Atombohy sy Farano Ara-potoana ny Fivoriana
1 Tokony hatomboka sy hofaranana ara-potoana ny fivorian’ny kongregasiona rehetra, anisan’izany ny fivoriana alohan’ny fanompoana. Nahoana? Ahitana taratry ny filaminana sady fanehoam-piheverana ny mpanatrika sy ny mpandray anjara rehetra amin’ny fivoriana, ny fanaovan-javatra ara-potoana. (Mpit. 3:17b; 1 Kor. 14:33) Afaka mampiseho isika fa mihevitra izany, amin’ny fanarahana ireto toro lalana manaraka ireto, mba hahazoana antoka fa manomboka sy mifarana ara-potoana ny fivoriana.
2 Tokony hiezaka foana isika mba ho tonga aloha tsara, ka hanam-potoana hifampiresahana sy hanaovana izay zavatra tena ilaina ary handraisana anjara amin’ny hira sy ny vavaka fanokafana. Amin’ny ankapobeny dia dimy minitra no atokana ho an’ny hira sy ny vavaka. Tokony hieritreritra ny zava-kendren’ny fivoriana ireo misolo tena ny kongregasiona amin’ny vavaka, ka ho hita taratra amin’izay lazainy ao amin’ny vavaka fanokafana sy famaranana izany. Tokony ho fohy anefa ilay vavaka.
3 Fivoriana ho An’ny Besinimaro: Voafetra ho 45 minitra ny lahateny ho an’ny besinimaro. Raha mihoatra ny fotoana voafetra izy io dia mety hisy fiantraikany eo amin’ny Fianarana Ny Tilikambo Fiambenana, izay atao aoriany. Tokony ho vita ao anatin’ny adiny roa ireo fivoriana roa ireo, miaraka amin’ny hira sy ny vavaka.
4 Fianarana Ny Tilikambo Fiambenana: Adiny iray no natokana ho an’ny Fianarana Ny Tilikambo Fiambenana, miaraka amin’ny famakiana ny fehintsoratra rehetra sy fandinihana ny fanontaniana ho famerenana. Raha tsinjarain’ilay mpitarika mifanaraka amin’ny fotoana ananany ilay fianarana, dia hanampy azy izany mba tsy handany fotoana be loatra amin’ny tapany voalohany ka hamita maimaika fotsiny ny tapany farany.
5 Sekolin’ny Fanompoana: Maharitra 45 minitra io fivoriana io. Mety hitsitsy fotoana kokoa raha toa ny mpianatra rehetra mipetraka eny akaikin’ny lampihazo, ary samy mamarana ny anjarany haingana rehefa tapitra ny fotoana natokana ho azy.
6 Fivoriana Momba ny Fanompoana: Maharitra 45 minitra koa izy io. Io fivoriana io, miaraka amin’ny Sekolin’ny Fanompoana ary ny hira sy ny vavaka, izany hoe ilay fandaharana manontolo, dia tsy tokony hihoatra ny adiny iray sy dimy amby efapolo minitra.
7 Fianarana ny Boky: Adiny iray io fivoriana io, miaraka amin’ny vavaka fanokafana sy ny vavaka famaranana. Tokony hovakina daholo ny fehintsoratra rehetra.
8 Fivoriana Alohan’ny Fanompoana: Tsy tokony hihoatra ny 15 minitra izy ireny, tafiditra amin’izany ny fitsinjarana ny faritany sy ny vavaka famaranana.
9 Isika rehetra no mandray soa avy amin’ny hanombohana sy hamaranana ara-potoana ny fivoriana. Mankasitraka izany indrindra ireo manana vady tsy mitovy finoana aminy, izay efa miandry azy ireo any an-trano. Rehefa manao fandaharana ny amin’ny hanaterana sy hakana azy avy any am-pivoriana ireo avy ao amin’ny fianakaviana voazarazara, na rehefa milaza izy hoe amin’ny firy izy no ho tafaverina ao an-trano, dia tsara raha eritreretiny ny fotoana ilaina mba hifampiresahana aloha sy aorian’ny fivoriana, ny fotoana hakany boky sy gazety, sy ny zavatra hafa koa. Tsy iadian-kevitra fa mandray anjara amin’ny fanaovana ny zavatra rehetra “amin’ny fahamendrehana sy ny filaminana”, ny fanombohana sy famaranana ara-potoana ny fivoriana.—1 Kor. 14:40.