“Tandremo sao Hisy Hahalasa Anareo ho Rembiny”!

1. Ahoana no ataon’i Satana mba hifehezana ny saintsika, araka ny Kolosianina 2:4, 8?

TIAN’I Satana hiala amin’i Jehovah isika. Ahoana no anatratrarany an’izany tanjony izany? Ataony izay hanovana ny fomba fisainantsika mba hifanaraka amin’izay tiany. Lasa hoatran’ny hoe rembiny na feheziny ny saintsika amin’izay. Miezaka mandresy lahatra na mamitaka antsika izy mba hahatonga antsika hanaraka azy. Izay zavatra manintona antsika no ampiasainy hanaovana an’izany.—Vakio ny Kolosianina 2:4, 8.

2-3. a) Nahoana isika no mila manaraka an’izay voalazan’ny Kolosianina 2:8? b) Inona no hodinihintsika ato?

² Tena mety ho voafitak’i Satana tokoa ve isika? Ie! Tadidio fa mpanompon’i Jehovah no nampitandreman’i Paoly, ao amin’ny Kolosianina 2:8. Kristianina voahosotry ny fanahy masina izy ireo. (Kol. 1:2, 5) Koa raha ny voahosotra tamin’izany aza natahorana ho voafitak’i Satana, mainka moa fa isika amin’izao andro izao! (1 Kor. 10:12) Natsipy tetỳ amin’ny manodidina ny tany mantsy i Satana, ary izay hamitahana ny mpanompon’Andriamanitra tsy mivadika no tena ataony. (Apok. 12:9, 12, 17) Tsy izay ihany fa ‘vao mainka miharatsy kokoa’ ny ratsy fanahy sy ny mpisandoka amin’izao.—2 Tim. 3:1, 13.

³ Mampiasa “famitahana poakaty” na fitaka i Satana mba hifehezana ny saintsika. Ahoana no anaovany an’izany? Handinika telo amin’ny ‘teti-dratsiny’ isika ato. (Efes. 6:11) Hojerentsika ao amin’ny lahatsoratra manaraka kosa hoe inona no azontsika atao mba hiovana, raha efa misy vokany eo amin’ny fomba fisainantsika ny teti-dratsiny. Andao anefa aloha hojerentsika izay nataon’i Satana mba hamitahana ny Israelita rehefa tafiditra ny Tany Nampanantenaina izy ireo, ary inona no azontsika ianarana avy amin’izany.

NOTAOMIN’I SATANA HANOMPO SAMPY IZY IREO

4-6. Raha jerena ny Deoteronomia 11:10-15, inona no fomba fambolena nila nianaran’ny Israelita rehefa tonga tany amin’ny Tany Nampanantenaina?

⁴ Nampiasa hafetsena i Satana mba hitaomana ny Israelita hanompo sampy. Ahoana no nataony? Fantany fa nila sakafo ny Israelita, dia izay no nohararaotiny. Nila nianatra fomba fambolena vaovao ry zareo rehefa tafiditra ny Tany Nampanantenaina. Tamin-dry zareo tany Ejipta mantsy, dia ny Reniranon’i Neily no nampiasainy mba hanondrahana ny tanimboliny. Tsy nisy renirano lehibe hoatr’izany anefa tany amin’ny Tany Nampanantenaina, fa orana sy ando no nianteheran-dry zareo. (Vakio ny Deoteronomia 11:10-15; Isaia 18:4, 5) Azo inoana hoe tsy mora tamin’izy ireo ny hianatra fomba fambolena vaovao, satria maty tany an-tany efitra ny ankamaroan’ny Israelita nanana traikefa tamin’ny fambolena.

⁵ Nohazavain’i Jehovah tamin’ny Israelita hoe niova ny fiainan’izy ireo. Nilaza izy avy eo hoe: ‘Tandremo sao voafitaka ny fonareo, ka mivily hanompo andriamani-kafa ianareo ary miankohoka eo anatrehany.’ (Deot. 11:16, 17) Fa maninona i Jehovah no nampitandrina an-dry zareo mba tsy hanompo andriamani-kafa nefa fomba fambolena vaovao no noresahiny? Hoatran’ny tsy misy ifandraisany amin’izany mantsy ilay fampitandremana.

