Fivoriamben’ny Distrika 1996 “Iraka Milaza Fiadanana Araka An’andriamanitra”
1 Ny fandaharana ho an’ny fivoriamben’ny distrika amin’itỳ taona itỳ dia azo antoka fa hanampy antsika hihazona ny fiadanana araka an’Andriamanitra ananantsika, ary hanazava ny anjara asantsika amin’ny fanampiana ny hafa hahita fiadanana toy izany. Ny loha hevitra dia hoe “Iraka Milaza Fiadanana Araka An’Andriamanitra”. Efa nanao ny fandaharanao mialoha ve ianao mba tsy hamoizana na inona na inona amin’ny fandaharana?
2 Fandaharana telo andro: Fantatray fa hankafy amin’ny fomba feno ny fivoriamben’ny distrika amin’itỳ taona itỳ ianareo ary hanana hery nohavaozina indray rehefa hody. (2 Tant. 7:10). Amin’itỳ taona itỳ, dia hanana fandaharana telo andro indray isika. Efa nanao fandaharana ve ianao mba hahazoana andro tsy hiasana amin’ny asanao ara-nofo, mba hahafahanao hanatrika mandritra ilay fe-potoana manontolo? Ny sasany amin’ireo fivoriambe farany dia hatao aorian’ny fanombohan’ny sekoly indray rehefa avy naka vakansy lehibe. Raha manan-janaka mbola mankany an-tsekoly ianao, efa nampahafantatra tamim-panajana ny mpampianatra azy ve ianao fa tsy ho tonga hianatra izy ireo ny zoma, noho io tapany lehibe amin’ny fampiofanana azy ara-pivavahana io?
3 Ny Fanompoantsika Ilay Fanjakana Aprily 1996 dia nanome ny lisitry ny daty sy ny toerana nasiana fanitsiana ho an’ny fivoriambe rehetra eto Madagasikara. Ankoatra ny teny malagasy, dia hisy fivoriambe koa amin’ny teny frantsay.
4 Ny fandaharana dia hanomboka amin’ny 9.30 maraina amin’ireo andro telo, ary hifarana ny alahady amin’ny 4.00 tolakandro any ho any. Hampiseho hatsaram-panahy amin’ireo rahalahintsika be taona sy osa ve isika amin’ny tsy fipetrahana eo amin’ny faritra tsara toerana sy tsy mampananosarotra kokoa? Tadidio fa “ny fitiavana (...) tsy mitady ny azy”. — 1 Kor. 13:4, 5; Fil. 2:4.
5 Ho voaranitra ve ianao? Rehefa avy nanonona ny Ohabolana 27:17 manao hoe “Ny vy maharanitra ny vy” Ny Tilikambo Fiambenana 15 Aogositra 1993, dia nanamarika hoe: “Sahala amin’ny fitaovana izay mila fandranitana tsy tapaka isika. Koa satria ny fanehoana fitiavana an’i Jehovah sy ny fanaovana fanapahan-kevitra miorina amin’ny finoantsika midika ho tsy fitoviana amin’izao tontolo izao, dia voatery manaraka lalana tsy mitovy amin’ny an’ny besinimaro foana isika, raha azo atao ny milaza izany.” Ahoana no ahafahantsika mampihatra io torohevitra io?
6 Tsy mitovy ary tsy maintsy mitoetra ho tsy mitovy amin’izao tontolo izao isika. Tsy maintsy hazonina ny ezaka tsy an-kijanona ataontsika mba hanatanterahana izany, raha tiantsika ny hazoto indrindra amin’ny asa tsara. (Tit. 2:14). Izany no antony nanohizan’ilay Ny Tilikambo Fiambenana voatonona tetsy ambony nilaza toy izao: “Rehefa miaraka amin’ny hafa izay tia an’i Jehovah (...) isika, dia mifandranitra isika samy isika — mifampirisika isika ho amin’ny fitiavana sy ny asa tsara.” Ny fivoriamben’ny distrika dia iray amin’ireo fandaharana avy amin’i Jehovah mba hanampiana antsika hitoetra ho maranitra ara-panahy. Tsy afaka ny hamoy na inona na inona amin’ny fandaharana isika ka tsy haninona.
