Fivoriana ho Amin’ny Asa Fanompoana Misy Heviny
1 Ao amin’ny Lioka 10:1-11 isika dia manana firaketana an-tsoratra momba ny fivoriana iray nataon’i Jesosy niaraka tamin’ireo mpianatra 70 vao nahazo fanendrena, mba hanampiana azy ireo hiomana ho amin’ny asa fanompoana. Nomeny toro lalana voafaritra tsara izy ireo mba hanampiana azy hahay handamin-javatra sy hiomana amin’izay holazainy ary hisetra ireo tarehin-javatra sarotra. Amin’ny fandinihana io fitantarana io, dia afaka mahazo fianarana isika.
2 Miharihary fa teo avokoa ireo mpianatra 70 tamin’ilay fivoriana niarahana tamin’i Jesosy. Be dia be ny fotoana lany amin’ireo fivoriana ho amin’ny asa fanompoana rehefa zatra ny tonga tara ny olona sasany. Mazàna ny fahatongavany aorian’ny fotoana dia mahatonga ny ilana handamina indray ny antokon’olona ary koa ny fitsinjarana faritany. Mahatonga ilay antokon’olona manontolo ho diso fotoana izany matetika. Isika rehetra dia afaka manao ny anjarantsika amin’ny fahatongavana ara-potoana sy amin’ny fivononana handeha haingana ho eny amin’ny faritany.
3 I Jesosy dia nanome foto-dresaka voafaritra tsara mba hampiasain’ilay antokon’olona, dia “ny fanjakan’Andriamanitra”. (Lioka 10:9). Nahazo fanendrena hitory io hafatra io ihany koa isika, ary ankasitrahantsika mazàna ireo fanoloran-kevitra mahasoa sasany momba izay tokony holazaintsika. Angamba ilay mpitarika hanintona ny saina ho amin’ny boky Fanjohian-kevitra, izay manolotra fampidiran-dresaka samy hafa maherin’ny 40 sy andinin-teny ao amin’ny Soratra Masina mifanentana izay azo ampiasaina amin’ny tarehin-javatra maro samihafa. Ny famerenana fohy ny fomba fampiseho iray na roa dia afaka manampy antsika hanan-javatra ao an-tsaina holazaina, ka hahatonga antsika ho afaka hiteny amin-toky kokoa eny am-baravarana.
4 Tsy nilaza tamin’ny mpianany fotsiny izay tokony holazainy i Jesosy fa nilaza taminy koa ny fomba tokony hilazana izany. (Lioka 10:5, 6). Ireo fampisehoana asongadina amin’ny fandaharan’ny Fivoriana Momba ny Asa dia mampiseho amintsika ny fomba ahafahana miresaka amin’ny fomba mandaitra. Mety handinika indray izay naseho tamin’ny fivoriana farany ilay mpitarika, ka hanome fanoloran-kevitra ny amin’ny fomba azo ampiasana izany eny amin’ny fanompoana amin’io andro io. Ny fampisehoana fohy iray voaomana, momba ny fomba fampiseho tsotra araka ny Soratra Masina, dia afaka manampy antsika hanambatra ireo hevitsika sy hanambara izany amin’ny teny.
5 Nanome toro lalana ny mpianany momba ny fihetsik’izy ireo manokana koa i Jesosy. (Lioka 10:7, 8). Tahaka izany koa, ilay mpitarika dia mety hanome toromarika mety indrindra mba hanampiana antsika hanalavitra izay mety hanelingelina eo amin’ny asa ataontsika. Mety hanoro hevitra antsika izy tsy hitangorona eny an-joron-dalana na handanilany fotoana hiadiana hevitra amin’ny mpanohitra. Mety hampahatsiahy antsika ny ilana hitazonana fandraisana an-tsoratra isan-trano araka ny marina izy. Mety hila fampahatsiahivana momba ny fanaraha-maso amim-pitandremana ireo zanany ny ray aman-dreny.
6 Nifarimbona ireo mpianatra 70 niasa nifanaraka tamin’ireo toro lalana nomen’i Jesosy ary taorian’izany dia “niverina tamin’ny fifaliana”. (Lioka 10:17). Raha manaraka ny fitarihana raisina any amin’ireo fivoriana ho amin’ny asa fanompoana isika, dia ho afaka hanantena hahazo fifaliana mitombo koa, rehefa mitory ny hafatra momba ilay Fanjakana. — Asa. 13:48, 49, 52.