramparany tamin’ny Tilikambo Fiambenana? Jereo àry raha hainao ny mamaly ireto fanontaniana ireto:

• Nahoana no ilaina foana ny “Testamenta Taloha”?

Tsy avy amin’ny andriamanitra tsy fantatra sy lozabe izy io, fa avy amin’i Jehovah ilay Andriamanitra fitiavana. Nampiasa ny Soratra Hebreo foana i Jesosy sy ny mpianany. Mirakitra torohevitra ilaina amin’ny fiainana andavanandro izy io, ary manome fanantenana kanto momba ny hoavy.—1/9, pejy 4-7.

• Inona no voaporofo arakaraka ny fandehan’ny fotoana, taorian’ny nanotan’i Adama sy Eva?

Nandritra ireo 6 000 taona mahery, dia hita fa mpandainga i Satana, satria maty i Adama sy Eva sy ny taranany. Hita koa fa tsy nanatsara ny fiainan’ny olombelona ny tsy fianteherana tamin’Andriamanitra. Miharihary fa tsy manan-jo hitondra samirery ny fiainany ny olona, sady tsy mahay an’izany.—15/9, pejy 6-7.

• Nahoana no tsy meloka i Jakoba raha nilaza fa Esao izy?

Nanana zo hahazo ilay tsodrano i Jakoba, satria efa novidiny tamin’i Esao ny zon’ny lahimatoa. Tsy nanitsy ilay tsodrano koa i Isaka, rehefa fantany fa i Jakoba no nahazo izany. Afaka nisalovana Andriamanitra saingy tsy nanao izany izy, satria tiany ho an’i Jakoba ilay tsodrano.—1/10, pejy 31.

• Nahoana ny fananantsika feon’ny fieritreretana no manaporofo fa diso ny evolisiona?

Hita fa tia manampy ny hafa ny olona avy amin’ny firazanana sy kolontsaina rehetra, na dia mety hampidi-doza ny tenany aza izany. Tsy ho toy izany ny olona raha mitovy amin’ny biby, izay tsy mihevitra afa-tsy ny hahavelomany, na inona na inona tambiny.—15/10, pejy 20.

• Nahoana isika no afaka milaza fa manetry tena Andriamanitra, ary ahoana no anehoany izany?

Mpanjaka sy Mpamorona Andriamanitra, ka tsy voafetra toy ny antsika ny zavatra azony atao. Asehon’ny 2 Samoela 22:36 anefa fa mora fanahy izy, izany hoe manetry tena, ka miahy sy mangoraka an’ireo mahantra miezaka mampifaly azy. Toy ny hoe miondrika izy, rehefa maneho hatsaram-panahy amin’ireo matahotra azy.—1/11, pejy 4-5.

• Porofo inona no hita avy amin’ny vakin-tanimanga fahiny, momba ny fahamarinan’ny Baiboly?

Nisy anarana fianakaviambe fito ny vakin-tanimanga hitan’ny mpikaroka tao Samaria. Hita ao amin’ny Josoa 17:1-6 ireo anarana ireo. Manamafy ny voalazan’ny Baiboly momba ny fianakaviamben’ny mpisorona koa ny vakin-tanimanga avy any Arada, sady misy ny anaran’Andriamanitra. Ny vakin-tanimanga tao Lakisy kosa, manazava ny toe-draharaha politika sy ny korontana nisy tao Joda talohan’ny fanafihan’ny Babylonianina.—15/11, pejy 12-14.

• Nahoana isika no milaza fa i Lioka no nanoratra ny bokin’ny Asan’ny Apostoly?

Samy nosoratana ho an’i Teofilo na ny Filazantsaran’i Lioka na ny bokin’ny Asan’ny Apostoly. I Lioka àry no nanoratra azy ireo. Asehon’ny fampiasany ny hoe “izahay” sy “anay”, fa nandray anjara tamin’ny zava-niseho sasany notantarainy izy. (Asan’ny Apostoly 16:8-15)—15/11, pejy 18.

Mety amin’ny Kristianina ve ny mihaza sy manjono?

Navelan’Andriamanitra hovonoina hatao sakafo ny biby, nanomboka tamin’ny andron’i Noa. Tsy maintsy alatsa-dra anefa izy ireny. Asehon’izany fa tokony hohajaina ny ain’ny biby, satria avy amin’Andriamanitra. Tsy tokony hamono biby noho ny fanatanjahan-tena àry ny Kristianina, na hihaza sy hamono azy ireny mba hifalifaliana fotsiny. Ilaina koa ny mankatò ny lalàn’i Kaisara sy mihevitra ny feon’ny fieritreretan’ny hafa. (Romanina 14:13)—1/12, pejy 31.