Mpiandraikitra Mitari-dalana — Ny Mpiandraikitra Mpitantan-draharaha
1 Andraikitra lehibe ny manompo amin’ny maha mpiandraikitra ao amin’ny kôngregasiôna. (Asa. 20:28; 1 Tim. 3:1). Itỳ no voalohany amin’ny fitohitohizan-dahatsoratra izay hanoritra ireo andraikitra maro samihafa sahanin’ireo loholona kristianina mba hahafahantsika rehetra hahatakatra ny mahazava-dehibe ny asa izay ataony ho antsika.
2 Ny Fikambanana dia manendry ny mpiandraikitra mpitantan-draharaha mba hanompo mandritra ny fe-potoana tsy voafetra. Koa satria mandrindra ireo raharaha ny mpiandraikitra mpitantan-draharaha, izany dia manampy ny loholona mba hifantoka tsara amin’ireo adidy nanendrena azy ireo. (Ny Fanompoantsika, p. 41, 42). Mahafaoka inona izany?
3 Mandray ny taratasin’ny kongregasiona ny mpiandraikitra mpitantan-draharaha, ary mandefa azy avy hatrany any amin’ny mpitan-tsoratra mba hokarakaraina. Rehefa manomana ny fivorian’ny loholona ny mpiandraikitra mpitantan-draharaha, dia mahazo fanoloran-kevitra avy any amin’ireo loholona, momba ny raharaha ilana fiaraha-midinika, ary manao lisitra an’izany. Izy koa no mitari-draharaha ao amin’ny fivorian’ny loholona. Rehefa misy fanapahan-kevitra noraisina, dia ataony izay hahazoana antoka fa tanterahina hatramin’ny farany araka ny tokony ho izy izany. Izy no miandraikitra ny fanomanana ny Fivoriana Momba ny Fanompoana sy ny fanaovana ny fandaharana ireo lahateny ampahibemaso. Izy no manaiky na tsia ny fampandrenesana rehetra atao ho an’ny kôngregasiôna, manome lalana amin’ny fandoavana ny fandaniana mahazatra rehetra, ary manao izay ahazoana antoka fa tontosa ny fanamarinana ny kaontin’ny kôngregasiôna, isan-telo volana.
4 Amin’ny maha mpitari-draharaha azy, dia ny mpiandraikitra mpitantan-draharaha no mandrindra ny asan’ny Komitin’ny Fanompoana ao Amin’ny Kôngregasiôna. Rehefa misy mpianatra Baiboly mangataka ny hekena ho mpitory tsy vita batisa, na rehefa misy mpitory tsy vita batisa maniry hatao batisa, dia ny mpiandraikitra mpitantan-draharaha no mandamina ny hihaonan’ny loholona amin’izy ireny. Ilay mpiandraikitra mpitantan-draharaha koa no mitari-dalana amin’ny fanomanana ny fitsidihan’ny mpiandraikitra ny fizaran-tany, mba hahafahan’ny kôngregasiôna handray soa feno avy amin’ilay herinandro manokana anaovana asa betsaka.
5 Maro samihafa ireo adidin’ny mpiandraikitra mpitantan-draharaha. Rehefa miantsoroka ny andraikiny “amin’ny fahazotoana” izy, isika rehetra dia afaka manao ny anjarantsika amin’ny fiaraha-miasa amin’ireo loholona. (Rom. 12:8). Raha ‘manaiky’ sy ‘manoa’ ireo mitari-dalana antsika isika, dia ho afaka hanatanteraka amim-panetren-tena ny asany amin’ny tena fifaliana be kokoa izy ireo. — Heb. 13:17.