Ampiasao Amin’ny Fomba Tsara ny Fotoananao
1 Mahatsapa ny fandehan’ny fotoana i Jehovah. Maniry antsika mba hahatsapa ny fandehan’ny fotoana koa izy. Amin’ny alalan’ny fandaminany dia manampy antsika mba hahatsapa ny fandehan’ny fotoana izy. Ampirisihina mafy isika mba hanan-javatra ‘be dia be hatao foana amin’ny asan’ny Tompo’. (1 Kor. 15:58, NW). Amin’izany fomba izany no ahafahantsika mahita vokatra kokoa eo amin’ny fanompoana an’i Jehovah.
2 Ny tsirairay avy amintsika dia manana habetsaham-potoana mitovy isan-kerinandro — 168 ora. Ahoana no ampiasantsika tsara ny fotoanantsika? Asehontsika ve fa tena fantatsika hoe amin’ny firy izao raha araka ny fomba fijerin’i Jehovah? Moa ve isika voahelingelin’ny fanaovan-javatra tsy tena ilaina?
3 Zava-dehibe ny hahaizantsika mandamin-javatra tsara. Miezaka ny hihazona lisitra iray misy ny zavatra homena ny laharam-pahamehana ny maro. Ny zavatra tsirairay avy dia atao ao anaty lisitra arakaraka ny maha-zava-dehibe azy. Ahoana no ahafahana mamaritra izany? Ny Baiboly dia milaza fa ny lehilahy iray dia tokony ho “finaritra amin’ny fisasarany rehetra”. (Mpit. 3:13). Ny asa sasany dia mitondra vokatra tsara kokoa noho ny hafa. Eritrereto izay ho vokatra hoentin’ny tsirairay avy aminy. Hisy voka-tsoa misy heviny ve hateraky ny famitana ilay asa? Ho “finaritra” amin’ny fisasaranao ve ianao? Raha tsy izany, dia mety ho asa tsy azo omena ny laharam-pahamehana voalohany izany.
4 Eo amin’ny fanompoantsika: Ankasitrahantsika rehefa tonga ara-potoana ny hafa amin’ireo fivoriana ho amin’ny fanompoana ka mihaino amim-pitandremana ireo toromarika ary miainga avy hatrany ho eny amin’ny faritany. Aleontsika ho sahirana amin’ny fitoriana toy izay amin’ny fiandrasana. Miharihary fa i Paoly dia tena nahatsapa ny ilana ny fandaminan-javatra tsara rehefa nanoratra hoe: “Aoka ny zavatra rehetra hatao amin’ny fahamendrehana sy ny filaminana”. — 1 Kor. 14:40.
5 Rehefa eny amin’ny saha fanompoana isika, dia mety ho very fotoana sarobidy noho ny fiatoana mba hialana hetaheta na handraisana sakafo maivana. Kanefa, rehefa mampijaly ny toetr’andro, ny fiatoana kely dia hamelombelona antsika ka hanampy antsika hanohy hatrany. Tia kokoa ny ho sahirana hatrany amin’ny fanaovana fanambarana amin’ny olona anefa ny maro ka mandà ny fiarahana miala hetaheta na mandray sakafo maivana amin’ireo rahalahy, mandritra ny fotoana izay natokana ho amin’ny fanompoana. Ilaina ny fandanjalanjana.
6 “Na dia ny vano (...) aza dia mahalala ny fotoan’androny” hifindrany monina, ary ny vitsika dia “mamory ny haniny raha fahavaratra” mba hiomanany ho amin’ny ririnina, hoy ny Baiboly. (Jer. 8:7; Ohab. 6:6-8). Izany no fanalahidin’ny fampiasana amin’ny fomba tsara ny fotoana. Isika koa dia tsy maintsy ‘mahalala ny fotoan’androntsika’. Na dia tsy ho henjana loatra aza isika, dia tokony hahatsapa ny fandehan’ny fotoana. Mila mahalala, tsy izay tsy maintsy ataontsika fotsiny isika fa koa ny hoe rahoviana no mila vitaina izany. Tokony hanana fahazarana ny hieritreritra mialoha isika, ka hamela ny hisian’ny mety ho fampihemorana fotoana. Ary tokony ho vonona hampihena ny fanaovan-javatra sasany koa isika mba hisian’ny fotoana ho an’ny zavatra lehibe kokoa, toy ny fanomanana ireo fivoriantsika sy ny fanompoana eny amin’ny saha ary ny fanaovan-javatra teokratika hafa.
7 Maniry isika ny ho tahaka ilay Raintsika any an-danitra, Jehovah Andriamanitra, izay mampianatra antsika fa ‘ny zavatra rehetra dia samy manana ny fotoany avy’. (Mpit. 3:1). Amin’ny fampiasana amin’ny fomba tsara ny fotoanantsika, dia ho afaka ‘hanatanteraka amin’ny fomba feno ny fanompoantsika’ isika. — 2 Tim. 4:5, NW.