Mpiandraikitra Mitari-dalana — Ny Mpitan-tsoratra
1 Ny mpitan-tsoratry ny kôngregasiôna dia mitana anjara asa lehibe amin’ny fanaovana izay hahazoana antoka fa ‘atao amin’ny fahamendrehana sy ny filaminana ny zavatra rehetra’. (1 Kor. 14:40). Mikarakara ny taratasin’ny kôngregasiôna sy ny firaketana an-tsoratra lehibe izy, amin’ny mahanisan’ny Komitin’ny Fanompoana ao Amin’ny Kôngregasiôna azy. Ilaina sy ankasitrahana tokoa ny asany, na dia tsy voamariky ny rehetra toy ny an’ny loholona hafa aza ny andraikiny.
2 Rehefa misy taratasy voaray avy any amin’ny Fikambanana na avy amin’ny hafa, dia ny mpitan-tsoratra no mikarakara azy io sy manao izay hahazoana antoka fa voavaly ilay izy rehefa ilaina izany. Ataony izay hahazoana antoka fa ampandalovina any amin’ireo loholona ny taratasy voaray, ary avy eo dia tahiriziny izany mba hojerena any aoriana. Izy no manamarina ny fanafarana boky sy gazety ary mandefa izany any amin’ny Fikambanana. Miandraikitra mivantana ny asan’ireo mpikarakara ny kaonty sy ny famandrihana ary koa ny raharaha rehetra mifandray amin’ny fivoriambe izy.
3 Koa satria tsy maintsy mandefa any amin’ny Fikambanana alohan’ny fahenin’ny volana ny tatitra fanao isam-bolana momba ny fanompoan’ny kôngregasiôna ny mpitan-tsoratra, dia tena ilaina ny anaovantsika rehetra tatitra haingana ny asantsika teny amin’ny saha, isaky ny faran’ny volana. Avy eo izy dia mampiditra ireo tatitra momba ny fanompoana ao amin’ny karatra Firaketana ny Fanompoan’ny Mpitorin’ny Kôngregasiôna. Afaka mangataka hijery ny firaketana ny asany manokana ny mpitory rehetra.
4 Rehefa mifindra ho ao amin’ny kôngregasiôna na miala ao ny mpitory iray, ny mpitan-tsoratra dia hangataka na handefa any amin’ny loholon’ilay kôngregasiôna hafa taratasy fampahafantarana miaraka amin’ny karatra Firaketana ny Fanompoan’ny Mpitorin’ny Kôngregasiônan’izany olona izany. — Ny Fanompoantsika, p. 104-105.
5 Mandinika indray ny asan’ny mpisava lalana ny mpitan-tsoratra, ka hampahafantatra amin’ireo loholona, indrindra fa ny mpiandraikitra ny fanompoana, izay rehetra mety ho zava-manahirana hitan’ireo mpisava lalana. Ampahafantariny ny mpitarika ny Fianarana ny Bokin’ny Kôngregasiôna ireo mpitory izay tapatapaka amin’ny fanompoana. Mitari-dalana eo amin’ny fandrindrana ny ezaka natao hikarakarana ireo tsy mitory intsony ny mpitan-tsoratra sy ny mpiandraikitra ny fanompoana. — Ny Fanompoantsika Ilay Fanjakana Janoary 1988, ao amin’ilay lahatsoratra hoe “Aoka Isika Hanampy Ireo Tsy Miasa”.
6 Amin’ny fahatakarana tsara kokoa ny andraikitry ny mpitan-tsoratra, dia enga anie isika hanao izay azontsika atao mba hahamora ny fanatanterahany ny fitandreman-draharahany. — 1 Kor. 4:2.