Afaka ny ho Mpisava Lalana ve Ianao?

¹ Maro angamba no efa nanontany tena hoe: “Afaka ny ho mpisava lalana ve aho?” Midika izany fa te hampitombo ny fanompoanao ianao, ary mendri-piderana izany. Nanolo-tena ho an’i Jehovah mantsy isika, ka tokony hanompo azy amin’ny fo, sy ny tena, sy ny saina, ary ny herintsika manontolo. (Marka 12:30) Tsy isika rehetra anefa no afaka manao ny asan’ny mpisava lalana. Manana andraikitra ara-pianakaviana sy andraikitra hafa ny sasany amintsika. Ny hafa indray marary matetika na mandroso taona. Azo antoka anefa fa betsaka kokoa no afaka hanao ny asan’ny mpisava lalana, ka hahita fifaliana avy amin’izany. Hanampy antsika handinika ny zava-misy ny valin’ireto fanontaniana ireto.

1 “MISY MILAZA FA TSY NY REHETRA NO AFAKA NY HO MPISAVA LALANA. AHOANA NO AHAFANTARAKO RAHA AFAKA MANAO AN’IZANY AHO?”

² Miankina be dia be amin’ny toe-javatra misy anao sy ny andraikitra iantsorohanao izany. Tsy afaka manokana 70 ora isam-bolana amin’ny fanompoana ny mpitory sasany. Tsy midika anefa izany hoe tsy manana finoana matanjaka izy ireo. Maro amin’ny anabavy mikarakara tokantrano, ohatra, no vady sy reny fakan-tahaka, nefa koa mbola mahita fomba hitoriana ny vaovao tsara foana. Ny hafa indray manokana ora maro isam-bolana mba hitoriana amin’ny mpiara-belona aminy. Mahita vokatra izy ireo, ary faly satria afaka manampy an’ireo olona liana mba ho tonga eo anivon’ny fiangonana. Mirotsaka ho mpisava lalana mpanampy izy ireo isaky ny afaka manao izany, ary tena mahita fifaliana tokoa. (Gal. 6:9) Mampirisika ny hafa ho tia ny asan’ny mpisava lalana koa izy ireo, na dia mbola tsy afaka manao an’io asa io aza.

³ Maro anefa no tsy manana andraikitra ara-pianakaviana ary afaka manao ny asan’ny mpisava lalana. Mila mandini-tena tsy tapaka àry isika, ary manontany tena hoe: ‘Afaka mampitombo ny fanompoako ve aho?’ Takatsika avy amin’ny fianarana Baiboly, fa efa hifarana ny “andro farany.” Izany no mahatonga ny tontolon’i Satana hiharatsy hatrany, araka ny voalazan’ny 2 Timoty 3:1-5. Ataon’i Satana izay handentehana antsika ao amin’ity tontolo tia vola sy tsy manam-pitiavana ity. Tsy hahomby anefa izy! Tafasaraka amin’izao tontolo izao isika, ary “ny finoantsika” no manampy antsika ‘handresy an’izao tontolo izao.’ (1 Jaona 5:4) Noho izany finoana ananantsika izany, dia tokony hiezaka mafy isika hanatratra izay tombontsoam-panompoana azontsika tratrarina. Tokony handray anjara amin’ny asan’ny mpisava lalana mpanampy isika, rehefa afaka manao izany, ary angamba hirotsaka ho mpisava lalana maharitra any aoriana.

2 “AHOANA NO AHAZOAKO ANTOKA FA HANANA IZAY ILAIKO ARA-NOFO AHO REHEFA MANAO NY ASAN’NY MPISAVA LALANA?”

⁴ Eo koa no ahitana raha matanjaka ny finoanao na tsia. Mihatra amintsika rehetra ity tenin’i Jesosy ao amin’ny Matio 6:30-33 ity, na mpitory isika na miezaka ny ho mpisava lalana: “Raha ny zavamaniry any an-tsaha, izay any ihany anio ary atsipy ao anaty lafaoro rahampitso, no ampitafin’Andriamanitra toy izany, tsy mainka ve ianareo, ry kely finoana? Koa aza manahy mihitsy ianareo hoe: ‘Inona no hohaninay?’ na ‘Inona no hosotroinay?’ na ‘Inona no hotafinay?’ Izany rehetra izany mantsy no katsahin’ny olona eo amin’izao tontolo izao fatratra. Fa fantatry ny Rainareo any an-danitra fa ilainareo izany rehetra izany. Katsaho hatrany àry aloha ny fanjakany sy ny fahamarinany, dia homena anareo koa izany rehetra izany.” Manome toky antsika Andriamanitra fa hanome izay rehetra ilaintsika izy, raha matoky ny teniny isika ka miezaka manao ny sitrapony. Raha afaka manao fanitsiana isika mba hanaovana ny asan’ny mpisava lalana, dia tokony hanao izany. Hanome izay ilaintsika foana i Jehovah. Tsy hisy mihitsy mpisava lalana tsy mivadika hangataka hanina!—Sal. 37:25, 26.