⁶ Efa fantatr’i Jehovah hoe haniry hianatra ny fomba fambolena eo an-toerana ny Israelita, ka hanontany an’izany any amin’ireo Kananita teo amin’ny manodidina azy. Marina aloha fa nahay kokoa ny fomba fambolena teo amin’ilay faritra ny Kananita, ary mety ho afaka hampita teknika sasantsasany tamin’ny Israelita. Mety hampidi-doza anefa izany! Nanompo an’i Bala mantsy ireo mpamboly ireo, ary nisy vokany tamin’ny fomba fisainany izany. Nihevitra an’i Bala ho tompon’ny lanitra sy mpanome orana ry zareo. Tsy tian’i Jehovah ho voafitaky ny hevi-diso hoatr’izany ny vahoakany. Naleon’ny Israelita anefa nanompo an’i Bala ihany, ary imbetsaka izany no nitranga. (Nom. 25:3, 5; Mpits. 2:13; 1 Mpanj. 18:18) Andao àry hojerentsika hoe ahoana no nataon’i Satana mba hifehezana ny Israelita.

TETI-DRATSY TELO NAMPIASAIN’I SATANA HIFEHEZANA NY ISRAELITA

7. Inona no nitsapa ny finoan’ny Israelita, tamin’izy ireo tafiditra ny Tany Nampanantenaina?

⁷ Inona no tetika voalohany nampiasain’i Satana? Tian’ny Israelita ho azon’ny orana ilay tany, ary izany faniriana ara-dalàna izany no nohararaotin’i Satana. Zara raha nisy orana tany amin’ny Tany Nampanantenaina nanomboka tamin’ny faramparan’ny Aprily ka hatramin’ny faran’ny Septambra. Nila orana ny Israelita raha te hahavokatra sy ho velona foana, nefa volana Oktobra tany ho any matetika vao tonga ny orana. Nofitahin’i Satana ry zareo ka lasa nino hoe nila nanao hoatran’ireo mpanompo sampy teo amin’ny manodidina raha te hahavokatra. Nino mantsy ny Kananita hoe nila nanao fombafomba ry zareo, mba hahatonga ny andriamaniny hampilatsaka orana. Lasa nino an’izany koa ireo Israelita tsy tena natoky an’i Jehovah, ka nieritreritra hoe izany ihany no vahaolana raha tsy tiana haharitra ny hain-tany. Nanao fombafomba hanomezam-boninahitra an’i Bala àry izy ireo.

8. Inona ilay tetika faharoa nampiasain’i Satana? Hazavao.

⁸ Nampiasa tetika hafa koa i Satana mba hamitahana ny Israelita. Notaominy haloto fitondran-tena izy ireo. Nanao zavatra vetaveta ny Kananita rehefa nanompo ny andriamaniny. Nivaro-tena tany amin’ny tempoliny, ohatra, ry zareo ary nanao an’izany na vehivavy na lehilahy. Tsy nampaninona an-dry zareo ny fitondran-tena ratsy, anisan’izany ny firaisan’ny samy lehilahy na ny samy vehivavy. Noheveriny hoe fomba fiaina ara-dalàna mihitsy aza izany. (Deot. 23:17, 18; 1 Mpanj. 14:24) Nieritreritra ireo mpanompo sampy ireo hoe hahafaly ny andriamanitr’izy ireo izany, ka hataony lonaka ny tany. Nanintona Israelita be dia be ilay fomba fivavahana misy fitondran-tena maloto, ka nisafidy ny hanompo andriamani-diso ry zareo. Lasa nofehezin’i Satana ry zareo raha ny marina.

9. Ahoana no nataon’i Satana mba hahatonga ny Israelita tsy hahafantatra tsara an’i Jehovah intsony, araka ny Hosea 2:16, 17?

⁹ Nisy tetika fahatelo nampiasain’i Satana. Nataony izay hahatonga ny Israelita tsy hahafantatra tsara an’i Jehovah intsony. Nilaza i Jehovah hoe nataon’ireo mpaminany sandoka izay hanadinoan’ny vahoakany ny anarany. “Nanompo an’i Bala” izy ireo, dia notaominy hanao an’izany koa ny vahoaka. (Jer. 23:27) Toa lasa tsy nampiasa an’ilay anarana hoe Jehovah intsony àry ny vahoakany tamin’izany, fa nosoloan’izy ireo hoe Bala ny anarany. Midika hoe “Tompo” ny hoe Bala. Lasa tsy hitan’ny Israelita intsony izay hanavahana an’i Jehovah tamin’i Bala. Mora tamin’izy ireo àry ny nampifangaro ny fanompoana azy sy ny fombafomba fanao rehefa nanompo an’i Bala.—Vakio ny Hosea 2:16, 17.b

TETIK’I SATANA AMIN’IZAO ANDRO IZAO

10. Inona no tetika ampiasain’i Satana amin’izao?

¹⁰ Mbola miezaka mifehy ny olona i Satana hatramin’izao, ary tsy niova ny tetika ampiasainy. Manararaotra ny faniriana ara-dalàna ao amin’ny olona izy, mitaona azy ireo haloto fitondran-tena, ary manao izay hahatonga azy ireo tsy hahafantatra tsara an’i Jehovah intsony. Andao io farany io no hodinihintsika voalohany.

