Sambatra ny Mpankatò ny Teny
1 Nilaza i Jesosy fa olona maro no ‘tsy hiraika’ toy ny tamin’ny andron’i Noa, mandritra ny fanatrehany. (Matio 24:37-39, NW ). Ampoizina àry izany fa olona maro no tsy hihaino ny vaovao tsara momba ilay Fanjakana. Inona no afaka manampy antsika hanana toe-tsaina falifaly hatrany eo am-panaovantsika ny fanompoantsika? — Sal. 100:2.
2 Voalohany, dia ilaina hotadidintsika fa samy avy amin’Andriamanitra na ny hafatra entintsika na ny fanirahana antsika hitory. Ny tsy fihainoan’ny olona eny amin’ny fanompoana, na dia manao araka izay fara herintsika aza isika, dia tena fandavany an’i Jehovah. Hanampy antsika hihazona ny fifaliantsika sy ny fahasambarantsika anaty amin’ny maha mpankatò ny Tenin’Andriamanitra antsika ny fitadidiana fa ankasitrahany ny fahatokiantsika eo amin’ny fitoriana. — Jak. 1:25.
3 Faharoa, dia mbola misy olona hanaiky ny fomba famonjen’i Jehovah foana. Na dia mety tsy hiraharaha aza ny sasany, dia misy olona toy ny ondry tokony hangonina, na dia amin’izao fotoan’ny farany efa lasa lavitra izao aza. Mila mitory hatrany isika, ka handeha any amin’izay “tanàna na vohitra” mba ‘hamantatra tsara izay mendrika’ ao. — Matio 10:11-13.
4 Manàna toe-tsaina tsara hatrany: Diso fanantenana ny sasany noho ny tantara ratsin’ny fivavahan-diso. ‘Nampahantraina sy nafoin’ity’ tontolo ity ny hafa. (Matio 9:36). Maro no mety ho tototry ny tsy fananana asa sy ny tsy fisian’ny fikarakarana fahasalamana ary ny tsy fisian’ny fandriampahalemana. Hanampy antsika haharitra eo amin’ny asantsika ny fahatakarana izany. Miezaha mafy hanomboka resaka momba ireo raharaha mampanahy mafy ny olona eo amin’ny faritanintsika. Ampio izy hahita fa ny Fanjakan’Andriamanitra ihany no vahaolana. Ampiasao ny Soratra Masina sy ny hevitra voafaritra tsara avy ao amin’ireo boky, mba hanohinana ny fony amin’ny vaovao tsara. — Heb. 4:12.
5 Ry mpankatò ny Tenin’Andriamanitra sambatra, tadidio foana izao: “Ny fifaliana avy amin’i Jehovah no fiarovana mafy ho anareo.” (Neh. 8:10). Tsy misy antony tokony hamoizana ny fifaliantsika. “Raha [mendrika, NW ] ny ao an-trano, dia aoka ho ao aminy ny fiadanana tononinareo; fa raha tsy [mendrika, NW ] izy, dia aoka hiverina aminareo ny fiadanana voatononareo.” (Matio 10:13). Manavao ny fifaliantsika sy ny herintsika i Jehovah sady mitahy ny fahatokiantsika, eo am-piaretantsika amim-paharetana amin’ny fanompoana masina ataontsika ho azy.