⁵ Mety hisy mpisava lalana eo anivon’ny fiangonanao na iray faritra aminao, nahita fifaliana tamin’io asa io nandritra ny roa taona na mihoatra. Hahazo fanampiana ianao raha miresaka amin’izy ireny. Tsy hisalasala intsony ianao amin’izay. Miresaha amin’ireo nanokan-tena hanao ny asan’ny mpisava lalana, sady mbola mahita fifaliana avy amin’izany. Horesahiny aminao ny zavatra nataony. Anisan’izany ny olana natrehiny tamin’izy vao nanomboka an’io asa io, sy ny fomba andaminany ny fotoanany mba hahafahany hanompo sy hivory ary hanao zavatra hafa. Matokia koa fa hanampy anao handresy ireo vato misakana toy ny tendrombohitra, i Jehovah.—Matio 17:20.

⁶ Manana antony manosika tsara ny mpisava lalana mahita vokatra, ary toy izany koa ny Kristianina hafa manompo amin’ny fony manontolo. Mino isika rehetra fa “andro farany” izao. Tia an’i Jehovah isika, ary ankasitrahantsika ny zavatra nataony mba hahasambatra antsika mandrakizay. Tsy toy ny olona any amin’ny fivavahana hafa isika, fa mihevitra ny fanompoana an’i Jehovah ho zava-dehibe. Be dia be ny zavatra atolotr’ity tontolo ity, kanefa miezaka mafy isika mba tsy ho voasarik’izy ireny. Manova ny fiheverany ny zavatra ara-nofo ny olona tapa-kevitra ho tonga mpisava lalana. Miezaka manatsotra ny fiainany izy ireo ary mazoto miasa.

⁷ Matetika ny tanora any amin’ny toerana be mpisava lalana, no manao an’io asa io avy hatrany raha vao vita ny fianarany any amin’ny lise. Efa nampirisihin’ny ray aman-dreniny hatramin’ny fahakeliny angamba izy ireo. Mety haniry ho tonga mpisava lalana ny mpianatra Baiboly, na dia mbola tsy vita batisa aza. Eo koa ireo anabavy mpisava lalana. Hitan’izy ireo fa tena manampy azy ny manana trano tsotra sy tsy be entana. Rehefa lasa mianatra ny ankizy, dia miezaka mampirin-trano haingana izy, ary mandeha manompo avy eo. Manao asa tapa-potoana kosa ny loham-pianakaviana sasany mba hanaovana ny asan’ny mpisava lalana. Asa tsy dia be mpitia no ataony, na asa mitaky ny hifohazana maraina be. Nahafahan’ny Kristianina maro nanao ny asan’ny mpisava lalana izany fomba izany. Novalian-tsoa ireny rahalahy sy anabavy ireny noho ny finoany, ka nahita fifaliana. Afaka miezaka ny ho tonga mpisava lalana koa ve ianao, ka hahita fifaliana toa azy ireo? Ianao ihany no afaka mandinika ny toe-javatra misy anao, sy mandray fanapahan-kevitra.

3 “MBOLA TANORA AHO KA TSY FANTATRO NY ZAVATRA TIAKO HATAO REHEFA AFAKA ENIM-BOLANA, MAINKA MOA FA NY HOE HANAO NY ASAN’NY MPISAVA LALANA MANDRITRA NY ANDROM-PIAINANA.”

⁸ Zavatra maharitra no tonga ao an-tsaina rehefa mandre ny teny hoe “asa”, ary mety ho mbola tsy vonona amin’izany ianao izao. Tsy fantatrao tsara koa angamba ny asan’ny mpisava lalana. Te hanambady sy hiteraka koa angamba ianao any aoriana any, ka mety tsy ho afaka hanohy ny asan’ny mpisava lalana intsony. Tena mampanahy tokoa izany.

⁹ Tsy tena fantatry ny tanora maro koa ny zavatra tiany hatao, rehefa hifarana na rehefa vita ny fianarany eny amin’ny lise. Efa nisy nandamina mialoha ny ankabeazan’ny zavatra tokony hataonao hatramin’izay, ary mbola tsy nandray fanapahan-kevitra loatra ianao teo amin’ny fiainana. Izany indrindra anefa no antony tokony handinihanao ny zavatra hataonao manomboka izao.

