Mpiandraikitra Mitari-dalana — Ny Mpiandraikitra ny Sekolin’ny Fanompoana Teôkratika
1 Ny mpiandraikitra ny Sekolin’ny Fanompoana teôkratika dia zokiolona eo amin’ny ara-panahy, izay mikely aina amin’ny teny sy ny fampianarana, ka mendrika ny hahazo fanajana sy fiaraha-miasa avy amintsika. (1 Tim. 5:17). Inona avy ireo andraikiny?
2 Mikarakara ny fitahirizam-bokin’ny Sekolin’ny Fanompoana Teôkratika ao amin’ny Efitrano Fanjakana izy. Mahaliana azy fatratra ny mampirisika ireo rehetra manana ny toetra ilaina mba hisoratra anarana amin’ny sekoly. Ataony izay hahazoana antoka fa misy firaketana an-tsoratra araka ny marina voatahiry mba hanaovana ny fanendrena amin’ny fomba milamina, fara fahakeliny telo herinandro mialoha, isaky ny fotoam-pivoriana amin’ny sekoly. Mila ny mahafantatra tsara ilay kôngregasiôna izy, amin’ny fitadidiana ao an-tsaina ny mpianatra tsirairay sy ny fahaizany. Ny tenany mihitsy no miandraikitra ny fanendrena ireo anjara araka ny tokony ho izy, na dia mety hisy rahalahy hafa iray aza hanampy azy amin’ny fanomanana ny fandaharana amin’ny sekoly.
3 Tsy maintsy manomana amim-pahazotoana isan-kerinandro ilay mpiandraikitra, mandinika amin’ny tsipiriany ireo anjara anendrena mba hampianarana amin’ny fomba mandaitra ao amin’ny sekoly. Izany dia mahatonga azy ho afaka hihazona ilay kôngregasiôna ho feno risi-po amin’ilay fandaharana, sy hijery raha natao araka ny marina tsara ilay anjara nanendrena, ary hanasongadina ireo hevitra lehibe izay ho tafiditra ao amin’ny famerenana an-tsoratra.
4 Aorian’ny lahatenin’ny mpianatra tsirairay, ilay mpiandraikitra dia hidera ilay mpianatra sy hanazava hoe nahoana no tsara ny toetra iray manokana amin’ny fahaiza-mandahateny, na hoe nahoana no ilaina hohatsaraina izy io. Afaka manome fanampiana manokana ilay mpiandraikitra na ny olona iray notendreny, rehefa misy mila fampiofanana fanampiny mba hanomanana ny anjara sekoliny.
5 Tokony hanatrika tsy tapaka ilay sekoly isika mba handraisan-tsoa feno avy amin’ny fiezahana mafy ataon’ny mpiandraikitra ny Sekolin’ny Fanompoana Teôkratika sy ireo mpanolo-tsaina fanampiny, izay manompo eo ambany fitarihany. Tokony hanatontosa ny anjarantsika rehetra koa isika, ary hampihatra ny torohevitra izay noraisintsika, ary koa ny torohevitra omena ny mpianatra hafa. Amin’izany fomba izany no hanatsarantsika miandalana ny fahaizantsika mampiseho ny hafatr’ilay Fanjakana ampahibemaso sy ao amin’ny isan-trano. — Asa. 20:20; 1 Tim. 4:13, 15.