Ampiasao Tsara ny Boky Fandresen-dahatra
1 Tianao ve raha mahay mandresy lahatra kokoa ianao, rehefa mampiasa Baiboly? Efa nisy olona nametraka fanontaniana taminao ve teny am-panompoana, ka tsy hainao tsara ny namaly azy? Azo antoka àry fa faly be ianao satria nahazo ny boky Fandresen-dahatra Miorina Amin’ny Soratra Masina. Ampiasainao foana ve io boky tena tsara io mba ‘handresen-dahatra’, sy ‘hanazavana’, ary ‘hanaporofoana’ fa miorina amin’ny Soratra Masina ny zavatra ampianarinao?—Asa. 17:2, 3.
2 Misy fampidiran-dresaka tsara dia tsara eo am-piandohan’io boky io. Nahoana raha mijery ny sasany amin’ireo, alohan’ny handehanana hitory? Misy azonao ampiasaina ve izy ireo, na amboarina kely mba hifanaraka amin’ny zava-misy? Azo antoka fa hanampy anao izany mba hanovaova sy hanatsara ny zavatra lazainao. Ary ahoana raha efa eny am-pitoriana ianao ka hitanao fa tsy tena mahaliana ny fampidiran-dresakao? Topazo maso ny boky Fandresen-dahatra vao mankeny amin’ny varavarana manaraka. Angamba koa mitovy foana ny fomba fanoheran’ny olona itorianao. Mba hanohizana ilay resaka, dia jereo ireo soso-kevitra manomboka eo amin’ny pejy 15.
3 Ary ahoana raha tsy azon’ny olona ny zavatra hazavainao rehefa miverina mitsidika ianao, na mampianatra Baiboly? Misy fanontaniana voafaritra tsara sy fanoharana be dia be ao amin’ny boky Fandresen-dahatra. Afaka manampy anao izy ireny mba hanohinana ny fon’ilay olona. Jereo, ohatra, ilay fanoharana ao amin’ny pejy 132. Hazavain’izy io ny antony hamelan’i Jehovah ny faharatsiana hisy.
4 Afaka mampiasa ny boky Fandresen-dahatra koa ianao, rehefa hanampy mpianatra Baiboly hanova ny fiainany mba hampifaliany an’i Jehovah. Mety hisy lehilahy sy vehivavy miray trano, ohatra, nefa mbola tsy mpivady ara-dalàna. Ao amin’ny pejy 165-166 no ahitana izay lazain’ny Baiboly momba izany. Angamba koa tsy mety afaka amin’ny sigara na paraky ny olona ampianarinao. Misy lohateny hoe “Zava-mahadomelina” ao amin’ilay boky. Hazavainy ao fa manimba io fahazaran-dratsy io, ka tokony hifady azy io ny Kristianina, raha ny Baiboly no jerena.
5 Manao ady ara-panahy isika satria manafaka an’ireo olona vonton’ny fampianaran’ny fivavahan-diso. Manampy antsika hahay hampiasa “ny sabatry ny fanahy” ny boky Fandresen-dahatra. (Efes. 6:17; 2 Kor. 10:4, 5) Na manana fiadiana tena mahery aza mantsy ny miaramila, dia tsy misy dikany izany raha tsy ampiasainy ilay izy na tsy hainy mampiasa. Enga anie isika rehetra hampiasa foana ny boky Fandresen-dahatra! Ho vonona hiaro sy hampandroso ny asa fitoriana isika amin’izay.