Miverena any Amin’ireo Izay Nampiseho Fahalianana
1 Rehefa namoaka ilay boky vaovao hoe Fahalalana Izay Mitarika ho Amin’ny Fiainana Mandrakizay ilay mpandahateny tamin’ny fivoriamben’ny distrika, dia nanazava fa “ireo mpianatra tso-po dia tokony ho afaka hianatra zavatra ampy amin’ny alalan’ny fianarana azy io, mba hiandaniana amin’i Jehovah sy hatao batisa”. Natao hampianarana ny fahamarinana haingana ilay boky. Manome fanazavana voafaritra amin’ny fomba voafintina izay afaka manosika ireo mpianatra hanao fandrosoana ara-panahy izy io. Mampiseho ny fahamarinana amin’ny fomba manorina izy io ka tsy mifantoka amin’ny fampianaran-diso. Mba hahitana fahombiazana amin’ny fampiasana io fitaovana vaovao io, dia tsy maintsy manao fiverenana mitsidika any amin’ireo izay nampiseho fahalianana isika.
2 Raha niresaka tamin’ny olona iray tsy ampy finoana an’Andriamanitra nefa nampiseho fahalianana ihany ianao, dia mety ho azonao atao ny hanomboka amin’ny fanokafana ilay boky eo amin’ilay sary eo amin’ny pejy faha-4 sy faha-5 ary hilaza hoe:
◼ “Fony aho teto farany, dia nijery itỳ sary mahafinaritra mampiseho faritra tsara tarehy itỳ isika. Manontany ilay fanazavana miaraka aminy hoe: ‘Inona no tsy maintsy ataonao mba hahazoana azy ireo?’ Ahoana no hamalianao izany? [Avelao ilay olona hamaly.] Ny Baiboly dia mampahafantatra mazava ny iray amin’ny zavatra takina fototra. [Vakio ny Jaona 17:3.] Tena ilaina amin’ny finoantsika an’Andriamanitra ny fahalalana. Ny fomba faran’izay tsara ahafahantsika mianatra izay ilaintsika ho fantatra dia ny fianarana ny Baiboly amin’ny fomba voalamina.” Avadiho ho eo amin’ny toko voalohany ary mariho ny sasany amin’ireo hevitra mampahery eo amin’ny fehintsoratra 1-5. Hazavao ny fomba itarihana fampianarana Baiboly iray, ary milazà fa hiverina indray ianao mba hanao resaka hafa koa.
3 Raha miverina mba hanohy ny resaka momba ny hoe nahoana Andriamanitra no mamela ny fijaliana hisy ianao, dia ho azonao atao ny hilaza hoe:
◼ “Fony aho teto farany, dia niresaka momba ny [ilay fisehoan-javatra] isika. Nipoitra ny fanontaniana hoe nahoana Andriamanitra no mamela ny fijaliana be toy izao hisy eto an-tany. Tonga tamin’ny fanatsoahan-kevitra hoe ahoana ianao? [Avelao ilay olona hamaly.] Mampahery ny mahafantatra fa tsy tompon’andraikitra amin’izao toe-piainana mampahory izao Andriamanitra.” Avadiho ho eo amin’ny pejy faha-71 sy faha-72 ilay boky hoe Fahalalana Izay Mitarika ho Amin’ny Fiainana Mandrakizay, ary miresaha momba ny sasany amin’ireo hevitra araka ny Soratra Masina voarakitra ao amin’ny fehintsoratra 3-5. Milazà fa hiverina indray ianao mba hanazava hoe nahoana no afaka matoky isika fa hifarana tsy ho ela ny famelan’Andriamanitra ny fijaliana hisy.
4 Raha miverina mitsidika ny ray na ny reny iray izay manahy ny amin’ny zava-manahirana ara-pianakaviana ianao, dia ho azonao atao ny hilaza hoe:
◼ “Fantatro fa, amin’ny maha-ray na reny anao, dia maniry ny tsara indrindra ho an’ireo zanakao ianao. Koa satria tsy afaka miaro azy ireo amin’izay zava-dratsy rehetra ianao, dia tsy maintsy mampianatra azy ny fomba hahazakana ireo zava-manahirana eo amin’ny fiainana. Ahoana no heverinao fa azo anaovana izany? [Avelao ilay olona hamaly.] Ny iray amin’ireo zavatra lehibe indrindra azon’ny ray na ny reny omena dia ny fampiofanana.” Avadiho ho eo amin’ny pejy faha-145 sy faha-146 ny boky Fahalalana, ary sariho ny saina ho amin’ny torohevitra azo ampiharina ao amin’ny Baiboly, amin’ny fanasongadinana ny maha-zava-dehibe azy io sy ny fomba ahafahan’ny fanarahana azy io ho fitahiana. Milazà fa hiverina indray ianao mba hampiseho ny fomba ampiasana io boky io mba hianarana misimisy kokoa ny fahazoana fiainam-pianakaviana sambatra.
5 Raha manao fitsidihana any amin’izay nampiasanao fomba fampiseho fohy ianao, dia azonao atao ny milaza hoe:
◼ “Tsy fikasan’Andriamanitra velively ny hahatonga antsika hihantitra sy ho faty. Nikasa ny hiainantsika mandrakizay ao amin’ny paradisa eto an-tany izy.” Asehoy ny sary eo amin’ny pejy faha-188 sy faha-189. Vakio ny fehintsoratra faha-11 ao amin’ny pejy faha-184. Manaova fandaharana ho amin’ny fiverenana mitsidika hafa iray.
6 Azo antoka fa io boky vaovao io dia fanomezana hafa iray avy amin’i Jehovah mba ‘hanafainganana’ ny asa fanangonana amin’izao andro farany izao. (Isaia 60:22). Raha mampiasa azy io amin’ny fomba mandaitra isika, dia ho afaka hampita fahalalana izay mety hanampy olona iray hahazo ny fiainana mandrakizay.