Tanterahinao Amin’ny Fomba Feno ve ny Fanompoanao?
1 Milaza amintsika ny bokin’ny Asan’ny Apostoly fa nanatanteraka ny fanompoany tamin’ny fomba feno ireo mpianatr’i Jesosy, tamin’ny ‘fanambarana’ ny vaovao tsara tamin’ny olona. (Asa. 2:40; 8:25; 28:23) Izany indrindra no nataon’ny apostoly Paoly. (Asa. 20:24) Tsy izany koa ve no tanjonao amin’ny maha mpitory ny vaovao tsara anao? Ahoana no hahatanterahanao izany?
2 Omany ny fomba fitorianao: Tena ilaina ny fanomanana, raha tianao handaitra ny fanompoanao. Marina indrindra izany rehefa manolotra gazety, satria miova foana ny foto-kevitra. Mba hanampiana antsika ho vonona kokoa, dia misy zavatra vaovao ato amin’ny Fanompoantsika Ilay Fanjakana, manomboka amin’ity volana ity. Izany dia io tsanganana eo amin’ny ankavia io, izay ahitana fomba fampiseho ireo gazety Ny Tilikambo Fiambenana sy Mifohaza! farany. Foto-kevitra iray izay hahaliana olona maro no hasongadina, avy amin’ny nomerao tsirairay. Ahoana no azonao ampiasana ireo fomba fampiseho fohy ireo?
3 Mifidiana foto-kevitra iray izay heverinao fa tena handaitra eo amin’ny faritaninareo. Vakio tsara ilay lahatsoratra mifandray aminy, ary mariho izay hevitra mety hisarika ny fahalianan’ny olona. Mitadiava andininy iray mifanentana amin’ny resakao ao amin’ilay gazety, sy mety ho azonao vakina amin’ny tompon-trano. Manomàna famaranan-teny fohy mba hampirisihana ilay olona hamaky ilay gazety. Raha mety, dia lazao amin’ny teny fohy fa azony atao ny manao fanomezana ho an’ny asan’ny Vavolombelon’i Jehovah maneran-tany. Anaovy famerenana amin’izay àry ilay fomba fitorianao.
4 Miomàna hampiasa ny Baiboly: Raha miomana tsara ianao, dia ho afaka hampiasa andinin-teny iray. Mpitory za-draharaha maro, ohatra, no mahita vokatra tsara rehefa manatona varavarana, ka efa mihazona ny Baiboly eny an-tanany, miarahaba ny tompon-trano, ary manao hoe:
◼ “Manontany ny olona izahay raha mino ity voalaza ity izy...” Vakio ny Genesisy 1:1, ary manontania hoe: “Ekenao ve, tompoko, io voalaza eo io?” Raha manaiky ilay olona, dia milazà hoe: “Mitovy hevitra aminao koa aho. Kanefa, raha namorona ny zavatra rehetra Andriamanitra, milaza ve izany, araka ny hevitrao, fa Izy koa no nahatonga ny faharatsiana?” Rehefa avy nisaotra ilay olona noho ny valin-teniny ianao, dia vakio ny Mpitoriteny 7:29. Sokafy ao amin’ny pejy faha-71 ny boky Fahalalana, ary vakio ny fehintsoratra faha-2. Ampirisiho ilay olona hamaky ilay boky.
5 Kolokoloy ny fahalianana hita rehetra: Tsy ho afaka hanatanteraka amin’ny fomba feno ny fanompoanao ianao, raha tsy manolokolo ny fahalianana hitanao. Raha nahafinaritra ny resakao tamin’ny olona iray, dia soraty ny anarany sy ny adiresiny, na nandray zavatra hovakina izy na tsia. Miezaha hampitombo ny fahalianan’ilay olona amin’ny fiverenana haingana any aminy. Manolora fampianarana Baiboly.
6 Fantatr’ireo mpianatra tamin’ny taonjato voalohany fa nandidy azy mba “hanambara” ny hafatr’Andriamanitra i Jesosy. (Asa. 10:42) Mihatra amintsika koa io baiko io, satria izany ihany no fomba hanaovantsika mpianatra. (Matio 28:19, 20) Aoka àry isika hanao araka izay fara herintsika ka hanatanteraka amin’ny fomba feno ny fanompoantsika.—2 Tim. 4:5.