¹⁰ Mety hiankina amin’ny fanapahan-kevitra raisinao ankehitriny ny hoavinao. Na dia mbola tsy manana tanjona voafaritra tsara aza ianao, dia azo inoana fa zavatra mahasoa sy mahafa-po no tianao hameno ny fiainanao. Aza manao asa manontolo andro avy hatrany rehefa vita ny fianaranao, fa manandrama aloha manao ny asan’ny mpisava lalana mpanampy mandritra ny volana vitsivitsy. Raha mahafinaritra anao ilay izy, dia mety hirotsaka ho mpisava lalana maharitra ianao.

¹¹ Rehefa avy manao ny asan’ny mpisava lalana mandritra ny herintaona eo ho eo ianao, dia mety ho fantatrao tsara ny zavatra tianao hatao eo amin’ny fiainana. Mbola handray soa ianao na dia hanambady aza. Mpivady maro mantsy no nandray soa, rehefa niaraka nanao an’io asa io taorian’ny raharahany. Matetika no afaka nanohy an’io asa io nandritra ny androm-piainany ny iray tamin’izy ireo, na izy mivady mihitsy.

¹² Na hanambady ianao na tsia, dia hahazo traikefa tsy ho hitanao na aiza na aiza ianao, noho ny asan’ny mpisava lalana. Hahay hifandray amin’ny olona isan-karazany mantsy ianao, hianatra hamaha olana samirery, hahay handamin-javatra, ary hahay hanitsy tena. Tena hilainao izany any aoriana any. Tsy ho tsapanao anefa izany rehetra izany, raha tsy manandrana mihitsy ianao.

4 “MARINA VE FA LASA ENTA-MAVESATRA NY ASAN’NY MPISAVA LALANA, RAHA TSY MAHAFENO ORA IANAO NOHO NY ARETINA NA OLANA LEHIBE HAFA?”

¹³ Marina fa mila manatratra 70 ora isam-bolana ny mpisava lalana fara fahakeliny, izany hoe 840 ora isan-taona. Hitan’ny ankamaroan’izy ireo hoe azo tratrarina tsara izany, raha mandeha tsara ny zava-drehetra. Mila manompo adiny roa isan’andro eo ho eo monja izy ireo. Mazava ho azy anefa fa ho sahirana ianao raha tsy mandamina tsara ny fotoananao, na mandamina ihany fa tsy manaraka izany akaiky.

¹⁴ Mety tsy hahatratra ora anefa ny mpisava lalana iray, raha sendra marary mafy na manana olana lehibe tsy ampoizina. Mba hanatratrarana an’ilay ora tsy feno, dia mety ho voatery hanompo adiny dimy na mihoatra, isan’andro, izy mandritra ny volana maromaro. Mety hitranga koa ny hoe tsy ampy adiny 100 na maherin’izany ny ora anompoan’ny mpisava lalana iray eo am-piandohan’ny taom-panompoana, noho ny zava-mitranga tsy ampoizina. Miezaka manatratra ora izy atỳ aoriana, nefa misy olana lehibe hafa indray, ka vao mainka mihabetsaka ny ora tsy feno. Rehefa mitambatra izany rehetra izany, miaraka amin’ny asa tapa-potoana tsy maintsy atao, dia tsapany hoe mizaka ny tsy eran’ny ainy izy. Maro àry no tsy sahy mirotsaka ho mpisava lalana satria matahotra olana, izay matetika no tsy mitranga akory. Inona no vahaolana?

¹⁵ Tianay ny mampahafantatra anao fa raha sanatria ianao ka marary mandritra ny fotoana kelikely, na tsy mahafeno ora mandritra ny volana vitsivitsy noho ny antony hafa, dia azonao atao ny miresaka an’ilay olana amin’ny an-tsipiriany amin’ny anti-panahy. Rehefa avy nandinika tsara an’ilay toe-javatra ireo anti-panahy, ka mahita hoe tsara raha avela hanohy ny asan’ny mpisava lalana ianao, nefa tsy voatery hameno an’ilay ora tsy feno, dia tohizo ny fanompoana masina ataonao.

