Ampahafantaro ny Anaran’i Jehovah sy ny Asany
1 “Miderà an’i Jehovah, miantsoa ny anarany; ataovy fantatra any amin’ny firenena ny asany. (...) Aoka hifaly ny fon’izay mitady an’i Jehovah.” (Sal. 105:1, 3). Nahita fifaliana lehibe ilay mpanao salamo nanoratra ireo teny ireo, rehefa nilaza tamin’ny hafa momba an’i Jehovah sy ny “asany”. Asa inona? Tsy isalasalana fa ireo asa mifandray amin’ny fanjakan’Andriamanitra be voninahitra sy amin’ny “famonjeny mahafaly”. — Sal. 96:2, 3; 145:11, 12.
2 Eo am-panatonantsika ny fotoan’ny Fahatsiarovana taona 2001, dia manana antony maro tokony hifaliana ny amin’ny asan’i Jehovah ho antsika isika. Ahoana moa izany? Tsy isalasalana fa fankalazana isan-taona lehibe indrindra ho an’ny Kristianina marina rehetra ny Sakafo Harivan’ny Tompo. Tsy misy fotoana hafa tahaka an’io satria lehibe sy manan-java-kendrena izy io ary miavaka ny fomba anaovana azy. Izy io dia fotoana tokony hahatsiarovantsika rehetra izay nataon’i Jehovah sy i Jesosy mba hamonjena antsika. Tsy mahagaga raha antenaintsika ny hahita fitombon’ny asa fanompoana eny amin’ny saha, rehefa mampahafantatra ny “famonjeny mahafaly” isika, mandritra ny fotoan’ny Fahatsiarovana!
3 Hanao ny asan’ny mpisava lalana mpanampy ve ianao? Tamin’ny Aprily lasa teo, dia nisy 1497 no nanao ny asan’ny mpisava lalana mpanampy. Afaka manao ny Aprily sy Martsa ho volana miavaka noho ny fampitomboana ny asa fanompoana ve isika, amin’ity taona ity? Misy asabotsy dimy ny volana Martsa, ary alahady dimy ny Aprily. Nanao fandaharana mba hanompo tontolon’ny andro tamin’ny faran’ny herinandro ny mpitory maro miasa ara-nofo isan’andro, hany ka nahavita ny asan’ny mpisava lalana mpanampy. Mba hanatratrarana ny 50 ora takina isam-bolana, dia mila 12 ora eo ho eo isan-kerinandro amin’ny antsalany, ny mpisava lalana mpanampy iray. Diniho amim-pitandremana ireo fandaharam-potoana anoroana hevitra ao amin’ny faritra voafefy eo amin’ny pejy faha-4. Hety aminao ve ny iray amin’ireo? Raha tsia, dia angamba ianao afaka manamboatra ny fandaharam-potoananao manokana mba hanaovana ny asan’ny mpisava lalana mpanampy amin’ny Martsa sy Aprily.
4 Tokony hanomboka dieny izao handrisika ny hafa hafana fo sy hanohana ny asa fanompoana mitombo ireo loholona. Nanao ny asan’ny mpisava lalana mpanampy avokoa ny loholona sy ny mpanampy amin’ny fanompoana rehetra tao amin’ny kongregasiona iray, tamin’ny taon-dasa, hany ka 64 tamin’ireo mpitory 121 no nanao ny asan’ny mpisava lalana tamin’ny Aprily! Faly koa ilay kongregasiona nahita mpitory tsy vita batisa enina nanomboka namerina tatitra tamin’ny Martsa sy Aprily. Izao tokoa no fotoana tsara indrindra hanontanian’ireo ankizy sy ireo vaovao ny loholona raha mahafeno fepetra hanomboka handray anjara amin’ny asa fitoriana amin’ny besinimaro izy ireo.
5 Mitondra fitahiana ny fiezahana bebe kokoa: Mahazo fitahiana maro ny kongregasiona izay mametra tanjona manokana sy manao ezaka fanampiny. Ny kongregasiona sasany dia mety hanantitrantitra manokana ny hamitana faritany tsy voasa matetika, na ny hifantohana amin’ny endri-pitoriana hafa, na ny hanaovana fanompoana amin’ny fotoana samy hafa mba hiresahana amin’ireo tsy tratra an-trano.
6 Voatery hanakana ny olona iray tsy hanao izay betsaka araka izay azony atao eo amin’ny fanompoana ve ny tsy fahasalamana na ny fahanterana? Tsy voatery ho izany foana. Ny anabavy iray 86 taona, izay voan’ny kansera, ohatra, dia nanao ny asan’ny mpisava lalana mpanampy, tamin’ny Aprily, na dia nivonto aza ny tongony. Nanjary afaka nandray anjara feno tamin’ny fanompoana izy, noho ny fanovany ny fomba fitoriny, ka nampitombo ny fiderany an’i Jehovah. Nandrisika azy sy ny kongregasiona izany.
7 Miomàna tsara ho amin’ny Fahatsiarovana: Amin’ny 8 Aprily ny Fahatsiarovana amin’ity taona ity. Koa satria alahady io, dia tokony ho maro no ho afaka hanatrika izany. Mety ho be indrindra noho ny hatramin’izay ny mpanatrika, raha 1) manatrika isika, ary 2) manasa ny hafa hanatrika ny Fahatsiarovana miaraka amintsika. Iza avy no tokony hasaintsika?
