Aoka Ianao Hanohina ny Fon’ny Olona Ampianarinao
1 Talohan’ny niakarany tany an-danitra, i Jesosy dia nilaza tamin’ny mpianany mba hampianatra ny olona “hitandrina” izay rehetra nandidiany. (Matio 28:19, 20) Matoa ny olona iray manomboka ‘mitandrina’ ny didin’i Kristy, dia satria nanohina ny fony ilay hafatra. (Sal. 119:112) Ahoana no ahafahanao manohina ny fon’ny olona iray miara-mianatra ny Baiboly aminao?
2 Mivavaha mba hahazo ny fitarihan’i Jehovah: Asan’Andriamanitra ny fanaovana mpianatra. Tsy ny fahaizantsika, fa ny fitahian’Andriamanitra no ilaintsika mba hahombiazana (Asa. 16:14; 1 Kor. 3:7) Tena ilaina àry ny mivavaka mba hahazoana ny fanampian’i Jehovah, rehefa mampianatra ny olona ny fahamarinana—Isaia 50:4.
3 Fantaro ny zavatra inoan’ilay olona: Raha fantatsika izay inoan’ny olona sy ny antony mahatonga azy hino izany, dia ho hitantsika izay tokony holazaina mba hanohinana ny fony. Nahoana izy no tia fampianarana manokana iray? Inona no mampiaiky azy fa azo inoana izany fampianarana izany? Mety hanampy antsika hahafantatra izay tokony holazaina ny fahalalana zavatra toy izany—Asa. 17:22, 23.
4 Manomeza porofo lojika sy araka ny Soratra Masina: Tokony hazava amin’ny mpianatra ny fahamarinana. (Asa. 17:24-31) Tokony hanome antony marim-pototra ny amin’ny fanantenantsika isika. (1 Pet. 3:15) Ataovy amin-katsaram-panahy sy faharetana foana anefa izany.
5 Hamafiso amin’ny ohatra: Sady mora azo kokoa ho an’ny mpianatra ny fianarana rehefa misy fanoharana, no manaitra ny fihetseham-pony koa. Miantraika amin’ny fo sy ny saina ireny fanoharana ireny. Nampiasa azy ireny matetika i Jesosy. (Marka 4:33, 34) Mazava ho azy fa tsy maintsy mifanaraka amin’ilay dinidinika ny ohatra ampiasaina, raha tiana handaitra, sady tokony hifandray amin’ny fiainan’ilay mpianatra.
6 Asehoy ny soa azo amin’ny fanekena ny fahamarinana: Tian’ny olona ho fantatra hoe inona ny soa azo amin’ny fampiharana izay ianarany. Ampio ilay mpianatra hahita fa marina ny tenin’i Paoly ao amin’ny 2 Timoty 3:14-17.
7 Aza kivy raha misy tsy mandray tsara ny fampianaranao. Tsy vonon-kandray avokoa akory ny fo rehetra. (Matio 13:15) Misy tonga mpino ihany anefa ny sasany. (Asa. 17:32-34) Miezaka hanohina ny fon’ny olona amin’ny vaovao tsara ianao. Enga anie izany ka hanampy olona maro kokoa hanaiky sy ‘hitandrina’ izay nandidian’i Jesosy.