7 Hihaino ny olona hendry iray: Ny fihainoana dia fahaizana tsy maintsy ampitomboina. Voalaza fa ny olona tsotra iray dia tsy mahatadidy afa-tsy ny antsasaky ny zavatra reny eo ho eo fotsiny — na dia amim-pitandremana toy inona aza no iheverany fa ihainoany. Koa satria isika miaina ao amin’ny fotoan’ny fanelingelenana, indraindray dia mety ho hitantsika fa sarotra ny mifantoka mandritra ny fe-potoana lava. Afaka miezaka hampitombo ny halavan’ny fotoana ifantohan’ny saintsika ve isika, indrindra fa rehefa mipetraka eo anivon’ny mpanatrika maro be izay mihaino olona miteny? Raha angatahina hanao famintinana ny fandaharan’ny andro tsirairay rehefa tafody avy any amin’ny fivoriambe ianao, ho afaka hanao izany ve ianao? Ahoana no ahafahantsika rehetra manatsara ny fahaizantsika mihaino sy maneho fahalianana akaiky amin’ny tapany tsirairay atolotra amin’ny fandaharan’ny fivoriambe?
8 Tena ilaina ny fahalianana lalina, satria ny fitadidiana, izay fanomezan’Andriamanitra, dia tsy afaka miasa amin’ny fomba mandaitra raha tsy misy azy io. Ohatra, arakaraka ny ampisehoan’ny olona iray fahalianana amin’ny loha hevitra iray no mahamora kokoa ny hitadidiany ireo hevi-dehibe amin’ny lahateny iray na ny anjara iray amin’ny fandaharana. Kanefa, izany dia miankina be dia be amin’ny fitandremantsika mihoatra noho ny mahazatra ny zavatra izay tombontsoantsika ny mandre azy any amin’ny fivoriamben’ny distrika. Ny fahalianantsika lalina sy ny fanarahantsika tsara ny tapany tsirairay amin’ny fandaharan’ny fivoriambe dia misy vokany eo amin’ny fahasalamantsika ara-panahy ankehitriny ary koa eo amin’ny fahatsinjovantsika ho avy. Any amin’ny fivoriambe isika dia ampianarina ny lalan’i Jehovah ary omena toromarika mba hanatanterahana asa famonjena aina. (1 Tim. 4:16). Hevero hoe sambo iray ao amin’ny ranomasina asamboaravoaran’ny tafio-drivotra ny tenanao. Ny fampanantenan’i Jehovah no vatofantsika fanantenana. Raha tsy manaraka tsara any amin’ireo fandaharana kristiana ny olona iray, fa mamela ny sainy hibirioka, dia mety hamoy torohevitra sy toromarika tena lehibe izay mety hiaro azy tsy ho rendrika ara-panahy. — Heb. 2:1; 6:19.
9 Any amin’ny faritra maro amin’ny tany, ireo rahalahintsika dia manao ezaka be ara-batana mba hanatrehana fivoriana. Mahatalanjona ny mahita ny fitandremana feno asehon’izy ireo any amin’ny fivoriamben’ny distrika. Any amin’ny toerana sasany, anefa, dia nisy olona nanelingelina ny hafa tamin’ny fihodinkodinana teo amin’ny toerana nanaovana ny fivoriambe nandritra ny fotoam-pivoriana. Ny hafa tonga tara. Tamin’ny fivoriambe lasa sasany, dia sarotra ny nandre ireo minitra vitsivitsy voalohany tamin’ny fandaharana, noho ny fivezivezen’ny olona maro aoka izany teny amin’ny lalantsara sy tao ambadiky ny faritra fipetrahana. Tsy rahalahy eo am-panaovana ny asa nanendrena azy, na reny mikarakara ny zavatra ilain’ireo zanany kely izy ireny, mazàna. Be dia be amin’ny fanelingelenana no avy amin’ny olona izay miresadresaka fotsiny. Amin’itỳ taona itỳ ny Sampan-draharaha Mikarakara ny Mpanatrika dia hanome fiheverana misimisy kokoa amin’io zava-manahirana io, ary antenaina fa ho efa tafapetraka ny rehetra rehefa manasa antsika hanao izany ny mpitari-draharaha. Hankasitrahana be dia be ny fiaraha-miasanareo amin’io lafiny io.
