Mandraisa Anjara Amin’ny Fomba Feno Amin’ny Fijinjana
1 Samy niresaka momba ny asa fanangonana na ireo mpaminanin’i Jehovah fahiny, na i Jesosy Kristy. (Isaia 56:8; Ezek. 34:11; Jaona 10:16) Tanterahina amin’ny alalan’ny fitoriana maneran-tany ny vaovao tsaran’ilay Fanjakana io asa io ankehitriny. (Matio 24:14) Manjary miavaka tsara ankehitriny ny manompo an’Andriamanitra sy ny tsy manompo azy. (Mal. 3:18) Inona no hevitr’izany ho antsika?
2 Fahatsapana Andraikitra: Afaka manahaka an’i Paoly, izay nandray anjara feno tamin’ny fanompoana kristianina, isika. Tsapany fa tsy maintsy natao ny asa fitoriana, mba hahafahan’ny olona handre ny vaovao tsara ka ho voavonjy. Nanosika azy hiasa mafy ho azy ireo izany. (Rom. 1:14-17) Olona maro no tandindomin-doza ankehitriny. Tsy manana andraikitra lehibe kokoa àry ve isika hitory amin’ireo olona ao amin’ny faritanintsika?—1 Kor. 9:16.
3 Asa maika: Azo ampitahaina amin’ny famonjena olona tratran’ny horohoron-tany ny asa fitoriana. Tadiavina ny olona mba hamonjena azy haingana. Voafetra ny fotoana ary aina no hovonjena! Tsy mahagaga raha nampirisika mafy ny mpianany i Jesosy mba ‘hangataka amin’ny Tompon’ny vokatra mba hampandehanany mpiasa hamory ny vokatra’.—Matio 9:38.
4 Mahatsapa ny maha maika ilay asa ny mpitory maro ka mandray anjara bebe kokoa amin’io asa famonjena aina io. Miara-mipetraka amin’ny reniny sy ny zandriny efatra ny zatovo iray antsoina hoe Hirohisa. Mifoha amin’ny telo maraina izy mba hivarotra gazety, hahazoana vola hanampiany ny ankohonany. Na izany aza, dia nanao ny asan’ny mpisava lalana maharitra i Hirohisa satria naniry hanao fanompoana bebe kokoa. Misy fomba ahafahanao mandray anjara bebe kokoa amin’ity asa indray mandeha tsy hiverina ity ve?
5 “Efa fohy ny andro”. (1 Kor. 7:29) Aoka àry isika hanao araka izay fara herintsika amin’ilay asa lehibe indrindra tanterahina ankehitriny, dia ny fitoriana ny vaovao tsaran’ilay Fanjakana sy fanaovana mpianatra. Nampitahain’i Jesosy tamin’ny asa fijinjana io fanompoana io. (Matio 9:35-38) Mety handray soa amin’ny fanampiana olona ho isan’ny olona betsaka voalazan’ny Apokalypsy 7:9, 10 isika, rehefa mandray anjara amin’ny fomba feno amin’io fijinjana io.