Afaka Manohina ny Fo ny Resaka Amim-pisakaizana
1 Azo faritana hoe “fifanakalozan-kevitra am-bava” ny resaka. Ny fanombohana resaka amim-pisakaizana momba ny foto-dresaka iray izay mahakasika ny hafa dia mety hihazona ny fahalianany sy afaka manampy antsika hanohina ny fony amin’ny hafatra momba ilay Fanjakana. Ny fanandraman-javatra dia nampiseho fa mandaitra lavitra ny manomboka resaka amim-pisakaizana sy tony amin’olona, noho ny manao sermona aminy.
2 Fomba fanombohana resaka amim-pisakaizana: Ny fahaizantsika miresaka amin’ny hafa dia tsy midika hoe voatery manolotra fizotran-kevitra sy andinin-teny manaitra isika. Izy io kosa dia ny fanaovana izay hiresahan’ilay olona hafa amintsika fotsiny. Ohatra, rehefa miresaka amim-pisakaizana amin’ny mpifanila trano amintsika isika, dia tsy henjana izany, fa tony. Tsy mieritreritra ny amin’ny teny holazaintsika manaraka isika, fa mamaly fotsiny ny hevitra ambarany. Ny fampisehoana fahalianana marina amin’izay lazainy dia mety tena hampirisika azy hanohy hiresaka amintsika. Tokony ho toy izany koa rehefa manao fanambarana amin’ny hafa isika.
3 Ny foto-dresaka toy ny heloka bevava, ny zava-manahirana ny tanora, ny raharaha eo an-toerana, ny toe-javatra maneran-tany, na ny toetr’andro aza, dia azo ampiasaina hanombohana resaka amim-pisakaizana. Tena mandaitra mba hanairana ny fahalianan’ny olona ny foto-kevitra izay mahakasika mivantana ny fiainany. Raha vao natomboka ny resaka, dia afaka mamily azy io amin-katsaram-panahy ho any amin’ny hafatra momba ilay Fanjakana isika.
4 Ny fanaovana resaka tony dia tsy midika hoe tsy ilaina ny fiomanana mialoha. Tena ilaina izy io. Kanefa, tsy misy ilana ny hilazana zavatra vita planina henjana na ny hanaovana tsy an-jery sermona iray, izay ny vokany dia resaka tsy azo ovana na ampifanarahina amin’ny toe-javatra eo anoloana. (Ampitahao amin’ny 1 Korintiana 9:20-23.) Ny fomba hiomanana iray faran’izay tsara dia ny fifantenana foto-kevitra araka ny Soratra Masina iray na roa noho ny fikendrena ny hanorina resaka manodidina azy ireo. Ny fijerena indray foto-kevitra ao amin’ny boky Fanjohian-kevitra dia ho hita fa hanampy amin’izany.
5 Toetra tena ilaina ho amin’ny resaka amim-pisakaizana: Rehefa miresaka amin’ny hafa isika, dia tokony ho feno hafanana sy fahatsoram-po. Manampy hanomezana taratr’ireo toetra ireo ny tsiky sy ny endrika falifaly. Ny hafatra tsara indrindra eo amin’izao tontolo izao no ananantsika; manintona indrindra ho an’ny olona tso-po izy io. Raha tsapany fa ny fahaliananao aminy dia atosiky ny faniriana feno fahatsoram-po hizara vaovao tsara, amin’izay izy dia mety ho voatosika hihaino. — 2 Kor. 2:17, NW.
6 Ny fanombohana resaka dia tokony ho fanandraman-javatra mahafinaritra. Noho izany, dia tokony ho tsara fanahy sy hahay handanjalanja isika amin’ny fanolorana ny hafatra momba ilay Fanjakana. (Gal. 5:22; Kol. 4:6). Miezaha hamela ilay olona hanana fiheverana tsara momba ny Vavolombelon’i Jehovah. Amin’izay, na dia tsy nahomby aza isika tamin’ny voalohany tamin’ny fanohinana ny fony, dia mety handray tsara izy amin’ny fotoana manaraka hiresahan’ny Vavolombelona aminy.
7 Ny fampidirana olona ao amin’ny resaka amim-pisakaizana dia tsy vokatry ny fahaizana manao sermona sarotra iray. Izany dia fahaizana manaitra fahalianana amin’ny foto-kevitra ahin’ny olona iray. Rehefa avy niomana mialoha isika, dia ho vonona hampiditra olona ao amin’ny resaka amim-pisakaizana. Aoka isika hiezaka hanohina ny fon’ireo izay hitantsika amin’ny fizarana amin’izy ireo ny vaovao tsara indrindra mety ho hita, dia ny an’ny fitahian’ilay Fanjakana mandrakizay. — 2 Pet. 3:13.