Tena Ilaina ny Mpiandraikitra ny Fanompoana
1 Tena ankasitrahantsika ireo “lehilahy ho fanomezana”, izay natao hanampy ny fiangonan’ny vahoakan’Andriamanitra eran-tany, amin’izao andro farany izao. (Efes. 4:8) Anisan’ireny fanomezana ireny ny anti-panahy notendren’ny fanahy masina hiandry ny fiangonan’Andriamanitra. Tendrena ho mpiandraikitra ny fanompoana ny iray amin’izy ireo. Efa hatramin’ny taonjato voalohany no notsinjaraina toy izany ny asan’ny anti-panahy. Hoy ny Baiboly: “Nanome ny sasany ho apostoly izy, ny sasany ho mpaminany, ny sasany ho mpitory ny vaovao tsara, ny sasany ho mpiandry sy mpampianatra, mba hanitsiana [hampiofanana] ny olona masina, ka hanaovany asa fanompoana.”—Efes. 4:11, 12.
2 Nomena asa fanompoana hotontosaina ny mpanompon’i Jehovah rehetra nanolo-tena sy vita batisa, amin’izao andro farany izao. Tsy maintsy mitory ny “vaovao tsaran’ilay fanjakana” isika. (Matio 24:14) Faly àry isika fa misy anti-panahy iray voatendry hiandraikitra manokana ny asa fitoriana ataon’ny fiangonana. Toy ny tamin’ny taonjato voalohany, dia natao hanampy antsika eo amin’ny “asa fanompoana” ireny rahalahy mahay ireny.
3 Inona avy no asan’ny mpiandraikitra ny fanompoana? 1) Ataony hatrany izay hahatsapantsika fa zava-dehibe ny fitoriana sy fampianarana. 2) Jereny raha mety tsara ny fitarihana ny asa fitoriana any amin’ny fianarana boky rehetra. 3) Jereny koa raha mahazo ny fanampiana ilaina isika tsirairay, mba hahitantsika vokatra tsara kokoa eo amin’ny fanompoana. Efa hatramin’ny taonjato voalohany ny “lehilahy ho fanomezana” toy ireny, no niahy ny Kristianina tsirairay. Inona no tanjon’izy ireo? Ny “hahatratrarantsika ny halehiben’ny fahafenoan’i Kristy. Amin’izay dia tsy ho zaza intsony isika.”—Efes. 4:13, 14.
4 Ahoana no anatanterahany ny andraikiny? Tsara homarihina fa tsy manana tatitra firy hosoratana izy. Ny tatitra avy any amin’ny mpitan-tsoratra kosa no ampiasainy. Manam-potoana tsara hanampiana ny mpitory àry izy. Marina fa manana fianarana boky iandraiketana ny ankamaroan’ny mpiandraikitra ny fanompoana, ary ny olona ao no tena ifaneraserany matetika. Na izany aza, dia manara-maso akaiky ny asa fitoriana ataon’ny fiangonana manontolo izy. Miresaka avy hatrany amin’ny anti-panahy rehetra izy, rehefa mahatsikaritra olana mahakasika ny fanompoana. Mety ho olana any anivon’ny fianarana boky izany, na olana mifandray amin’ny lafiny iray amin’ny fanompoana. Fantariny daholo ny fivoriana alohan’ny fanompoana ataon’ny fianarana boky tsirairay, ary jereny raha mazoto manatrika izany ny mpitory. Mampianatra eo anivon’ny fiangonana koa izy, ary mafana fo rehefa manao lahateny momba ny fitoriana sy fampianarana mandritra ny fivoriana momba ny fanompoana. Mahatonga ny mpitory hazoto hatrany amin’ny asa fanompoana izany.
5 Manokana herinandro iray isam-bolana izy mba hitsidihana fianarana boky iray. Ilay mpanampy azy no hitarika ny fianarana boky iandraiketany, amin’io fotoana io, mba hahafahany hijery tsara izay ilain’ilay fianarana boky tsidihiny. Hiezaka hiara-miasa amin’ny mpitory faran’izay betsaka ao amin’ilay fianarana boky tsidihiny ilay mpiandraikitra ny fanompoana, mandritra an’io herinandro io. Io no fotoana tsara angatahana torohevitra aminy, raha manana olana mahakasika ny fanompoana isika. Vonona hanampy antsika izy, satria fantany fa mpanompon’Andriamanitra toa azy isika rehetra, ary mahafaly azy izany. Misy fandaharana manokana atao amin’ny fianarana boky amin’io herinandro io. Afohezina ho 45 minitra ny fianarana, satria hanao lahateny mampahery avy ao amin’ny Soratra Masina ny mpiandraikitra ny fanompoana, aorian’izay. Natao hanampiana antsika hanatsara ny asa fitoriana ilay lahateny.
6 Tsy hanao dinidinika manokana ny mpiandraikitra ny fanompoana sy ny mpiandraikitra Fianarana Boky. Tokony hanontany momba ny fivoriana alohan’ny fanompoana ataon’ilay fianarana boky kosa ilay mpiandraikitra ny fanompoana. Hofantariny raha mizotra tsara izy ireny. Mazava ho azy fa tokony handray ny soso-kevitra omeny ilay mpiandraikitra Fianarana Boky.
7 Indray mandeha na indroa isan-taona ihany angamba no ho voatsidika ny fianarana boky tsirairay, any amin’ny fiangonana misy fianarana boky maro. Na vitsy aza anefa ny fianarana boky ao amin’ny fiangonana iray, dia mbola mety hielanelana volana maromaro ihany ny fitsidihan’ny mpiandraikitra ny fanompoana. Tokony hohararaotintsika tsara àry ny fitsidihany, ka hivoaka hitory sy hanatrika fianarana boky isika amin’io herinandro io. Miaraha mitory aminy. Manomeza valin-teny any amin’ny fianarana boky. Henoy tsara ny lahateniny. Raha manao izany isika, dia mampiseho amin’i Jehovah sy ny Zanany, fa tena ankasitrahantsika ny nanomezany mpiandraikitra hitarika antsika. Ho tontosa an-tsakany sy an-davany amin’izay ny asa nankinina tamin’ireny “lehilahy ho fanomezana” ireny, ka ho tanteraka ny Efesianina 4:15 manao hoe: “Milaza ny marina isika, ka aoka hitombo amin’ny zava-drehetra amin’ny alalan’ny fitiavana mba hifanaraka amin’ny loha, dia i Kristy.”