10 Fanoloran-kevitra azo ampiharina inona avy no hanampy antsika mba hanaraka tsara kokoa ny fandaharan’ny fivoriambe sy hahatadidy bebe kokoa amin’izay atolotra? Izay nolazaina tamin’ireo taona lasa dia mendrika ny haverina: a) Mifantoha amin’ilay antony lehibe indrindra handehanana any amin’ny tanàna hanaovana ilay fivoriambe. Izy io dia tsy hoe mba hanaovana fanarian-dia, fa mba hihainoana sy hianarana. (Deot. 31:12). Miezaha hahazo fialan-tsasatra ampy isan’alina. Raha vizana be ianao no tonga any amin’ny fivoriambe, dia ho sarotra ny hifantoka. b) Ataovy izay hanananao fotoana lava hametrahana ny fiaranao sy hahatafapetraka anao alohan’ny hanombohan’ny fandaharana. Ny fikoropahana ho eny amin’ny toerana amin’ny minitra farany mazàna dia hiteraka ny famoizanao ny sasany amin’ny anjara voalohany. d) Mandraisa naoty fohy amin’ireo hevitra fototra. Afaka misakana ny fihainoana tsara ny fakana naoty tafahoatra. Rehefa manoratra ianao, dia ataovy azo antoka fa tsy hamoy hevitra hafa noho ny fifantohanao amin’ny naoty raisinao. e) Rehefa atolotra ny anjara iray amin’ny fivoriambe, dia andraso mafy izy io. Manontania tena hoe: ‘Inona no azoko ianarana avy amin’itỳ anjara itỳ ka hampitombo ny fankasitrahako sy ny fitiavako an’i Jehovah? Ahoana no ahafahan’ilay fanazavana manampy ahy haneho ny toetra vaovao amin’ny fomba feno kokoa? Ahoana no hanampian’izany ahy hanatsara ny fanompoako?’
11 Fitondran-tena izay mampahamendrika ny fanompoantsika: Nampirisika an’i Titosy mba hampiseho ny tenany ho “ohatra amin’ny asa tsara” i Paoly. Amin’ny fampisehoany tsy fanekena hevi-diso teo amin’ny fampianarany, i Titosy dia hanampy ny hafa “hampahamendrika ny fampianaran’Andriamanitra, Mpamonjy antsika, amin’ny zavatra rehetra”. (Tit. 2:7, 10, NW ). Isan-taona dia maharay fampahatsiahivana feno hatsaram-panahy isika momba ny antony maha-zava-dehibe aoka izany ny fitondran-tena araka an’Andriamanitra, rehefa ho any sy avy any amin’ny fivoriambe isika, ary koa rehefa any amin’ny hotely fatoriana sy hotely fisakafoana ary any amin’ny fivoriambe mihitsy. Tamin’ny taona lasa, dia nandre teny manafana ny fo indray izahay ka tianay hozaraina aminareo izy ireo.
12 Nanambara toy izao ny mpitantana hotely fatoriana iray: “Fifaliana mandrakariva ny mampiantrano ny Vavolombelona, satria izy ireo dia feno faharetana sy tia miara-miasa ary manara-maso akaiky an’ireo zanany.” Ny mpandray olona tao amin’ny hotely fatoriana iray dia nilaza fa “manamora ny asany aoka izany rehefa misoratra anarana mba hiditra sy mamono anarana mba hiala ao amin’ny hotely ny Vavolombelona satria, na dia voatery milahatra aza izy ireo, dia mahalala fomba sy manana faharetana ary mahatakatra ny hevitry ny hafa, foana”. Nanohina ny fon’ny vehivavy iray tany Nouvelle-Angleterre aoka izany ny fitondran-tenan’ny tanora Vavolombelona nipetraka tao amin’io hotely fatoriana io ihany, hany ka nangataka zavatra vita an-tsoratra sasany momba ny fandaminantsika izy.
