Fomba fampiseho ny vaovao tsara—Amin’ny firesahana amin’ny olona
1 Araka ny amaritan’ny rakibolana iray azy, ny atao hoe resaka dia “fifanakalozana fihetseham-po, fandinihana, fiheverana sy hevitra am-bava.” Kanefa, ahoana no azonao anombohana resaka mifototra amin’ny Baiboly raha olona manana hevitra ara-pivavahana mifanohitra amin’ny anao na olona sahirana amin’ny raharahany manokana no mifanehatra aminao? Nanontany mba hampiresahana ny mpihaino azy i Jesosy.—Jaona 4:9-15, 41, 42.
2 Tokony hivavaka amim-pahatsorana amin’i Jehovah isika mba hanampiany antsika hahita ireo olona tso-po sy hanokafany lalana ho antsika mba hiresahana amin’izy ireo. Ho mora kokoa ny manao fanambarana raha heverintsika ho toy ny olona mety ho tonga mpanompon’i Jehovah ny tompon-trano tsirairay avy. Izany toe-tsaina izany dia hanampy antsika hampita ny fahamarinana amin’ny fomba mafana sy feno fahatsorana izay hanintona ny olona liana.
Ampiasao izay anananao
3 Manolotra fampidiran-dresaka tsara dia tsara maro ny boky Comment raisonner ao amin’ny pejy faha-9-15. Maro amin’izy ireny no mandaitra noho ny fampiasana fanontaniana. Rehefa mamaly ny iray amin’izany ilay tompon-trano, dia henoy amim-panajana feno izy ary avy eo dia valio amin’ny fomba hahatsapany fa mihevitra izay nolazainy isika.—Kol. 4:6.
4 Mazava ho azy fa rehefa manontany ianao dia tsy fantatrao izay valin-tenin’ilay tompon-trano. Aoka ianao ho vonona hampifanaraka ny dinidinika ataonao amin’izany. Manandrama manohy ny resaka amin’ny fanomezana fanazavana fanampiny mifototra amin’ny Baiboly, mifandray amin’ny zavatra mahaliana azy ary milazà fanontaniana fanampiny amim-pahalemem-panahy.
Miomàna mialoha
5 Azonao atao ny mifankazatra mialoha amin’ny fomba fihevitry ny olona eo amin’ny faritaninao manokana avy ao amin’ny boky Comment raisonner. Mety ho tena ilaina ny mampifanaraka ny iray amin’ireny fampidiran-dresaka ireny amin’ny foto-dresaka ampiasaina. Manomboha resaka miorina amin’ny zavatra inoanao fa mahakasika ilay tompon-trano, asehoy fohifohy ilay zava-manahirana ary avy eo, dia tariho ho amin’ny fanafodiny omen’ny Baiboly. Raha manao fanamarihana izy dia fakafakao amin’ny fomba manorina, fa tsy manakiana, izay lazainy. Tsy maintsy hampirisika azy hanohy hiresaka aminao ny fiheveranao ny heviny sy ny fihetseham-pony. Miezaha mitady lafin-javatra itoviana hevitra ary voaboasy izany. Ataovy izay hahatonga ny resaka hanorina hatrany amin’ny fampisongadinana ireo fitahian’ilay Fanjakana ho fanafody omen’ny Baiboly amin’ny zava-manahirana ny olombelona.
6 Hevero ho toy ny fanalahidy ahafahana manohy ny resaka ny fomba fijery samy hafa. Raha maniry hamakafaka ilay tompon-trano dia afaka manontany azy toy izao ianao: “Amin’izany fomba fijery izany foana ve no niheveranao io raharaha io?” Avy eo dia tariho ho amin’izay lazain’ny Baiboly momba io lohahevitra io ny resaka. Raha hitanao fa sarotra atoro ilay olona dia aza mikiry mba hanekeny izay vao avy nolazainao. Farano amin’ny fanamarihana feno fisakaizana aza ny resaka mba hamelana ny lalana hisokatra ho amin’ny fahafahana manaraka hampiseho ny vaovao tsara aminy. Ohabolana 12:8, 18.
7 Mirona kokoa ho amin’ny resaka ny olona sasany rehefa amin’ny fomba tampotampoka no ahitana azy. Aza misalasala àry manombo-dresaka amin’ny olona mifanena aminao eny an-dalana na izay miasa na miala voly eo an-tokotaniny. Mety handray tsara ny fiheveranao amim-pahatsorana ny asa aman-draharahany izy ireny ary mety ho afaka hitarika ny resaka ho amin’ny fifanakalozan-kevitra ny amin’ny fampanantenan’ny Baiboly hanova tsy ho ela ny tany ho paradisa ianao. Rehefa manomboka resaka iray ianao dia ataovy izay hahatonga izany ho fanandraman-javatra mahafinaritra ho an’ny tompon-trano. Ataovy izay hananan’ilay olona fihetsika tsara kokoa eo anoloan’Andriamanitra sy ny Teniny ary ireo mpanompony rehefa mandao azy ianao raha mbola miankina aminao koa izany. Amin’ny fanaovana toy izany, na dia tsy nahomby aza ianao tamin’ny voalohany amin’ny fanohinana ny fony, dia mety ho mora handray kokoa izy rehefa mitsidika ny Vavolombelona iray any aoriana.