“Mifohaza Hatrany”
1 Rehefa avy nilaza ireo fisehoan-javatra lehibe izay hanamarika ny andro faran’ity fandehan-javatra ity i Jesosy, dia nampirisika mafy ny mpianany mba ‘hifoha hatrany’. (Marka 13:33, NW ). Nahoana no tsy maintsy mifoha hatrany ny Kristianina? Satria miaina ao anatin’ny fotoana mampidi-doza indrindra amin’ny tantaran’ny olombelona isika. Tsy afaka ny hanjary ho rendremana ara-panahy isika ka tsy hiharan’ny vokany. Izany dia hahatonga antsika tsy hankasitraka ilay asa izay nomen’i Jehovah hataontsika amin’izao fotoan’ny farany izao. Inona izany asa izany?
2 Maniraka ny vahoakany i Jehovah mba hanambara manerana ny tany ny vaovao tsara momba ny Fanjakany — ilay hany fanantenana ho an’ny olombelona. Ny fiarahantsika miasa akaiky amin’ny fandaminan’Andriamanitra dia mampahafantatra antsika ho Kristianina marina izay mitadidy ao an-tsaina ireo toe-javatra ankehitriny sy ny ilana hanampiana ny hafa handre ny “tenin’ny fiainana mandrakizay”. (Jaona 6:68). Amin’ny fandraisantsika anjara amin-jotom-po amin’io asa faran’izay lehibe io, dia manaporofo isika fa mifoha ara-panahy.
3 Voatosika hitory: Amin’ny maha Vavolombelon’i Jehovah antsika, dia tokony hijery ny lafy tsaran-javatra momba ny fanompoantsika isika. Manosika handray anjara amin’ny asa fitoriana ny fitiavantsika an’Andriamanitra sy ny mpiara-belona amintsika. (1 Kor. 9:16, 17). Amin’ny fanaovana izany, dia hamonjy ny tenantsika ary koa ireo izay mihaino antsika, isika. (1 Tim. 4:16). Enga anie isika ho tapa-kevitra ny handray anjara tsy tapaka araka izay azo atao, sy hiasa ela araka izay ilaina, eo amin’ny fitoriana ny Fanjakan’Andriamanitra — ilay fitondram-panjakana tsara indrindra mety hananan’ny olombelona!
4 Manjary latsa-paka ao an-tsaintsika ny maha maika ny fanompoantsika, noho ny zava-misy lehibe iray — ny fipoahan’ny fahoriana lehibe, eo am-panaovantsika io asa io. Ny tsy fahafantarantsika ny andro sy ny ora dia mitaky ny hifohazantsika sy ny hahavonona antsika hatrany amin’ny fotoana rehetra, ka hianteherantsika amim-bavaka amin’i Jehovah. (Efes. 6:18). Mitatra hatrany ny asa fitoriana. Indray andro any anefa, ary tsy ho ela , dia hahatratra ny fara tampony ilay asa fitoriana lehibe indrindra eo amin’ny tantaran’ny olombelona.
5 Araho amim-pahatokiana ilay baikon’i Jesosy mba ‘hifohazana hatrany’. Zava-dehibe kokoa noho ny hatramin’izay izany ankehitriny. Enga anie isika hanao izany amin’ny fahatsapana fahamaikana. Anio sy isan’andro, dia aoka isika hifoha sy ho mailo hatrany ara-panahy ary harisika eo amin’ny fanompoana an’i Jehovah. Eny, enga anie isika “[hifoha hatrany, NW ] ka hahonon-tena”. — 1 Tes. 5:6.