13 Etsy an-danin’izany, dia misy ilana hihatsarana eo amin’ny lafiny sasany. Ho tianay ny hizara fanamarihana sasany izay nalefa tatỳ amin’ny Fikambanana. Ny mpiandraikitra mpitety faritany iray dia nanao tatitra fa mila fanaraha-maso bebe kokoa ireo zanaky ny Vavolombelon’i Jehovah any amin’ireo hotely fatoriana. Ny sasany hita nihazakazaka teny amin’ny lalantsara, nitaingina ascenseurs niakatra sy nidina, nitabataba be nanodidina ny dobo filomanosana ary nijanona tao anatin’ilay dobo taoriana ben’ny ora fihidiana voatondro, ka nanelingelina ny torimason’ny vahiny hafa. Mila mampiofana ireo zanatsika isika mba hahatakarany fa ny fitondran-tena kristiana dia tsy manaraka fandaharam-potoana. Tsy mifarana izy io rehefa miala ny toerana anaovana fivoriambe isika. Tsy maintsy maharitra 24 ora isan’andro izy io. Ny fitondran-tenantsika any amin’ny hotely fatoriana, hotely fisakafoana, ary eny amin’ny arabe dia tokony ho mendri-kaja toy ny rehefa mipetraka mandritra ny fotoam-pivoriana miaraka amin’ireo rahalahintsika isika, ampianarin’i Jehovah. — Isaia 54:13; 1 Pet. 2:12.
14 Ho tianay koa ny hizara aminareo ny fampahatsiahivana feno hatsaram-panahy iray momba ny fanomezana falimpo. Ireo mpandroso sakafo sy mpanadio efitranon’ny hotely fatoriana ary mpiasa hafa, dia miankina amin’ny falimpo mba hivelomana. — Jereo Mifohaza! (frantsay) 22 Jona 1986, pejy 24-27.
15 Na dia tsy notohizina intsony aza ny fikarakarana sakafo any amin’ny fivoriambentsika, dia mbola misy fandaniana tsy toko tsy forohana ihany tafiditra amin’ny fanofana ny toerana sy ny fanomezana parking ary ny fikarakarana raharaha samy hafa. Ny fanomezana an-tsitrapo ataontsika no manonitra ireny fandaniana ireny. Voafetra ny volan’ny anabavy iray manan-janaka zatovo rehefa tonga tany amin’ny fivoriambe izy. Kanefa dia mbola nanome fanohanana ihany izy sy ireo zanany tamin’ny fandraisana anjara kely. Izay hevitra tapahin’ny tsirairay hatao amin’io lafiny io, dia raharaha manokana, nefa fantatray fa ankasitrahanareo ny fampahatsiahivana toy izany. — Asa. 20:35; 2 Kor. 9:7.
16 Fantatra amin’ny fomba fiakanjontsika: Ny fomba fiakanjontsika dia mampiharihary zavatra be dia be momba antsika sy momba ny fihetseham-pontsika mikasika ny hafa. Ny ankamaroan’ny zatovo sy ny olon-dehibe maro dia voahodidin’ny fomba fitafy ara-damaody na misavoritaka any an-tsekoly na any amin’ny toeram-piasana. Isan-taona, ny fomba fitafy dia mihatafahoatra kokoa, manafintohina mihitsy aza. Raha tsy mitandrina isika, dia mety ho voatariky ny mitovy taona amintsika eo amin’izao tontolo izao mora foana hiakanjo tahaka azy. Fomba fiakanjo maro no tsy mety, raha anaovana any amin’ireo fivoriana fanompoam-pivavahana. Ny taratasy fohy iray voaray taorian’ny fivoriambe tamin’ny taon-dasa iray, dia naneho fankasitrahana ny fandaharana, nefa nanampy toy izao: “Nanontany tena aho hoe nahoana no nisy zazavavy tanora maro aoka izany nanao akanjo fohy sy balela-bozona ary zipo misy tataka avo be, toy ireny.” Azo antoka fa maniry hiakanjo amin’ny fomba mendrika ny minisitra kristiana isika rehetra, na any amin’ny fivoriambe izany, na rehefa miara-mikorana aorian’ny fandaharana. Amin’ny fotoana rehetra dia maneho fahendrena isika raha misaintsaina ilay torohevitry ny apostoly Paoly ho an’ny Kristiana mba hiravaka amin’ny “fitafiana mahamendrika mbamin’ny fahamaotinana sy ny fahononan-tena”. — 1 Tim. 2:9.