¹⁶ Tsy mety anefa raha tsy mahafeno ora ny mpisava lalana iray satria hoe lany tamin-javatra tsy tena nilaina ny fotoanany, na tsy nahay nandamina fotoana izy, na tsy nahay nanitsy tena. Tokony hiezaka hameno an’ireo ora tsy feno izy. Raha sendra marary anefa ianao, na iharan-doza, na misy olana lehibe mitranga ao amin’ny fianakavianao, dia matokia fa handinika ny toe-javatra misy anao ny anti-panahy. Mino izahay fa hanampy an’ireo mpisava lalana io fandaharana io rehefa manana olana izy ireo.

¹⁷ Mpisava lalana be zotom-po efa hatramin’ny ela ny rahalahy sy anabavy maro, ary mbola maniry hanohy an’io asa io. Tiantsika hanohy ny asan’ny mpisava lalana koa izy ireo. Ahoana anefa raha tsy mahafeno ora foana izy mandritra ny fotoana maharitra? Fahendrena angamba amin’izay raha mijanona kely izy, ka hanao ny asan’ny mpisava lalana mpanampy isaky ny afaka manao izany.

5 “KA MANINONA MOA AHO NA TSY MPISAVA LALANA AZA? TSY VOATERY HANAO NY ASAN’NY MPISAVA LALANA ANIE VAO MAHAZO FIAINANA MANDRAKIZAY E!”

¹⁸ Ekena aloha fa tsy voatery hanao ny asan’ny mpisava lalana isika vao hahazo fiainana mandrakizay. Mila manompo an’Andriamanitra amin’ny fo manontolo anefa isika. Mihatra amin’ny fanaovana ny asan’ny mpisava lalana ilay toro lalana ao amin’ny 2 Korintianina 9:7 hoe: “Aoka ny tsirairay samy hanao araka izay fanapahan-keviny tao am-pony, tsy amin’alahelo na an-tery, fa ny mpanome amim-pifaliana no tian’Andriamanitra.” Tsy ny olona àry no tokony hiteny aminao hoe mila manao ny asan’ny mpisava lalana ianao. Mitsara ny toe-javatra misy anao sy ny toe-ponao izay olona manao izany. Tsy misy manana zo hanao izany anefa.

¹⁹ Ianao ihany àry no tokony hanapa-kevitra. Mino izahay fa hanampy anao handinika tsara, ireo fanazavana nomena teo. Mety hanampy anao handray fanapahan-kevitra tsara koa ireto fanazavana manaraka ireto.

²⁰ Mila dinihinao tsara ny antony mahatonga anao hirotsaka ho mpisava lalana. Tokony ho antony tsara ilay izy. Raha tsy izany mantsy, dia tsy haharitra amin’izy io ianao. Raha manao ny asan’ny mpisava lalana, ohatra, ianao satria fotsiny hoe mpisava lalana ny namanao akaiky, dia mety tsy hateza amin’io asa io ianao.

²¹ Tsy tokony hihevitra ny tenanao ho ambony noho ny hafa koa ianao rehefa manao an’io asa io. Raha izany mantsy, dia hoatran’ny hoe ianao no manompo an’Andriamanitra amin’ny fo manontolo fa ny hafa tsy mba toy izany. Tena ratsy izany toe-tsaina izany. Hoy mantsy i Paoly: “Fa iza moa ianao no hitsara ny mpiasa an-tranon’ny hafa? Eo anoloan’ny mpampiasa azy no ijoroany na ahalavoany.”—Rom. 14:4.

²² Raha ny hanampy ny hafa hahalala an’Andriamanitra sy ny fikasany anefa no tena zava-dehibe aminao, dia tena tsara ny hanaovanao ny asan’ny mpisava lalana. Mazava ho azy fa mila mameno ny ora takina ianao, ary mila manao fanitsiana sy mamoy zavatra sasany mba hahavitana izany.

²³ Mety hisalasala ny hanao ny asan’ny mpisava lalana anefa ianao, satria mihevitra ny tenanao ho tsy mahay, na manahy ny amin’izay havoaky ny ampitso. Raha izany no izy dia tadidio ity torohevitr’i Jehovah ity: ‘Izahao toetra amin’izany Aho, raha tsy hovohàko ny varavaran’ny lanitra ho anareo ka hampidinako fitahiana manana amby ampy ho anareo.’ (Mal. 3:10) Ataovy àry izay azonao atao, ary apetraho eo am-pelatanan’i Jehovah ny ambiny.

²⁴ Afaka ny ho mpisava lalana àry ve ianao? Faly izahay raha nanampy anao hamaly hoe “eny” ny fanazavana tato. Raha tapa-kevitra ny hanao ny asan’ny mpisava lalana ianao, dia matokia fa tena tombontsoa mahafaly izy io.