Momba Antsika ny Fanahin’i Jehovah
1 Amin’ny maha-Vavolombelon’i Jehovah antsika, dia notendrena hanao asa goavana iray isika. Hoy i Jesosy: “Ny firenena rehetra tsy maintsy hitoriana ny filazantsara aloha.” (Marka 13:10). Raha jerena amin’ny fomba fihevitr’olombelona, dia toa tsy ho azo atao izany, nefa tsy izany no izy. Manana ilay hery matanjaka indrindra eo amin’izao rehetra izao manohana antsika isika — ny fanahin’Andriamanitra. — Matio 19:26.
2 Porofo tamin’ny taonjato voalohany: Nampihatra ny faminanian’i Isaia tamin’ny tenany i Jesosy, ka nanao hoe: “Ny Fanahin’i Jehovah no ato amiko, (...) hitory teny soa mahafaly”. (Lioka 4:17, 18). Talohan’ny niakarany tany an-danitra, dia nilaza tamin’ny apostoliny izy fa izy ireo koa dia hahazo hery avy amin’ny fanahy masina mba hanao fanambarana “hatramin’ny faran’ny tany”. Taorian’izay, ny fanahy masina dia nitarika an’i Filipo mba hitory tamin’ilay tandapa etiopiana, sy naniraka an’i Petera tany amin’ny manamboninahitry ny tafika romana, ary nandefa an’i Paoly sy i Barnabasy hitory tamin’ireo firenena jentilisa. Iza no ho nieritreritra fa ny olona avy tamin’ny fiaviana toy izany dia hanaiky ny fahamarinana? Nanaiky anefa izy ireo. — Asa. 1:8; 8:29-38; 10:19, 20, 44-48; 13:2-4, 46-48.
3 Porofo amin’ny andro ankehitriny: Ny bokin’ny Apokalypsy dia manantitrantitra ny anjara raisin’ny fanahy masina ao amin’ny asa fitoriana amin’izao andro izao, amin’ny filazana toy izao: “Ny Fanahy sy ny ampakarina manao hoe: Avia; (...) ary izay mety, aoka izy hisotro maimaimpoana amin’ny ranon’aina.” (Apok. 22:17). Nanosika ny kilasin’ny ampakarin’i Kristy sy ireo “ondry hafa” namany mba hitory ny vaovao tsara amin’ny olona rehetra ny fanahy. (Jaona 10:16). Tokony ho sahy eo amin’ny fitoriana ataontsika isika, fa tsy hiahotra na oviana na oviana hanatona ny karazan’olona rehetra, amin’ny fatokiana foana fa hanampy antsika ny fanahin’Andriamanitra. Manome porofo mampiaiky ny Diary 1998 fa ny fanahin’Andriamanitra dia momba ny mpanompony hatrany. Jereo ny vokany! Nandritra ireo taom-panompoana roa lasa teo, dia maherin’ny 1 000 isan’andro, tamin’ny antsalany, no natao batisa.
4 Aoka ianao hatoky fa ny fanahin’Andriamanitra dia homba antsika hatrany rehefa mitory ny hafatra momba ilay Fanjakana hatramin’ny anirian’i Jehovah azy isika. Izany fahalalana izany dia tokony hampirisika sy hanosika antsika hikely aina mafy eo amin’ilay asa faran’izay lehibe momba ilay Fanjakana. — 1 Tim. 4:10.