17 Iza no tokony hamaritra izay atao hoe akanjo maotina, “mahamendrika”? Ny hoe maotina dia midika hoe “sady tsy sahisahy ratsy no tsy manao fihetsika manafintohina ny sasany.” Ny rakibolana iray dia milazalaza koa ny hoe maotina amin’ny hoe “tsy jejo fa mipetrapetraka”. Na ny Fikambanana na ireo loholona dia tsy tokony hanoritra fitsipika momba ny akanjo sy ny fisehoana ankapobe. Na dia izany aza, moa ve tsy tokony hazava amin’ny Kristiana iray hoe fomba fitafy manao ahoana no tena tsy maotina na mendrika? (Ampitahao amin’ny Filipiana 1:10.) Tsy tokony hisarika ny maso tafahoatra ny fisehoantsika ankapobe sy ny fitafiantsika. Tsy maintsy ho mahafinaritra ny fisehoantsika ivelany fa tsy araka an’izao tontolo izao na hoe manafintohina. Amin’ny maha-minisitry ny vaovao tsara antsika, ny fomba fiakanjontsika sy ny fisehoantsika ankapobe araka ny mety, mandritra ny fotoana maha-ao amin’ny tanàna anaovana ny fivoriambe antsika, dia manome voninahitra an’i Jehovah ary taratra tsaran’ny fandaminana. Noho izany, ireo ray aman-dreny dia hanome ny ohatra ary avy eo, dia hanao izay hahazoana antoka fa miakanjo araka ny tokony ho izy ho an’ilay fisehoan-javatra ireo zanany. Hirin’ireo loholona ny hanome ohatra tsara sy ny ho vonona hanolotra torohevitra feno hatsaram-panahy raha ilaina izany.
18 Fakan-tsary, caméscopes sy magnétophones: Azo atao ny mampiasa fakan-tsary sy fitaovana hafa fakana feo sy sary, raha mampiseho fiheverana ny mpanatrika hafa isika. Raha mivezivezy maka sary isika mandritra ny fotoam-pivoriana, dia tsy vitan’ny hoe hanelingelina ny hafa izay miezaka mihaino, fa hamoy sasany amin’ny fandaharana koa ny tenantsika. Mazàna dia mandray soa kokoa avy amin’ny fivoriambe isika amin’ny fihainoana amim-pitandremana an’ireo mpandahateny sy amin’ny fandraisana naoty antonona. Mety haka feo sy sary ho an’ny rahalahy na ny anabavy izay marary ao an-trano isika; kanefa, ho an’ny tenantsika manokana, dia mety ho hitantsika rehefa tafody isika fa, rehefa avy naka feo ny fandaharana nandritra ny ora maro isika, dia tsy hisy fotoana hihainoantsika indray ny be dia be amin’ny noraisintsika feo akory. Tsy tokony hisy fitaovana fakana feo na inona na inona hampifandraisina amin’ny fanamafisam-peon’ny fivoriambe, no sady tsy tokony hisy fitaovana hanakana ny lalana eny anelanelan’ny laharan-tseza, ny lalan’olona na ny fahitan’ny hafa.
