Mampanankarena Antsika ny Fitahian’i Jehovah
1 Ny habetsahan’ny karaman’ny olona matetika no amaritana ny fahombiazany. Izany no antony iheveran’ny olona maro fa ny olona manam-bola no sambatra indrindra sy afa-po indrindra. Kanefa diso hevitra tanteraka ireo izay mihevitra fa afaka mividy fahasambarana amin’ny vola ny olona. (Mpit. 5:11). Tsy misy fifaliana maharitra ho an’ireo “ta-hanan-karena” ara-nofo. (1 Tim. 6:9). Mifanohitra amin’izany kosa fa, ny mpanompon’i Jehovah dia tena faly marina, ary izy ireo no olona manankarena indrindra eto ambonin’ny tany. (Ohab. 10:22; Apok. 2:9). Amin’ny heviny ahoana?
2 Porofon’ny harenantsika: Manana fahaiza-mahataka-javatra ara-panahy isika, ary koa fahazoana ny hevitry ny Tenin’Andriamanitra, ny Baiboly. Amin’ny alalan’ny fandaminany eto an-tany, i Jehovah dia manohy mampianatra antsika momba ny tenany sy ny Zanany, ho tombontsoantsika mandrakizay. Afaka manatona akaiky an’i Jehovah isika, sy manana fifandraisana akaiky aminy, noho izany fahazoana hevitra araka ny marina izany. (Jak. 4:8). Ny fahaizantsika manavaka ny tsara sy ny ratsy ary ny fanarahantsika ireo lalàn’Andriamanitra dia miaro antsika amin’ny aretina sy ny loza sasany. Matoky isika fa hanome izay ilaintsika i Jehovah, ka noho izany, dia mahatsapa fahafaham-po araka an’Andriamanitra sy fiadanan-tsaina isika. — Matio 6:33.
3 Mihavana sy miray saina amin’ny fianakaviantsika ara-panahy isika, satria mamboly ny vokatry ny fanahin’Andriamanitra. Tafaray noho ny fatoram-pitiavana matanjaka isika, ka tsy voatery hahatsiaro ho nilaozan’Andriamanitra na ny rahalahintsika na oviana na oviana, rehefa iharan’ny loza. — Gal. 6:10.
4 Misy heviny sy zava-kendrena ny fiainantsika. Raisintsika ho tombontsoa mahatalanjona ny mandray anjara amin’ny fitoriana ny vaovao tsara maneran-tany. Izany dia manome antsika fifaliana maharitra, satria isika manampy olona hanana fifandraisana tsara amin’Andriamanitra ka ho tafaray amintsika ao amin’ny fanompoam-pivavahana madio. Ny harenantsika sarobidy — ny fanompoana — dia manome voninahitra an’i Jehovah, no sady manome antsika ny fahafaham-po hoe manamasina ny anarany ny tenantsika. Mihazona toe-tsaina mijery ny lafy tsaran-javatra isika, noho ny fahafantarantsika fa ho tanteraka tsy ho ela ny fanantenantsika ny amin’ny hoavy.
5 Fanehoana ny fankasitrahantsika: Enga anie isika ho velom-pankasitrahana foana noho ireo fitahian’i Jehovah, izay mahatonga antsika ho ny olona manankarena indrindra eto ambonin’ny tany. (Ohab. 22:4). Raha maka fotoana isan’andro hisaintsainana momba izay ananantsika isika, izany dia hanosika antsika hisaotra an’i Jehovah, noho ny fitiavany feno fahalalahan-tanana, sy hanohy hanome azy ny fifikirantsika tsy mizarazara.