Valin’ireo Fanontanianareo
◼ Ahoana no tokony hatao rehefa manantitrantitra ny tompon-trano iray mba tsy hitsidihan’ny Vavolombelon’i Jehovah intsony ny tokantranony?
Raha sendra hitantsika eo am-baravarana ny takelaka iray misy filazana mandrara amin’ny fomba hentitra ny fitsidihana manana endrika ara-pivavahana na manonona amin’ny fomba voafaritra tsara ny Vavolombelon’i Jehovah, dia mety ho tsara indrindra ny hanajana ny fanirian’ilay tompon-trano ka tsy handondonana.
Indraindray isika dia sendra takelaka misy filazana mandrara ny fidiran’ny mpivaro-mandeha na mpanao fangataham-bola. Koa satria isika manao asa fanaovan-tsoa ara-pivavahana, izany dia tsy tena mihatra amintsika. Ho tsara ny handrosoana sy handondonana eo amin’izany varavarana izany. Raha manohitra ilay tompon-trano dia afaka manazava amim-pahaiza-mandanjalanja isika ny antony tsy ahatsapantsika fa mihatra amintsika ny famantarana toy ireny. Raha manazava ilay tompon-trano amin’izay fa mahafaoka ny Vavolombelon’i Jehovah ilay fandrarana, dia hanaja ny faniriany isika.
Eo am-piasana ny faritany, dia mety ho hita fa tsy faly mihitsy ny tompon-trano iray ary hanantitrantitra mafy mba tsy hiverenantsika hitsidika ao aminy. Raha tsy azo ifanarahana izy dia tokony hanaiky ny fangatahany isika. Tokony hapetraka ao amin’ny valopy misy ny sarin’ny faritany ny fanamarihana iray misy daty mba tsy hitsidika ao amin’izany adiresy izany ireo mpitory izay hiasa ilay faritany amin’ny hoavy.
Tsy tokony hohalavirina tsy an-kijanona ny trano toy ireny. Ny olona mipetraka ao amin’izao fotoana izao dia mety hifindra. Mety hifandray amin’ny mpianakavy hafa iray izay manana fihetsika tsara isika. Mety hiova fo koa ilay tompon-trano izay niresaka tamintsika ka hankasitraka kokoa ny fitsidihantsika. Noho izany, aorian’ny fotoana voafetra, dia tokony hisy famotopotorana amim-pahaiza-mandanjalanja hatao ny amin’ny olona mipetraka ao, mba hamantarana ny fihetseham-pony amin’izay fotoana izay.
Tokony haverina hodinihina indray mandeha isan-taona ny tahirin-taratasy momba ny faritany, ka hatao lisitra ireo trano izay nangatahana antsika mba tsy hotsidihina. Eo ambany fitarihan’ny mpiandraikitra ny asa, dia hisy mpitory sasany za-draharaha sy mahay mandanjalanja ho azo tendrena mba hitsidika ny olona ao amin’ireny trano ireny. Azo hazavaina fa mitsidika ao isika mba hanontany raha mbola ilay tompon-trano iny ihany no mipetraka ao. Tokony hifankazatra tsara amin’ny fanazavana ao amin’ny boky Fanjohian-kevitra eo amin’ny pejy faha-15–24 mitondra ny lohateny hoe “Ny Fomba Famaliana Ireo Fanoherana”, ilay mpitory. Raha misy fihetsika azo heverina ho tsara, dia azo atao ny manao fitsidihana amin’ny fomba mahazatra amin’ny manaraka. Raha manohy manohitra ilay tompon-trano, dia tsy tokony hisy fitsidihana fanampiny hatao hatramin’ny taona hanaraka. Afaka manapa-kevitra ny fitambaran-doholona eo an-toerana raha tokony ho amin’ny fomba hafa no hitondrana ny zavatra, amin’ny tarehin-javatra manokana iray.