“Miadia ny Ady Tsaran’ny Finoana”
1 Nananatra an’i Timoty mba ‘hiady ny ady tsaran’ny finoana’ ny apostoly Paoly. (1 Tim. 6:12). Niaina nifanaraka tamin’ireo teny ireo ny tenan’i Paoly. Teo amin’ny faramparan’ny fiainany, dia niteny tamin-toky izy fa efa niady ny ady tsara ny tenany. (2 Tim. 4:6-8). Tamin’ny fomba rehetra, dia nanao ny fanompoana tamim-pahasahiana sy tamin-kerim-po ary tamim-piaretana izy. Amin’ny fanahafana ny ohatra navelany, dia afaka mahazo toky anaty toy izany koa isika fa manao araka ny fara herintsika eo amin’ny ady ataontsika mba hihazonana ny finoana kristianina.
2 Manaova ny ezaka ilaina: Nikely aina teo amin’ny fanompoana i Paoly. (1 Kor. 15:10). Toy izany koa no ataontsika rehefa mitady ireo olona mendrika rehetra eny amin’ny faritanintsika isika. (Matio 10:11). Mba hahitana ny sasany amin’izy ireo, dia mety hila ny hifoha maraina be isika mba hitoriana amin’ireo izay mifanena amintsika eny an-dalana. Na, mety hila ny hiasa amin’ny faran’ny tolakandro na amin’ny harivariva isika, mba hahitana olona tafody ao an-tranony.
3 Mila fahaiza-manitsy tena sy fandaharam-potoana tsara ny ho marim-potoana, rehefa mamonjy fivoriana ho amin’ny fanompoana eny amin’ny saha miaraka amin’ireo iray fianarana ny boky amintsika. Ohatra, ny sasany amin’ireo mpianakavin’ny Betela dia manao dia hatramin’ny adiny iray, na mandroso na miverina, mba handraisana anjara amin’ny fanompoana miaraka amin’ny kongregasiona nanendrena azy, amin’ny faran’ny herinandro. Afa-tsy izany koa, isika dia mety ho talanjona ny amin’ny mpitory sy ny fianakaviana sasany ao amin’ny kongregasionantsika, izay mandeha lavitra be, nefa tonga ara-potoana. Mendri-kotahafina ny ohatra ny amin’ny fahazotoana sy ny fahaiza-mandamin-javatra toy izany.
4 Tokony ho voatosika hanolokolo ny fahalianana rehetra hitantsika isika. Na dia rehefa mametraka zavatra vita an-tsoratra eny amin’ny arabe na mandritra ny fanaovana fanambarana tsy ara-potoana aza isika, dia mila miezaka ny hahazo ny adiresin’ilay olona. Avy eo isika dia afaka mitsidika azy mba hampitomboana ny fahalianany sy hiezahana hanomboka fampianarana Baiboly.
5 Aza tapatapaka amin’ny fanompoana: Nanao ny fanompoany tamin’ny fomba tsy niovaova sy tamin’ny fomba feno i Paoly. (Rom. 15:19). Ahoana ny aminao? Mandray anjara tsy tapaka amin’ny fanompoana ve ianao? Efa nandray anjara tamin’ny fanompoana ve ianao tamin’ity volana ity? Ny mpitarika ny Fianarana ny Bokin’ny Kongregasiona dia liana ny hahita fa handray anjara amin’ny fanompoana, mandritra ny Aogositra, ny tsirairay amin’ireo miara-mianatra boky aminy. Hanampy anao hanao izany izy.
6 Amin’ny fanahafana ny ohatra navelan’i Paoly, teo amin’ny fanohanana tamin’ny fomba feno ny vaovao tsara, dia hanohy ‘hiady ny ady tsaran’ny finoana’ isika.