Asa Mamelombelona
1 Velombelona izay mandray sy mampihatra ny hafatra ara-baiboly eo amin’ny fiainany. (Sal. 19:7, 8) Manampy azy hiala amin’ny fampianaran-diso sy fanao manimba izany, ary manome azy fanantenana azo antoka. Tsy ireo mandray ny vaovao tsara ihany anefa no mandray soa. Velombelona koa izay milaza ny fahamarinana ara-baiboly amin’olon-kafa.—Ohab. 11:25.
2 Ahazoana hery ny fanompoana: Nilaza i Jesosy fa ‘hahita fitsaharana ho an’ny fanahiny’ izay manaiky hitondra ilay zioga maha mpianatr’i Kristy azy. (Matio 11:29) Hitan’i Jesosy fa manome hery ny mitory. Toy ny sakafo izany ho azy. (Jaona 4:34) Faly ireo mpianatra 70 nirahin’i Jesosy hitory, satria hitany fa nanohana ny ezaka nataony i Jehovah.—Lioka 10:17.
3 Mahazo hery koa ankehitriny ny Kristianina mandray anjara amin’ny asa fitoriana. Hoy ny anabavy iray: “Mamelombelona ahy ny fanompoana, satria mampisy heviny ny fiainako. Maivana kokoa ny zava-manahirana sy ny adim-piainana mahazatra, rehefa manao fanompoana aho.” Hoy koa ny mpitory be zotom-po iray: “Ny fanompoana no . . . mampahatsiahy ahy isan’andro fa tena misy i Jehovah. Izy io koa no ahazoako fiadanana sy fahasambarana, izay tsy ho azoko amin’ny fomba hafa mihitsy.” Tena voninahitra ho antsika ny hoe “mpiara-miasa amin’Andriamanitra”!—1 Kor. 3:9.
4 Mora ny ziogan’i Kristy: Tsy mitaky amin’ny Kristianina mihoatra noho izay mety ho vitany i Jesosy, na dia asaina miezaka mafy aza isika. (Lioka 13:24) Tia antsika tokoa izy, ka asainy miara-mitondra aminy ny ‘ziogany’ isika. (Matio 11:29) Afaka matoky ireo miatrika zava-tsarotra, fa tena mampifaly an’Andriamanitra ny fanompoana ataony amin’ny fony manontolo, na dia voafetra ihany aza izany.—Marka 14:6-8; Kol. 3:23.
5 Mamelombelona tokoa ny manompo an’Andriamanitra, satria ankasitrahany izay ataontsika ho an’ny anarany, na inona izany na inona! (Heb. 6:10) Enga anie isika hiezaka hatrany hanao araka izay fara herintsika ho azy.