19 Toerana ipetrahana: Manohy mahamarika fihatsarana izahay raha ny amin’ny famandrihan-toerana. Tamin’ny taon-dasa, ny ankamaroanareo dia nanaraka ilay fitarihan-dalana hoe: IREO HAVANA AKAIKY SY IZAY METY HIRAY FIARA AMINAO IHANY NO AZONAO AMANDRIHANA TOERANA. Azo inoana fa hitanao ho nihena ny fihenjanana satria nanaraka an’ireo fitarihan-dalana mazava ireo ny maro. Ny mbola lehibe kokoa aza, ny fahaizanao manaraka an’io fitarihan-dalana io dia nampifaly an’i Jehovah sy ny “mpanompo mahatoky”, izay manome ilay sakafo ara-panahy. — Matio 24:45.
20 Mitombo isa hatrany ireo rahalahintsika mila zavatra manokana ara-pahasalamana. Ny sasany tonga any amin’ny fivoriambe ao anaty seza mikorisa ary mila karakarain’ny fianakaviany. Ny hafa manaraka fitsaboana maro samihafa noho ny aretina mitaiza, toy ny aretim-po na ny krizy toy ny androbe. Tena manafana ny fontsika ny mahita ireny rahalahy sy anabavy malala ireny any amin’ny fivoriambe, tapa-kevitra ny tsy hamoy na inona na inona amin’ilay sakafo ara-panahy. Kanefa, indraindray, dia teo ny zava-nanahirana momba ny olona sasany nanjary narary nandritra ny fivoriambe, nefa tsy nisy havana na mpikambana tao amin’ny kongregasiona nanome fanampiana. Tamin’ny toe-javatra sasany, ny fitantanan-draharahan’ny fivoriambe dia voatery niantso fitsaboana vonjy taitra mba hitondra ny rahalahy na ny anabavy iray tany amin’ny hopitaly. Ny andraikitra hikarakara ilay manana aretina mitaiza dia mipetraka voalohany indrindra amin’ny fianakaviany sy ny havany akaiky. Ny Sampan-draharahan’ny Fitsaboana Vonjy Maika amin’ny fivoriambe dia tsy natao hikarakara an’ireo manana aretina mitaiza. Raha mila fikarakarana manokana ny mpianakavinao iray, dia ataovy azo antoka fa tsy tavela irery izy, raha toa ka mipoitra ny toe-javatra ilana vonjy taitra. Fanampin’izany, any amin’ireo fivoriambe, dia tsy hisy fandaharana hampiantranoana ao amin’ny efitrano manokana an’ireo tsy mahazaka zavatra sasany, ka tsy afaka mipetraka eo amin’ny faritra ipetrahan’ny besinimaro. Hirin’ireo loholona ny ho mailaka ny amin’izay rehetra mila zavatra manokana ara-pahasalamana ao amin’ny kongregasionany ary hanao izay hahazoana antoka fa hisy fandaharana mialoha mba hikarakarana azy ireo.
21 Zavatra ilaina ara-tsakafo any amin’ny fivoriambe: Nisy teny nanorina maro natao momba ny tombontsoa amin’ny fitondrana ny sakafon’ny tena manokana. Nanoratra toy izao ny rahalahy iray: “Afaka mahita mazava tombony ara-panahy goavana aho avy amin’izy io. Ny fotoana sy ny hery rehetra lany tamin’izany dia azo avily ho amin’ny raharaha ara-panahy ankehitriny. Tsy nandre teny tsy nanorina aho.” Nanoratra toy izao ny anabavy iray: “Amin’ny fanomezana ohatra, ianareo, ranadahy malala, dia mampirisika anay Kristiana isam-batan’olona, mba handini-tena sy hitady fomba hanatsorana ny fiainanay sy hampitomboana ny asanay teokratika”. Ny mpiandraikitra mpitety faritany iray dia nanoratra toy izao momba ilay fandaharana fikarakarana sakafo teo aloha: “Ilay fandaharana teo aloha dia nahatonga ny famoizan’ny rahalahy maro be ny fandaharan’ny fivoriambe iray manontolo.” Momba ny sakafo nentin’ireo rahalahy, dia nanoratra toy izao ny loholona iray: “Nanana izay tena nilainy indrindra izy ireo, ary tsy nila nilahatra mba hahazoana azy io.” Farany, dia nanoratra toy izao ny anabavy hafa iray: “Taorian’ny fotoam-pivoriana dia nilamina sy tony ary nisy rivo-piainana falifaly.” Eny, ny tsirairay dia afaka nitondra sakafo ampy mba ho tsara tohana ho amin’ny tolakandro. Maro no niresaka momba ny fananany fotoana misimisy kokoa hiresahana tamin’ny namana.
