Mandrisika ho Amin’ny Asa Tsara ny Fivoriana
1 Tapany roa lehibe tena ilaina amin’ny fanompoam-pivavahantsika ny fanatrehana ireo fivorian’ny kongregasiona sy ny fandraisana anjara amin’ny fanompoana eny amin’ny saha. Mifamatotra izy roa ireo. Misy heriny eo amin’ny iray ilay hafa. Ny fivoriana kristiana dia mandrisika ho amin’ny asa tsara, ka ny asa fitoriana ilay Fanjakana sy fanaovana mpianatra no tsara indrindra amin’izany. (Heb. 10:24). Raha toa isika ka tsy mamonjy fivoriana intsony, tsy ho ela isika dia mety hitsahatra tsy hitory satria tsy ho voarisika hanao izany.
2 Any amin’ireo fivoriana isan-kerinandro, dia mandray toromarika ara-panahy natao hanosika antsika hitory isika. Antitranterina lalandava fa mahadodona ny andro ankehitriny, ka manosika antsika hitondra any amin’ny hafa, ny hafatra ao amin’ny Baiboly manome fiainana. Ampirisihina sy hatanjahina mba hiaritra amin’ny asa fitoriana isika. (Matio 24:13, 14). Amin’ny fanararaotana ny fahafahana hanome valin-teny any amin’ireo fivoriana, dia manjary zatra kokoa isika manambara ny finoantsika eo anoloan’ny olona. (Heb. 10:23). Amin’ny fisoratana anarana amin’ny Sekolin’ny Fanompoana Teokratika, dia ampiofanina isika mba ho tonga mpitory mahita vokatra kokoa sy hanatsara ny fahaizantsika mampianatra. — 2 Tim. 4:2.
3 Ny fomba andrisihan’ny fivoriana momba ny fanompoana antsika hitory: Ampirisihina isika rehetra handinika mialoha ny lahatsoratra ao amin’ny Ny Fanompoantsika Ilay Fanjakana. Amin’izay ilay filazana dia ho latsa-paka ao an-tsaintsika, rehefa manatrika ny Fivoriana Momba ny Fanompoana isika ary rehefa mahita ireo fampisehoana eny amin’ny lampihazo. Rehefa eny amin’ny fanompoana isika, dia afaka mieritreritra indray Ny Fanompoantsika Ilay Fanjakana, sy mahatsiaro ireo fampisehoana natao, ka manao fanambarana mandaitra kokoa. Mpitory maro no efa nahita izany ho marina.
4 Ho fanarahana ny Fivoriana Momba ny Fanompoana, dia mifamotoana ny sasany mba hiaraha-mitory. Mbola mahatadidy ireo hevitra azo ampiharina eny amin’ny fanompoana ireo mpitory, ka voarisika hanandrana azy ireny, satria nampirisihin’ireo fivoriana ireo handray anjara amin’ny asa fitoriana isan-kerinandro.
5 Tsy misy mahasolo ireo fivoriantsika kristiana, izay iarahantsika amin’ireo mpiara-manompo sy andrisihana antsika ho amin’ny asa tsara. Raha tiantsika hiroborobo ny fanompoantsika, dia tsy maintsy manatrika tsy tapaka ny fivorian’ny kongregasiona isika. Enga anie isika hampiseho fankasitrahana io fandaharana mahatalanjona avy amin’i Jehovah io, ka ‘tsy hahafoy ny fiarahantsika miangona’. — Heb. 10:25.