Maniry Hitarika Fampianarana Baiboly Aho!
1 Maro amintsika no efa naneho faniriana hahazo fampianarana Baiboly, ary misy antony matoa isika manao izany. Rehefa mampianatra Baiboly isika vao mahatratra ilay tanjontsika hanao mpianatra vaovao. (Matio 28:19, 20). Efa am-bolana na an-taonany maro mihitsy aza angamba ny maro amintsika no tsy mba nahatsapa ilay fifaliana manokana avy amin’ny fampianarana ny fahamarinana amin’olona. Inona no azontsika atao momba izany mandritra ny Novambra? Koa satria ny boky Fahalalana no atolotra amin’ity volana ity, dia afaka manao ezaka manokana isika mba hampiasa azy io hanombohana fampianarana Baiboly vaovao.
2 Manokàna faran’ny herinandro iray na mihoatra: Mampirisika ny rehetra izahay mba hanokana fotoana sasany amin’ity volana ity mba hifantohana amin’ny fanombohana fampianarana Baiboly vaovao. Tokony hifantina ireo faran’ny herinandro hampiasaina manokana ho amin’io zava-kendrena io ireo mpitarika Fianarana ny Bokin’ny kôngregasiôna, ary avy eo dia handamina ny fitambara-mpitory ao aminy hanao ezaka ifarimbonana eo amin’ny asa fiverenana mitsidika.
3 Ento any amin’ireo fivoriana ho amin’ny fanompoana, ireo firaketana an-tsoratra misy ny fiverenana mitsidika hataonao. Avy eo, dia tsidiho ireo izay naneho fahalianana, na nandray zavatra vita an-tsoratra, na nanatrika ireo fivoriana. Ataovy ho zava-kendrena voafaritra tsara ny hanomboka fampianarana amin’ny fitsidihana tsirairay.
4 Mampisehoa fomba fanaovana fianarana Baiboly: Any amin’ireo fivoriana ho amin’ny fanompoana nofantenana, dia tokony hisy fampisehoana voaomana tsara, izay mampiseho ny fomba hanombohana fampianarana any amin’ny fiverenana mitsidika. Afaka milaza toy izao ianao: “Olona maro no manana Baiboly, nefa tsy takatr’izy ireo fa mirakitra ny valin’ireo fanontaniana lehibe izay atrehintsika rehetra eo amin’ny fiainana izy io. [Asehoy ilay fanondroam-pejy ao amin’ny boky Fahalalana, ary vakio ny lohatenin’ny toko faha-3, faha-5, faha-6, faha-8, ary faha-9.] Afaka mahazo ireo hevitra fototra ao amin’ny Baiboly, ao anatin’ny volana vitsivitsy monja ianao, amin’ny fampiasana ity boky fianarana ity mandritra ny adiny iray eo ho eo isan-kerinandro. Raha tianao ny hifidy iray amin’ireto loha hevitra ireto, dia ho faly aho hampiseho aminao ny fomba fanaovana ilay fianarana.” Hazavao fa manana fandaharam-pianarana nohafohezina koa isika, raha misalasala ny hianatra ilay olona noho ny fahafenoan’ny fandaharam-potoanany. Asehoy ny bokikely Takina, ary lazao ny fahavononanao hampianatra azy lesona fohy iray isan-kerinandro mandritra ny 15 ka hatramin’ny 30 minitra.
5 Azo antoka fa hahita mpianatra vaovao isika rehetra, raha samy miara-miezaka mba hanomboka fampianarana sy mivavaka mba hotahin’i Jehovah ny ezaka mafy ataontsika! (1 Jaona 5:14, 15). Raha maniry hitarika fampianarana Baiboly ianao, dia mety ho izao no fotoana tsara hanombohana iray.