Tombontsoa Iray Misokatra ho An’ny Ankizy
1 Ray aman-dreny maro ankehitriny no mahatsiaro amim-pitiavana ny tombontsoa nananany, fony izy mbola ankizy nitombo tao amin’ny fahamarinana — ny Andro Fanelezana Gazety. Naorina tao amin’ny kongregasiona rehetra, tamin’ny 1949, io asa io. Indray mandeha isan-kerinandro, ny rehetra dia tsy maintsy nifantoka tamin’ny fizarana Ny Tilikambo Fiambenana sy ny Mifohaza!, teny amin’ny arabe, isan-trano, isaky ny fivarotana, ary tamin’ny fomba hafa. Tsy andrin’ny mpitory tanora indrindra indrindra ny handray anjara tamin’io asa io, satria nanome azy ireo fahafahana hiara-miasa tamin’ireo olon-dehibe tao amin’ny kongregasiona izany. Marina ve izany raha ny aminao, fony ianao mbola kely?
2 Asaivo mandray anjara ny zanakao: Ireo ankizy tena madinika, izay tsy mahay manombo-dresaka araka ny Soratra Masina eny am-baravarana, dia mbola afaka manolotra gazety ihany. Izany dia mitaky fianarana fomba fampiseho tsotra iray amin’ny alalan’ny fehezanteny fohy vitsivitsy. Mety ho ampy ny fanazavana fohy, momba ny sary eo amin’ny fonon’ilay gazety angamba. Tompon-trano maro no mandray avy hatrany ny gazety avy any amin’ny tanorantsika, ary matetika izy ireo no midera ny fahatsorana sy ny fitondran-tena tsaran’ireny tanora ireny. Azon’ny ankizy atao tsara io fanompoana io, noho ny fanampiana kely fotsiny, ka mahatonga azy handray anjara lehibe amin’ny fanelezana ny hafatra momba ilay Fanjakana. Mazava ho azy fa rehefa mihalehibe ny ankizy, dia haniry hanampy azy ireo ny ray aman-dreniny, mba hanohizany hanao fandrosoana eo amin’ny fampitomboana ny fahaizany mitory.
3 Nanomboka nitory isam-baravarana i Manuel, fony izy telo taona. Nampianatra azy hitadidy fomba fanolorana fohy iray ny ray aman-dreniny. Nitory tamin-jotom-po niaraka tamin’izy ireo izy, ka nahapetraka gazety sy bokikely ary taratasy mivalona maro. Nitory tsy ara-potoana koa izy. Indray mandeha, rehefa nitondra azy tany amin’ny zaridainam-panjakana mba hitsangantsangana ny ray aman-dreniny, dia nanao ny dingana voalohany izy mba hametraka taratasy mivalona sasany tamin’ny olon-kafa teo. Na dia mbola kely aza i Manuel, dia tena loharanom-pampaherezana ho an’ny ray aman-dreniny sy ho an’ny kongregasiona manontolo ny hafanam-pony ho an’ny fanompoana. — Ohab. 22:6.
4 Natao ho “Andro Fanelezana Gazety” ny asabotsy rehetra ao amin’ny Kalandrien’ny Vavolombelon’i Jehovah 2000. Ry ray aman-dreny, mampirisika anareo izahay mba hanavao indray ny fahaliananareo amin’io asa io, ka hanampy ny zanakareo handray anjara tsy tapaka, araka izay azo atao, amin’io tombontsoam-panompoana io.