11. Ahoana no ataon’i Satana mba hahatonga ny olona tsy hahafantatra tsara an’i Jehovah?

¹¹ Ataon’i Satana izay hahatonga ny olona tsy hahafantatra tsara an’i Jehovah. Rehefa maty ny apostolin’i Jesosy, dia nanomboka nampianatra lainga ny olona sasany nivadi-pinoana. (Asa. 20:29, 30; 2 Tes. 2:3) Nataon’izy ireo izay tsy hahafantaran’ny olona hoe iza ilay tena Andriamanitra. Tsy nampiasa ny anarany intsony, ohatra, izy ireo rehefa nandika ny Baiboly, fa nosoloany teny hafa toy ny hoe “Tompo” izany. Lasa sarotra ho an’ny olona mamaky Baiboly àry ny mahita hoe inona no mampiavaka an’i Jehovah amin’ireo “tompo” hafa resahin’ny Soratra Masina. (1 Kor. 8:5) Samy nantsoin’izy ireo hoe “Tompo” na i Jehovah na i Jesosy, ka lasa tsy hain’ny olona intsony hoe samy hafa izy ireo. (Jaona 17:3) Anisan’ny nahatonga ny fampianarana momba ny Andriamanitra telo izay iray izany. Tsy hita ao amin’ny Baiboly anefa io fampianarana io. Vokatr’izany rehetra izany, dia betsaka no lasa mieritreritra hoe tsy ho afaka ny hahafantatra an’Andriamanitra mihitsy isika. Tena lainga anefa izany!—Asa. 17:27.

12. Ampirisihin’ny fivavahan-diso hanao inona ny olona? Inona no vokatr’izany, araka ny Romanina 1:28-31?

¹² Taomin’i Satana haloto fitondran-tena ny olona. Nampiasa ny fivavahan-diso izy mba hitaomana ny Israelita haloto fitondran-tena. Mbola izany ihany no ataony amin’izao. Tsy mampaninona ny maloto fitondran-tena any amin’ny fivavahan-diso, ary ampirisihina mihitsy aza ny olona hanao an’izany. Lasa tsy manaraka ny fitsipik’i Jehovah momba ny fitondran-tena intsony àry ny olona maro milaza ho manompo azy, na dia efa voalaza mazava tsara ao amin’ny Baiboly aza izany fitsipika izany. Niresaka momba ny voka-dratsin’izany ny apostoly Paoly, ao amin’ny taratasiny ho an’ny Romanina. (Vakio ny Romanina 1:28-31.) Efa nilaza koa izy hoe manao “zavatra tsy mendrika” ny olona, anisan’izany ny fitondran-tena maloto isan-karazany toy ny firaisan’ny samy lehilahy na ny samy vehivavy. (Rom. 1:24-27, 32; Apok. 2:20) Isika kosa tena tokony hankatò ny fitsipika mazava ao amin’ny Baiboly!

13. Inona koa ny tetika ampiasain’i Satana?

¹³ Hararaotin’i Satana ny faniriana ara-dalàna ao amintsika. Ara-dalàna, ohatra, raha maniry hahazo izay ilaintsika sy ny fianakaviantsika isika. Izany no mahatonga antsika hianatra mba hahazoana fahaizana hoentina miasa. (1 Tim. 5:8) Mila mankany am-pianarana sy mazoto mianatra isika matetika mba hahazoana an’izany fahaizana izany. Tsy maintsy mitandrina anefa isika. Tsy mampita fahaizana fotsiny mantsy ny sekoly any amin’ny tany maro, fa mampita ny fahendren’olombelona koa. Atao, ohatra, izay hahatonga ny mpianatra hisalasala hoe misy Andriamanitra. Ampirisihina hanao tsinontsinona ny Baiboly koa ry zareo. Ampianarina any koa hoe avy amin’ny evolisiona ny zava-drehetra, ary mino an’izany, hono, ny olona manan-tsaina. (Rom. 1:21-23) Mifanohitra amin’ny “fahendren’Andriamanitra” anefa ireny fampianarana ireny.—1 Kor. 1:19-21; 3:18-20.

