Valin’ny Fanontanianareo

● Isaky ny hafiriana ireo mpianatra no tokony homena anjara amin’ny Sekolin’ny Fanompoana Teokratika?

Iray amin’ireo zava-kendren’ny Sekolin’ny Fanompoana Teokratika lehibe indrindra dia ny hampandroso ireo mpandahateny ampahibemaso. Ho an’izay antony izay, ny fandaharan’ny Sekolin’ny Fanompoana Teokratika dia nomanina ho an’ny ankamaroan’ireo lahateny natokana ho an’ireo rahalahy.

Na dia izany aza, ny iray hafa koa amin’ny zava-kendrena lehibe amin’ny Sekoly dia ny hanomana ireo vahoakan’i Jehovah rehetra ho tonga mpitory mahavokatra sy ho mpampianatra eo amin’ny fanompoana kristiana. Noho io antony io, dia mety ho an’ireo anabavy ny misoratra anarana koa.

Mba handraisan-tsoa feno amin’ny Sekoly, ireo nisoratra anarana dia tokony hahazo tsy tapaka ny taratasy fanomezana anjara. Ampahatsiahivina fa ny mpianatra tsirairay dia handray anjara, fara fahakeliny indray mandeha isaky ny telo volana. Raha mamela ny toe-javatra eo an-toerana, dia azo atao ny manome fanendrena fanampiny an’ireo rahalahy. Tsy ilaina ho an’ireo loholona izay manome toromarika tsy tapaka momba ny lahateny, sy fanazavana ny hevi-dehibe ao amin’ny Baiboly ny hotendrena ho mpianatra hanao lahateny koa.

Nandritra ny efa ho antsasaky ny taonjato, ny Sekolin’ny Fanompoana Teokratika dia nanampy olona an-tapitrisany maro hanao fandrosoana ara-panahy sy hianatra ny hoe ahoana no hilazan’izy ireo hevitra amin’ny fomba tsaratsara kokoa rehefa manambara ny hafatra momba ilay Fanjakana.

Ampirisihina ny rehetra mba hampiasa amin’ny fomba feno io fandaharana mahatalanjona avy amin’i Jehovah Andriamanitra io. Ny zava-kendrentsika dia tokony ho ny hanolotra ny tenantsika mba hankasitrahan’Andriamanitra, ho mpiasa “tsy mahazo henatra, mizara tsara ny teny fahamarinana.” — 2 Tim. 2:15.