Aoka Ianao ho Mpifanila Trano Fakan-Tahaka
1 Hoy i Jesosy: “Tiava ny namanao tahaka ny tenanao”. (Matio 22:39) Tsy isalasalana fa ‘manao soa’ amin’ny mpiray finoana aminao ianao. Kanefa, afaka maneho fitiavana toy izany koa amin’ny olona eo amin’ny manodidina ve ianao? (Gal. 6:10) Amin’ny fomba ahoana avy?
2 Ampahafantaro hoe iza ianao: Fantatry ny mpifanila trano aminao ve fa Vavolombelona ianao? Raha tsy izany, nahoana raha mitsidika azy, ka mitory aminy, rehefa manompo eny amin’ny saha? Mety hahagaga anao ny vokany! Na mitoria aminy tsy ara-potoana, raha mora kokoa aminao izany. Mety hahita azy miasa eny an-tokotaniny na mitsangantsangana eny an-dalana eny ianao. Manatòna azy ka mitsikitsikia tsara. Miezaha hiresaka momba ny zavatra inoanao sy ny toerana misy ny Efitrano Fanjakana ary ny zavatra atao any. Ampahafantaro azy hoe iza avy eo amin’ny manodidina no mandeha any. Asao izy hivory. Aoka ianao ho tapa-kevitra ny hanambara ny vaovao tsara amin’ny fomba feno amin’ny olom-pantatrao rehetra.—Asa. 10:42; 28:23.
3 Manàna fitondran-tena fakan-tahaka: Sady milaza zavatra betsaka momba anao ny hatsaram-panahinao, no mety hamela anao hitory. ‘Mampahamendrika ny fampianaran’Andriamanitra’ koa izany. (Tit. 2:7, 10) Asehoy fa tena miahy ny mpifanila trano aminao ianao. Aoka ianao ho tsara fanahy sy hahay hahataka-javatra. Hajao ny zony, raha te ho irery na mila fahanginana izy ireo. Manehoa fiheverana ary manomeza fanampiana, raha sanatria misy marary. Tsidiho sy arahabao tonga soa ny fianakaviana vao nifindra. Mahafinaritra ny olona ary mahafaly an’i Jehovah ny hatsaram-panahy toy izany.—Heb. 13:16.
4 Kojakojao ny fanananao: Amin’ny maha mpifanila trano fakan-tahaka anao, dia tokony hikarakara ny tranonao ianao mba tsy hahamenatra olona izy io. Efa fanambarana ho an’ny hafa ny trano sy ny tokotany madio sy manintona. Azo inoana kosa fa hanaratsy ny hafatra momba ilay Fanjakana ny trano maloto na ahitana fako miparitaka. Noho izany, dia tsara mihitsy raha madio sy voakojakoja foana ny tranonao sy ny tokotaninao ary ny fiaranao.
5 Raha maneho fiheverana ny olona any ivelan’ny kongregasiona kristianina ianao, dia hampiseho fa tia ny namanao. Inona no mety ho vokatr’izany? Mety ‘hankalaza an’Andriamanitra’ mihitsy ny sasany, ‘noho ny fahitany ny asa tsara ataonao’.—1 Pet. 2:12.