14. Inona no vokatry ny fahendren’olombelona?

¹⁴ Mifanohitra amin’ny fitsipik’i Jehovah ny fahendren’olombelona. Tsy mahatonga ny olona hanana ny vokatry ny fanahin’Andriamanitra izy io, fa mampirisika azy ireo hanao ny “asan’ny nofo.” (Gal. 5:19-23) Mahatonga ny olona hirehareha sy hanambony tena izy io, ary lasa “tia tena” ny olona vokatr’izany. (2 Tim. 3:2-4) Mifanohitra amin’ny toetra tokony hananan’ny mpanompon’Andriamanitra anefa ireo. Ampirisihina handefitra sy hanetry tena mantsy isika. (2 Sam. 22:28) Lasa tsy manana ny fomba fisainan’Andriamanitra intsony ny Kristianina sasany nianatra teny amin’ny oniversite, fa manaraka ny fomba fisainan’ity tontolo ity. Ahoana no mety hahatonga an’izany? Andao isika handinika ohatra iray.

15-16. Inona no ianaranao avy amin’izay nahazo an’ilay anabavy resahin’ny fehintsoratra?

¹⁵ Hoy ny anabavy iray efa nanompo manontolo andro nandritra ny 15 taona mahery: “Efa vita batisa aho tamin’izany, ary efa henoko foana hoe mampidi-doza ny mianatra eny amin’ny oniversite. Efa hitako tao amin’ny bokintsika koa izany. Tsy noraharahaiko anefa ilay izy. Nieritreritra aho hoe: ‘Izaho indray dia tsy ho voa amin’izany!’” Inona no vokany rehefa nianatra teny amin’ny oniversite tokoa izy? Izao no nolazainy: “Naka fotoana be ilay fianarana sady tsy maintsy nianatra mafy aho. Be atao loatra aho, dia tsy nanam-potoana hiresahana ela be tamin’i Jehovah hoatran’ny taloha intsony. Tsy nahita tsirony tamin’izay resaka ara-baiboly nifanaovana teny am-pitoriana intsony aho, satria vizana loatra. Na ny fivoriana aza tsy voaomako tsara intsony. Soa ihany aho fa tonga saina hoe nanimba ny fifandraisako tamin’i Jehovah ny fianarana ambony. Hitako hoe tokony hajanona ilay izy, dia izay no nataoko.”

¹⁶ Nisy vokany teo amin’ny fomba fisainany anefa ilay fianarana ambony nataony. Izao no nolazainy: “Tsoriko aloha fa lasa tia nanakiana ny hafa aho, indrindra fa ny mpiara-manompo. Lasa nitaky be loatra tamin-dry zareo koa aho, sady tsy te hiaraka tamin-dry zareo. Mahamenatra ilay izy! Ela be aho vao nahavita niova. Mampitandrina antsika amin’ny alalan’ny fandaminana ilay Raintsika be fitiavana. Iny zavatra niainako iny no nahitako hoe tena midi-kizo ianao rehefa tsy miraharaha an’ireny fampitandremana ireny. Hay i Jehovah mahafantatra an’ahy mihoatra noho izaho! Raha mba nihaino azy aho mantsy!”

17. a) Tokony ho tapa-kevitra hanao inona isika? b) Inona no horesahintsika ao amin’ny lahatsoratra manaraka?

¹⁷ Tokony ho tapa-kevitra àry isika hoe tsy hanaiky hofehezin’ny “filozofia sy ny famitahana poakaty” eto amin’ity tontolo ity. Aza avela hamitaka anao mihitsy i Satana. (1 Kor. 3:18; 2 Kor. 2:11) Mitandrema sao voataonany, ka lasa tsy mahafantatra tsara an’i Jehovah intsony. Araho ireo fitsipika faran’izay tsara omen’i Jehovah momba ny fitondran-tena. Tandremo koa sao voafetsin’i Satana, ka lasa tsy miraharaha ny torohevitr’i Jehovah. Inona anefa no tokony hataonao raha efa misy vokany eo aminao ny fomba fisainan’ity tontolo ity? Afaka manampy anao hiala amin’ny eritreritra na fahazarana ratsy ny Tenin’Andriamanitra, na dia efa “mafy orina” aza izy ireny. (2 Kor. 10:4, 5) Hiresaka an’izany isika ao amin’ny lahatsoratra manaraka.