Ampitomboy ny Fahalianana Amin’ny Fanjakam-piadanan’Andriamanitra
1 Mandritra ny volana Febroary isika dia hanasongadina ny boky Azonao Atao ny Hiaina Mandrakizay ao Amin’ny Paradisa eto An-tany. Ny zava-kendrentsika dia tokony ho ny hanampy ireo olona mahitsy fo hampitombo fankasitrahana ny Fanjakan’Andriamanitra sy izay hotanterahin’izy io. Afaka manampy antsika ho amin’izany ny fanontaniana hahalalana fomba fihevitra.
2 Aorian’ny fiarahabana amim-pisakaizana, dia mety hilaza zavatra sahala amin’izao isika:
◼ “Mitranga eran-tany ireo fiovana manaitra eo amin’ny fitondram-panjakana, ary resahina matetika ny tanjona ho amin’ny fandriampahalemana. Heverinao ve fa ho azo ny tena fandriampahalemana indray andro any? [Avelao izy hamaly.] Na dia maro aza no miantehitra amim-panantenana amin’ireo mpanapaka olombelona mba hitondra fandriampahalemana, dia mariho ny fomba ampanantenan’Andriamanitra hitondra fandriampahalemana, araka ny resahina ao amin’ny Salamo 46:9. [Vakio.] Fiovana eto an-tany inona avy no heverinao fa hoentin’ny asan’Andriamanitra? [Henoy ny valin-tenin’ilay tompon-trano, ary avy eo dia asehoy ilay taratasy mivalona hoe Fiainam-piadanana ao Amin’izao Tontolo Izao Vaovao.] Afaka maka sary an-tsaina izay aseho an-tsary eto ve ianao?” Diniho ilay fanazavana eo ambanin’ilay lohatenikely hoe “Ny fiainana eo amin’izao tontolo izao vaovaon’Andriamanitra”. Raha mamela ny toe-javatra, dia azo dinihina ny fanazavana fanampiny avy ao amin’ny boky Fanjohian-kevitra, pejy faha-194-199, eo ambanin’ilay fanontaniana hoe “Inona no hataon’ny Fanjakan’Andriamanitra?” Mety hamarana ilay resaka isika amin’ny fanontaniana hoe: “Heverinao ve fa hitondra ireo fiovana ireo ny fitondram-panjakana iray entin’Andriamanitra?” Raha maneho fahalianana ilay tompon-trano, dia tokony hisy fandaharana hatao ho amin’ny fiverenana mitsidika.
3 Na mety hilaza isika hoe:
◼ “Betsaka ny fanahiana aseho ny amin’ireo zava-manahirana mampikorontan-tsaina tsy maintsy alamintsika rehetra isan’andro isan’andro. Heverinao ve fa mba misy ihany fanantenana fanafahana amin’ireny zava-manahirana ireny? [Avelao izy hamaly.] Ny sasany mety hieritreritra fa tsy miraharaha izay manjo antsika Andriamanitra. Mariho anefa izay ampanantenainy toy izao ao amin’ny Apokalypsy 21:3, 4.” Vakio ireo andinin-teny. Eto dia azo aseho ny boky Hiaina Mandrakizay na ny gazety iray vao haingana, na ilay taratasy mivalona hoe Ho Tafita Velona ve Ity Tontolo Ity? Raha ny taratasy mivalona no atolotra, dia azo dinihina ny fanazavana eo amin’ny pejy faha-2 sy faha-3, eo ambanin’ny lohateny hoe “Ny hoavin’ity tontolo ity”. Raha misy fahalianana miseho, dia mety hanapa-kevitra ianao hoe zavatra vita an-tsoratra hafa inona no hatolotra. Raha manolotra ilay bokikely hoe Tena Miahy Antsika ve Andriamanitra? ianao, dia azo apoitra izao fanontaniana izao: “Nahoana Andriamanitra no namela ny fijaliana hisy?” Tariho ny sainy ho amin’ny fizarana faha-6 amin’ilay bokikely, ary manaova fandaharana ny amin’ny handinihana azy io amin’ny fitsidihana manaraka.
4 Mety hifidy ny hanasongadina lahatsoratra iray avy amin’ny iray amin’ireo gazety vao haingana ianao, amin’ny fanazavana hevitra voafaritra iray ao amin’ny lahatsoratra iray nofidina.
Raha maneho fahalianana ilay tompon-trano, dia asehoy ilay gazety, angamba amin’ny filazana hoe:
◼ “Miresaka amin’ny an-tsipiriany kokoa momba ilay foto-kevitra itỳ lahatsoratra itỳ. [Mamakia fehezanteny iray na roa efa nofidina mialoha.] Ilay lahatsoratra dia manome hevitra fanampiny izay hita fa hampahery anao sy ny fianakavianao. Koa satria toa liana amin’ilay foto-kevitra ianao, dia ho faly izahay hametraka aminao itỳ nomerao itỳ sy ilay gazety namany.”
5 Ny olona amin’izao andro izao matetika dia very hevitra raha ny amin’ny fahafantarana hoe aiza no hitodihana mba hahazoana valiny ny amin’ireo zava-manahirana atrehin’ny taranak’olombelona. Isika dia manana ny tombontsoa mizara amin’izy ireny fanantenana mazava momba ny hoavy. (Asa. 17:27). Enga anie àry isika hitarika amim-paharisihana ny sain’ny olona ho amin’ny Fanjakan’Andriamanitra, ilay tena loharanon’ny fiadanana.