22 Tsy hisy fikarakarana sakafo indray koa amin’itỳ taona itỳ. Mety haka minitra vitsivitsy ianao hijerena indray ny takelaka fanampiny tamin’ny Ny Fanompoantsika Ilay Fanjakana, May 1995, fehintsoratra 24, mba hahitana fanoloran-kevitra ny amin’ny sakafo mahasoa sy mahavelona izay azo entina any amin’ny fivoriambe. Tadidio, aza fady, fa tsy tokony hisy fitoeran-javatra vita amin’ny tavoahangy na zava-pisotro misy alkaola hoentina any amin’ny toerana hanaovana fivoriambe. Raha tena ilaina ny vata fampangatsiahana kely, dia tsy maintsy omby ao ambanin’ny sezanao izy ireo. Ataovy ao an-tsaina fa misy fotoana ampy mandritra ny fiatoana amin’ny antoandro mba hihinanana sy hisotroana izay nentinao. Toy ny any amin’ny Efitrano Fanjakanantsika mandritra ireo fivoriana, dia mitan-tena foana isika mba tsy hihinan-kanina mandritra ireo fotoam-pivorian’ny fivoriambe. Amin’izany isika dia maneho fanajana an’ilay fandaharana ho amin’ny fanompoam-pivavahana sy ilay sakafo ara-panahy omena.
23 Tsy ho ela dia hanomboka ny voalohany amin’ireo Fivoriamben’ny Distrika “Iraka Milaza Fiadanana Araka An’Andriamanitra”. Efa nahavita ny fiomananao hanatrika ve ianao, ary vonona ankehitriny hankafy fiarahana feno fifaliana sy zava-tsoa ara-panahy mandritra ny telo andro? Ny vavakay amim-pahatsorana dia ny hitahian’i Jehovah ny ezaka ataonareo mba hanatrehana io fivoriambe io.
[Efajoro, pejy 6]
Fampahatsiahivana ny Amin’ny Fivoriamben’ny Distrika
Batisa: Ireo mpilatsaka hatao batisa dia tokony hipetraka eo amin’ny faritra voatondro ho azy ireo, alohan’ny hanombohan’ny fandaharana ny asabotsy maraina. Voamarika fa ny sasany dia manao karazam-pitafiana tsy mendrika sy mampiala ny saina amin’ilay fisehoan-javatra. Maillot de bain maotina sy lamba famaohana no tokony hoentin’izay mikasa hatao batisa. Hirin’ireo loholon’ny kongregasiona izay niara-nandinika ireo fanontaniana ao amin’ny boky Voalamina tamin’ny mpilatsaka hatao batisa, ny hahazo antoka fa mahatakatra ireo hevitra ireo ny tsirairay. Aorian’ny lahatenin’ny batisa sy ny vavaka ataon’ny mpandahateny, dia hanome toromarika fohy ho an’ireo mpilatsaka hatao batisa ny mpitari-draharaha ary avy eo dia hanasa hanao hira iray. Aorian’ny andininy farany, dia hitarika ny mpilatsaka hatao batisa ho any amin’ny toerana hanaovana batisa ireo mpikarakara ny mpanatrika. Koa satria raharaha manokana eo amin’ny olona iray sy i Jehovah ny batisa ho mariky ny nanolorany ny tenany, dia tsy misy fandaharana hanaovana izay antsoina hoe batisa mitambatra izay hifampisakambinana na hifampitantanan’ny mpilatsaka hatao batisa roa na mihoatra eo am-panaovana batisa azy ireo.
