Tohino ny Fon’ny Olona Miara-Mianatra Baiboly Aminao
1 Irinao ve ny hanaovan’ny olona miara-mianatra Baiboly aminao zavatra mifanaraka amin’izay ianarany? Tsy maintsy manao toy izany izy raha ta handray soa avy amin’ny fahalalana azony. Mba hahatonga ilay olona miara-mianatra Baiboly aminao ho voatosika hanao zavatra, dia tsy maintsy tohininao ny fony. Tamin’ny andro Pentekosta taona 33 am.f.i., ny lahateny nandrisika nataon’ny apostoly Petera dia ‘nanindrona ny fon’ny’ olona teo amin’ny 3 000 teo ho eo, izay “nandray tsara ny teniny” ka natao batisa tamin’io andro io. (Asa. 2:37, 41). Ahoana no ahafahanao manohina ny fon’ilay olona miara-mianatra Baiboly aminao?
2 Miomàna amin’ny fomba feno: Aza manandrana mandinika zavatra be dia be ka tsy hisy afa-tsy fotoana kely sisa hiaraha-manjohy hevitra amin’ilay mpianatra momba ilay fanazavana. Fidio mialoha ireo hevitra hohamafisinao, ary aoka ho azonao antoka fa takatrao sady azonao ampiharina amin’ny fomba mandaitra ireo andinin-teny. Diniho mialoha ireo fanontaniana mety ho tonga ao an-tsain’ilay mpianatra noho ny fiaviany. Raha mahalala tsara ilay olona ampianarinao ianao, izany fahalalana izany dia hanampy anao hiomana amin’ny fanazavana izay hifanentana aminy indrindra.
3 Tahafo ny fomba fampianatr’i Jesosy: I Jesosy dia nampiasa fanoharana mba hanatsorana ireo hevitra sarotra sy hanampiana ny mpianany hahazo ny hevitra ary hahatsapa ny fihetseham-po amin’ny tarehin-javatra iray. (Lioka 10:29-37). Tahaka izany koa, dia azonao atao ny mandatsaka ao am-pon’ilay olona miara-mianatra Baiboly aminao fampianarana tsara dia tsara, amin’ny fihazonana ho tsotra ireo fanoharana ampiasainao, amin’ny fakana azy ireny avy amin’ny zavatra fahita eo amin’ny fiainana, ary amin’ny fampiharana azy ireny amin’ny fomba voafaritra tsara amin’ny toe-javatra misy ilay mpianatra.
4 Mahasoa indrindra ireo fanontaniana, amin’ny fanohinana ny fon’ireo mpianatra ny Baiboly, araka ny nasehon’i Jesosy matetika. (Lioka 10:36). Nefa, aoka ianao tsy ho afa-po raha mamaky fotsiny ny valin-teny avy ao amin’ny boky ilay mpianatra. Mampiasà fanontaniana fitarihana ny saina mba hitarihana azy ho amin’ny famaranan-kevitra izay mety ho tsy noheveriny teo aloha. Manampy ilay mpianatra hampitombo ny fahaizany mieritreritra koa izany fomba fanao izany. Manaova fanontaniana hahalalana fomba fihevitra mba hahafantarana izay heveriny manokana momba ny raharaha iray. Ho afaka hanavaka ireo lafiny izay ilany fanampiana ianao avy eo, ka ho afaka hanohy hatramin’ny farany amin’ny fitondrana fanampiana manokana kokoa.
5 Raha tsy mandroso ny mpianatra Baiboly iray, dia ilainao ny mitarika azy hamoaka ny antony. Mety ho tafiditra amin’izany ny fanaovana fitsidihana amin’ny fotoana hafa ankoatra ny fotoam-pianarana mahazatra. Nahoana izy no misalasala hanao zavatra? Misy hevitra sasany araka ny Soratra Masina tsy azony ve? Tsy vonona hitondra fanamboarana sasany eo amin’ny fomba fiainany ve izy? Raha toa ny mpianatra Baiboly iray mitady ‘hiroaroa saina’, dia ampio izy mba hahatakatra fa mampidi-doza ny fanaovana toy izany. — 1 Mpanj. 18:21.
6 Takatry ny apostoly Paoly fa ny fampianarana an’ireo olona liana ny fahamarinana ao amin’ny Baiboly dia asa famonjena aina, ary noho izany izy dia nanoro hevitra ny Kristiana rehetra mba ‘hitandrina hatrany ny fampianarany’. (1 Tim. 4:16). Tsy maintsy mahatakatra mihoatra noho ireo zava-misy ao amin’ny Baiboly sy ireo fisehoan-javatra eo amin’izao tontolo izao fotsiny, ireo olona itarihanao fampianarana Baiboly. Tsy maintsy mahazo fahalalana araka ny marina momba an’i Jehovah sy i Jesosy izy ireny ary ampiana mba hampitombo fifandraisana mafana manokana amin’izy ireo. Amin’ny fanaovana izany ihany no hahavoatosika azy ireny hampiseho ny finoany amin’ny asa. (Jak. 2:17, 21, 22). Rehefa voatohina ny fon’ilay mpianatra, dia ho voatosika hanaraka ny lalana izay hanome voninahitra an’i Jehovah izy ary hiaro ny ainy mihitsy. — Ohab. 2:20-22.