Aoka Ianareo ho Mpampianatra ny Tenin’Andriamanitra — Amin’ny Fampiasana Bokikely
1 Manana andraikitra handray anjara amin’ny asa fampianarana ny Tenin’Andriamanitra amin’ny hafa ny mpanompon’i Jehovah nanolo-tena rehetra. Manjary mazava ny maha-zava-dehibe io andraikitra io rehefa takatsika fa ilay manana ny fahefana rehetra any an-danitra sy eto an-tany no naniraka antsika ‘hanao mpianatra ny firenena rehetra sady hampianatra azy’. (Matio 28:18-20). Koa ny fandraisana anjara amin’ny fitoriana ny vaovao tsara àry dia mitaky ny hahatongavantsika ho mpampianatra! — 2 Tim. 2:2.
2 Mandritra ny Aogositra dia afaka mampiasa ny fahaizantsika mampianatra isika rehefa manolotra bokikely. Afaka mifantina hevitra araka ny Soratra Masina mahaliana sasany ao amin’izy ireny isika, ka manomana fanazavana vitsivitsy izay hanampy antsika hanombo-dresaka.
3 Rehefa manolotra ny bokikely “Tena Miahy Antsika ve Andriamanitra?”, dia azonao atao ny milaza hoe:
◼ “Nitsidika ny maro amin’ireo mpiara-monina aminao izahay ka nahita fa manahy ny amin’ny firongatry ny heloka bevava sy ny fampihorohoroana ary ny herisetra izy ireo. Araka ny hevitrao, nahoana izany no nanjary zava-manahirana aoka izany? [Avelao ilay olona hamaly.] Mahaliana antsika manokana ny hoe nilaza mialoha ny hitrangan’izany ny Baiboly. [Vakio ny 2 Timoty 3:1-3.] Mariho fa tokony hitranga atỳ ‘am-parany’ izany. Milaza tsy mivantana izany fa misy zavatra madiva hifarana. Araka ny hevitrao, inona izany?” Avelao ilay olona hamaly. Avadiho ho eo amin’ny pejy faha-22 ilay bokikely, asehoy ilay sary ary miaraha midinika andinin-teny iray na roa voatonona eo amin’io pejy io. Manaova fandaharana ny hiverina any aoriana mba hanazava ny antony inoantsika fa antomotra ireo fitahiana ireo.
4 Mety ho tianao ny hampiasa itỳ tari-dresaka itỳ rehefa manolotra ny bokikely “Inona no Zava-kendren’ny Fiainana? — Ahoana no Mety Hahitanao Azy Io?”:
◼ “Olona maro no mahita fahasahiranana amin’ny fiezahana hitady tena zava-kendrena iray eo amin’ny fiainana. Na dia misy aza vitsivitsy mahita fahasambarana voafetra, ny ankamaroan’ny olona dia manana fiainana feno fahadisoam-panantenana sy fijaliana. Heverinao ve fa izany no fomba nikendren’Andriamanitra ny hiainantsika? [Avelao ilay olona hamaly.] Asehon’ny Baiboly fa irin’Andriamanitra hiaina ao amin’ny tontolo iray tahaka itỳ isika.” Asehoy ny sary eo amin’ny pejy faha-21, ary avy eo dia avadiho ho eo amin’ny pejy faha-25 sy faha-26, fehintsoratra faha-4-6 ilay bokikely, ary hazavao hoe inona no nampanantenain’Andriamanitra. Apetraho itỳ fanontaniana itỳ mba hodinihina rehefa hiverina ianao: “Ahoana no ahafahantsika mahazo antoka fa hanatanteraka ireo fampanantenany Andriamanitra?”
5 Azonao atao ny manolotra ny bokikely “Mifalia Amin’ny Fiainana eto An-tany Mandrakizay!”, amin’ny fampisehoana ny sary manontolo eo amin’ny fonony aloha sy aoriana ka manontany hoe:
◼ “Ho tianao ve ny hiaina ao amin’ny tontolo iray feno olona sambatra tahaka izao? [Avelao ilay olona hamaly.] Milaza amintsika ny Baiboly fa tia ny olona Andriamanitra ary iriny izy ireo hiaina mandrakizay ao amin’ny fahasambarana eto an-tany.” Avadiho ho eo amin’ny sary nomerao faha-49 ilay bokikely, ary mamakia iray amin’ireo andininy ao amin’ny Soratra Masina voatonona eo. Avy eo dia asehoy ny sary nomerao faha-50, ary hazavao hoe inona no tsy maintsy ataontsika raha tiantsika ny hiaina ao amin’io Paradisa io. Manolora ny hiverina sy hiara-midinika ny antony maha-zava-dehibe aoka izany ny finoana an’i Jesosy Kristy.
6 Faly i Jehovah rehefa manao izay ‘hisehoan’ny fandrosoantsika isika amin’ny fitandremana ny fampianarantsika’. (1 Tim. 4:15, 16). Afaka manampy antsika tokoa ireo bokikelintsika eo amin’ny fiezahantsika hanampy ireo izay maniry fatratra ny handre “ny teny soa mahafaly”. — Isaia 52:7.