Insignes: Anaovy, aza fady, ny insigne natao ho an’ny 1996 eny amin’ny fivoriambe sy mandritra ny dianao mandroso sy miverina avy amin’ny toerana hanaovana ny fivoriambe. Matetika izany dia mahatonga antsika ho afaka hanao fanambarana tsara dia tsara eny am-pandehanana. Tokony horaisina amin’ny alalan’ny kongregasionanao ny insignes sy ny tranony, satria tsy hisy any amin’ny fivoriambe. Aza miandry andro vitsivitsy alohan’ny fivoriambe vao hangataka insignes ho anao sy ny fianakavianao. Tadidio ny hitondra ny karatrao tsy lany andro hoe Fitakiana Mialoha Ara-pitsaboana/Fanalana Andraikitra.
Filasiana: Ireo mpitan-tsoratry ny kongregasiona dia tokony hahazo antoka fa halefa haingana amin’ny adiresin’ny fivoriambe mifanentana ny taratasy Fangatahana Filasiana ho An’izay Manan-javatra Ilaina Manokana. Raha tsy maintsy manafoana filasiana natao tamin’ny alalan’ilay fandaharana ho an’ny zavatra ilaina manokana ianao, dia tokony hampahafantatra avy hatrany ny tompon-trano sy ny Sampan-draharahan’ny Filasiana amin’ny fivoriambe, mba hahafahana hanome an’ilay efitrano ho an’ny hafa indray.
Fanompoana an-tsitrapo: Koa satria tsy misy fikarakarana ny sakafo intsony, dia maro izay niasa tamin’io sampan-draharaha io no mety hahita ankehitriny fa afaka miasa an-tsitrapo any amin’ny sampan-draharaha hafa izy ireo. Afaka manokana fotoana sasany ve ianao eny amin’ny fivoriambe mba hitondrana fanampiana ao amin’ny iray amin’ireo sampan-draharaha? Tena ilaina sy hitondra fahafaham-po lehibe ny fanompoana an’ireo rahalahintsika, na dia mandritra ny ora vitsivitsy monja aza. Raha afaka manampy ianao, dia mankanesa, aza fady, ao amin’ny Sampan-draharahan’ny Fanompoana An-tsitrapo any amin’ny fivoriambe. Afaka mandray anjara tsara dia tsara ireo ankizy latsaka ny 16 taona amin’ny fiasana eo ambany fitarihan’ny rainy na ny reniny na ny olon-dehibe hafa mahay mandray andraikitra.
Teny fampitandremana: Mitoera ho mailo ny amin’ireo zava-manahirana mety hitranga, mba hisorohana fahasahiranana tsy ilaina. Matetika ny mpangalatra sy ny olon-kafa maty eritreritra no miremby an’ireo olona lavitra ny toerana misy azy. Ataovy azo antoka fa mihidy ny fiaranao amin’ny fotoana rehetra, ary aza mamela mihitsy zavatra hitan’ny maso ao anatiny ka hitondra fakam-panahy hiditra an-keriny. Ireo mpangalatra sy mpangarom-paosy dia mampifantoka ny sainy amin’ireo fihaonambe. Tsy ho fahendrena ny hamela izay mety ho zavatra sarobidy eo amin’ny toeranao. Tsy afaka mahazo antoka ianao fa Kristiana avokoa ny olona rehetra manodidina anao. Nahoana no hampiditra olona amin’ny fakam-panahy? Nisy tatitra voaray nilazana fa nisy olona avy tany ivelany nanandrana nitaona tamim-pitaka ankizy kely ho eny ivelany. ARAHO MASO IREO ZANAKAO AMIN’NY FOTOANA REHETRA.
Ny televiziona sy ny vidéo any amin’ny hotely fatoriana maro matetika dia manasongadina fandaharana maloto sy vetaveta. Mbà mailo ny amin’io fandrika io, ary aza mamela ireo zanakao hijery ilay televiziona ao amin’ny efitrano, tsy misy fanaraha-maso.
Aza miantso an-telefaonina na manoratra any amin’ny tompon’andraikitry ny fivoriambe mba hitady fanazavana momba ny fivoriambe. Raha tsy azonao avy amin’ireo loholona ilay fanazavana, dia azonao atao ny manoratra amin’ny adiresin’ny fivoriambe voafaritra tsara iray.