Mankasitraka ny Faharetan’i Jehovah ve Ianao?
1 Raha tsy naneho faharetana tao anatin’ireo 10, 20 taona na mahery lasa i Jehovah, ka namela ny asa fitoriana hitatra, moa ve ianao ho nahalala ny fahamarinana? Tena velom-pankasitrahana isika fa namela olona betsaka kokoa “ho tonga amin’ny fibebahana” izy. Na izany aza, dia “ho avy tahaka ny mpangalatra” ny andro fitsarana lehiben’i Jehovah. (2 Pet. 3:9, 10). Noho izany, dia tsy tokony hoheverina ho mitaredretra amin’ny famaranana ity fandehan-javatra ity Andriamanitra, rehefa maneho faharetana. — Hab. 2:3.
2 Aoka ianao hangoraka ny olona: Tsy ho takatry ny saintsika velively ny fahari-pon’i Jehovah. Tsy tokony hohadinointsika ny zava-kendren’izy io. (Jona 4:1-4, 11). Hitan’i Jehovah ny toe-piainana mahonena misy ny olombelona, ka mangoraka azy ireo izy. Toy izany koa no tsapan’i Jesosy. Onena an’ireo vahoaka maro be nitoriany izy, ka naniry ny hitaran’ny asa fitoriana ny filazantsara, mba hisy hafa koa hanana fahafahana hahazo ny fiainana mandrakizay. — Matio 9:35-38.
3 Rehefa mamely ny voina sy ny loza, moa ve ny fontsika tsy miombona alahelo amin’ny olona tsy mahalala ny fahamarinana? Toy ny “ondry tsy manana mpiandry” ny olona ankehitriny, miezaka hiatrika sy hahazo ny hevitr’ilay fisafotofotoana maneran-tany. (Marka 6:34). Amin’ny fitoriana amin-jotom-po ny vaovao tsara, dia sady mampionona an’ireo izay manana fo manana fironana tsara isika, no mampiseho ny fankasitrahantsika ny faharetan’i Jehovah. — Asa. 13:48.
4 Ilaina maika ny hanaovana ny asantsika: Tamin’ny herintaona, dia 323 439 no natao batisa, ary maherin’ny 14 000 000 no nanatrika ny Fahatsiarovana. Tena olona betsaka lavitra tokoa no mety tsy hiara-ringana amin’ity fandehan-javatra ity! Tsy fantatsika hoe hanao ahoana ny haben’ilay “vahoaka be”. (Apok. 7:9, NW ). Tsy fantatsika hoe hatramin’ny oviana no haharetan’ny asa fitoriantsika. I Jehovah anefa dia mahalala. Hotorina mandra-pahafa-po azy ny vaovao tsara, ‘dia ho tonga ny farany’. — Matio 24:14.
5 Mihafohy ny fotoana sisa tavela, ary mananontanona ny andron’Andriamanitra. (1 Kor. 7:29a; Heb. 10:37). Tsy isalasalana fa “ny famonjena antsika dia akaiky noho ny tamin’ny andro vao ninoantsika”. (Rom. 13:11). Aoka isika tsy ho diso ny zava-kendren’ny faharetan’Andriamanitra. Aoka kosa isika ho maika ny hitory, mba hisy olon-kafa koa maniry ny fahamarinana, hahazo ny famindram-po lehiben’i Jehovah.