Valin’ny Fanontanianareo

◼ Inona avy no zavatra ilaina hotandremana mahakasika ny fitaovana hoentina eny amin’ny asa fitoriana?

Na dia manana hevitra mety tsara ary araka ny Soratra Masina ao an-tsainy aza ny mpitory iray, dia mety tsy ho niomana izy raha ny amin’ny fitaovana ampiasainy. Rehefa eny am-baravarana izy vao mety hahita fa tsy ananany akory ny zavatra atolotra amin’ny volana. Mety hiforiporitra, ho rovidrovitra na haloto mihitsy aza ny Baiboliny, ny gazety, ny bokikely ary ny taratasy mivalona ao anaty kitapony. Mety tsy ho hitany ny pensilihazo na ny fandraisana an-tsoratra isan-trano, satria tsy milamina tsara ny ao anaty kitapony. Tena zava-dehibe ny handinihana amim-pitandremana ny fitaovana ampiasanao, alohan’ny handraisana anjara amin’ny fanompoana eny amin’ny saha.

Inona avy no tokony ho ao anatin’ny kitapo iray voaomana tsara ho amin’ny fitoriana? Tsy maintsy ao ny Baiboly. Tsy maintsy madio sy ara-dalàna izy io. Asio taratasy fandraisana an-tsoratra isan-trano ampy tsara, madio sy ara-dalàna koa. Ataovy azo antoka fa manana ilay zavatra vita an-tsoratra hasongadina amin’ny volana ianao. Ilaina koa ny nomerao faramparany amin’ny gazety, ary koa taratasy mivalona sy bokikely. Tsy maintsy madio sy mbola tsy misy simba koa ireny zavatra vita an-tsoratra ireny. Mitondrà boky Fanjohian-kevitra. Ny fitondranao Ny Fanompoantsika Ilay Fanjakana farany indrindra, dia hamela anao hijery indray ireo fomba fampiseho anoloran-kevitra, alohan’ny hanatonana ny varavarana.

Tokony hilamina tsara ao anaty kitaponao sy hadio ny zavatra rehetra ampiasaina. Tsy voatery ho vaovao ilay kitapo, nefa tokony hadio sy mbola tsy hisy simba izy io. Anisan’ny fitaovana ampiasaina mba hanambarana ny vaovao tsara ny kitaponao fitondra mitory. Kojakojay tsara izy io.