8 Jereo ao amin’ny firaiketana an-tsoratrao momba ny fanompoana eny amin’ny saha ny anaran’ireo nampiseho fahalianana tamin’ny fahamarinana, na dia mety ho tsy mitsidika azy tsy tapaka aza ianao. Roa na telo herinandro alohan’ny Fahatsiarovana, dia ataovy izay hitsidihana azy rehetra mba hanomezana azy ny fanasana amin’ny Fahatsiarovana. Tsara raha maka ireo olona liana any an-tranony ireo mpitory mba hitondra azy ireo any amin’ny Efitrano Fanjakana.
9 Misy ambiny ny taratasy fanasana amin’ny Fahatsiarovana any amin’ny kongregasiona sasany. Ny mpitan-tsoratry ny kongregasiona dia tokony hahazo antoka fa voaray amin’ny fotoana mety tsara ireo fanasana mba hahafahana hizara azy rehetra. Mety hirinao hosoratana amin’ny milina fanoratana na hatao sora-tanana mazava tsara, eo amin’ny zorony ambany amin’ilay taratasy fanasana, ny ora sy ny toerana hanaovana ny Fahatsiarovana. Na, azonao omena koa ny taratasy fanasana ho amin’ny fivoriana, misy ny adiresin’ny Efitrano Fanjakana, raha any no hanaovana ny Fahatsiarovana. Ampahatsiahivina isika fa tokony homena mivantana an’ilay tompon-trano ny taratasy fanasana amin’ny Fahatsiarovana, amin’ny ankamaroan’ny toe-javatra.
10 Tsarovy ireo tsy mitory intsony: Misy antony hifaliana rehefa manolo-tena ho an’i Jehovah ny olona iray ampianarina Baiboly ary manamarika izany amin’ny fandrobohana ao anaty rano. Isan-taona anefa, dia misy olona sasany eo anivontsika mijanona tsy miaraka amintsika intsony, ary mitsahatra tsy milaza amin’ny hafa ny anaran’i Jehovah sy ny asany. Rariny raha manahy isika. Na dia tsy nandao tanteraka ny fahamarinana aza ny ankamaroan’ireo tsy mitory intsony, dia mety tsy hitory intsony izy ireo satria kivy, na manan-java-manahirana manokana na fanahiana hafa eo amin’ny fiainana. (Matio 13:20-22). Mila fanampiana ireo malemy ara-panahy, mba hiverina ao amin’ny kongregasiona, mba tsy handrapahan’ny fandehan-javatr’i Satana azy. (1 Pet. 5:8). Amin’ity fotoan’ny Fahatsiarovana ity, dia irintsika ny hanao ezaka manokana mba hanampiana ireo rehetra tsy nitory intsony, nefa mahafeno fepetra, mba handray anjara indray amin’ny fitoriana ny vaovao tsara.
11 Tokony hampahafantarin’ny mpitan-tsoratry ny kongregasiona ny mpitarika ny fianarana ny boky izay rehetra tsy mitory intsony ao amin’ny fianarana ny bokiny. Ny Komitin’ny Fanompoan’ny Kongregasiona no hitari-dalana amin’ny fandaminana ny fitsidihana an’ireo rehetra tsy mitory intsony. Raha hita fa handray soa avy amin’ny fampianarana Baiboly azy ilay olona, dia tokony hojeren’ny mpiandraikitra ny fanompoana izay olona tsara toerana hitarika ilay fianarana, rehefa avy nanontaniany ireo anisan’ny komitin’ny fanompoana. Na dia mety tsy hilaina hatao mandritra ny fotoana lava aza ilay fianarana, dia afaka manao tatitra ny ora sy ny fiverenana mitsidika ary ny fampianarana Baiboly nataony ilay notendrena hitarika azy io.
12 Tamin’ny Aprily lasa teo, dia nanolotra gazety tamin’ny tovolahy iray teny an-dalana ny anabavy iray nanao isan-trano. Nolazain’ilay tovolahy fa Vavolombelona tsy mitory intsony ny vadiny. Nanontany izay toerana misy ny Efitrano Fanjakana izy, ary nanasa ilay anabavy mba hitsidika azy mivady. Ho vokatr’izany, dia nanatrika ny fivoriana nanaraka ilay mpivady ary nanaiky hianatra Baiboly.
13 Mivonòna hampitombo ny asa! Izao koa no nolazain’ilay mpanao salamo izay nilaza fa tokony hampahafantatra ny anaran’i Jehovah sy ny asany isika: “Mihirà ho Azy, mankalazà Azy; saintsaino ny fahagagana rehetra ataony. Ataovy ho reharehanao ny anarany masina”. (Sal. 105:2, 3). Aoka isika hampiseho ny fiahiantsika ny anarana lehiben’i Jehovah sy ny ‘fahagagana ataony’, amin’ny fampitomboantsika ny ezaka ataontsika eo amin’ny fanompoana, ka hanao ny fotoan’ny Fahatsiarovana ho lehibe indrindra noho ny hatramin’izay!
[Tabilao, pejy 4]
Fomba samihafa hahavitana 12 ora isan-kerinandro, hanaovana ny asan’ny mpisava lalana mpanampy
Andro Ora
Alatsinainy 1 2 − −
Talata 1 − 3 −
Alarobia 1 2 − 5
Alakamisy 1 − 3 −
Zoma 1 2 − −
Asabotsy 5 4 3 5
Alahady 2 2 3 2
Tontaliny: 12 12 12 12
Hety aminao ve ny iray amin’ireo fandaharana ireo? Raha tsia, nahoana raha manao ny fandaharam-potoananao manokana?