Mitaky Fampianarana Mandaitra ny Fiverenana Mitsidika Mahomby
1 Tapany lehibe sady mahafaly amin’ny fanompoantsika eny amin’ny saha ny fiverenana mitsidika. Nahoana isika no tokony hazoto hiverina hitsidika ireo olona liana? Ampahafantarina sy omem-boninahitra ny anaran’i Jehovah amin’ny alalan’io asa fanaovana mpianatra io, ary ampiana hahita ny lalana mankany amin’ny fiainana ireo olona matahotra an’Andriamanitra. (2 Kor. 2:17–3:3). Ny fahatakarana fa samy voakasika na ny fanamasinana ny anaran’i Jehovah na ny ain’ny hafa, dia tokony hanosika antsika hanomana tsara, alohan’ny hiverenana.
2 Hanampy ny mpianatra hanorina eo ambonin’ny fototra efa napetraka ny mpampianatra mahay iray. Tsy misy hafa amin’ny anorenan’ny mpampianatra iray any an-tsekoly eo ambonin’ny fahalalana azon’ny mpianatra isan’andro, dia toy izany koa fa mazàna ny fitsidihantsika voalohany no tokony harahintsika fanazavana fanampiny momba ilay foto-kevitra iny ihany. Miteraka fitohizan’ny hevitra sy fisainana mandroso izany.
3 Rehefa miverina ianao taorian’ny nametrahana ny bokikely “Tena Miahy Antsika ve Andriamanitra?”, dia mety ho hitanao fa mandaitra izao:
◼ “Tamin’ny fitsidihako teo aloha, dia niara-nidinika momba ny ‘andro farany’ voalaza ao amin’ny Baiboly sy izay hevitr’izany ho antsika, isika. Mety hanontany tena ianao hoe ahoana no ahafantarantsika fa miaina amin’ny andro farany isika. (2 Tim. 3:1, NW). Naniry mafy ny hahazo ny valin’io fanontaniana io ireo mpianatr’i Jesosy. [Vakio ny Matio 24:3.] Tao amin’ny valin-teniny, i Jesosy dia nilazalaza ireo toe-piainana hitantsika manodidina antsika amin’izao andro izao. Izy ireny dia mahafaoka ny fahoriana sy ny herisetra mbola tsy nisy toy izany.” Lazao ilay lafiny misongadina amin’ny famantarana dinihina eo amin’ny fehintsoratra faha-3 sy faha-4 eo amin’ny pejy faha-19 amin’ilay bokikely. Raha tsara ny fandraisana, dia lazao ireo lafiny misongadina hafa amin’ilay famantarana eo amin’ny fehintsoratra faha-5 ka hatramin’ny faha-8 eo amin’ny pejy faha-20. Manolora ny hiverina ka hamaly ireo fanontaniana mipetraka eo amin’ny fonon’ilay bokikely.
4 Mba hanolokoloana ny fahalianana tamin’ny bokikely “Inona no Zava-kendren’ny Fiainana — Ahoana no Mety Hahitanao Azy Io?”, dia azonao atao ny milaza hoe:
◼ “Naniry mafy ny hanohy indray ny resatsika momba ny zava-kendrena eo amin’ny fiainana aho. Heveriko fa samy manaiky isika fa nikendry ny hiainantsika eto an-tany ao anatin’ny toe-piainana mahasambatra sy feno fiadanana Andriamanitra, fa tsy ao anatin’ny fikorontanana hitantsika amin’izao andro izao. Heverinao ve fa hanatanteraka ny fampanantenany izy?” Avelao ilay olona hamaly. Vakio ny Isaia 55:11, ary avy eo dia iaraho midinika ireo hevitra eo amin’ny fehintsoratra faha-25 ka hatramin’ny faha-27 eo amin’ny pejy faha-30 amin’ilay bokikely. Manoroa hevitra hoe ny fianarana manokana ny Baiboly no fomba tsara indrindra hahitana zava-kendrena mendrika eo amin’ny fiainana.
5 Mba hanolokoloana ny fahalianana naseho teo aloha tamin’ny bokikely “Mifalia Amin’ny Fiainana eto An-tany Mandrakizay!”, dia azonao atao ny mampiseho azy io indray ka manao hoe:
◼ “Niresaka momba ilay tontolo kanto aseho an-tsary eto amin’ny fonon’itỳ bokikely itỳ isika. Tiako ny hilaza aminao ny antony maha-zava-dehibe aoka izany ny finoana an’i Jesosy Kristy ho an’ny olona izay maniry hiaina ao.” Avadiho ho eo amin’ny sary faha-41 ilay bokikely, ary vakio ny Isaia 9:5. Asio firesahana ny sary faha-62, ary vakio ny Jaona 3:16, amin’ny fanamafisana ny ilana fankatoavana. Hazavao fa ny Vavolombelon’i Jehovah dia manampy ny olona hianatra ny fomba anehoana finoana, amin’ny alalan’ny fianarana ny Baiboly sy ny fiezahana hiaina mifanaraka amin’ny torohevitr’izy io.
6 Aorian’ny fiverenana mitsidika tsirairay, dia fakafakao izy io amin’ny fikendrena ny hanatsara ny fahitanao vokatra. Manontania tena hoe: Nanana zavatra hentitra tao an-tsaina holazaina ve aho? Nitana ny saina hifantoka tamin’ny Baiboly ve aho? Nanorina teo ambonin’ilay fototra napetraka tamin’ny fitsidihana voalohany ve aho? Moa ve ny fomba fampiseho nataoko nokendrena hitarika ho amin’ny fampianarana Baiboly? Ny valiny hoe eny dia manome toky fa eo am-piezahana ny ho mpampianatra mahay ny Tenin’Andriamanitra ianao.