Fandaharana Vaovaon’ny Fivoriambe Manokana Iray Andro
Betsaka ny torohevitra omena antsika amin’izao andro izao mba hahasalama tsara ny fontsika, ka hahatonga antsika hankafy kokoa ny fiainana, sy ho ela velona kokoa. Mbola zava-dehibe noho izany anefa ny fahasalaman’ny fontsika ara-panahy. Tena mety àry ilay foto-kevitry ny fivoriambe manokana iray andro manomboka ny Septambra 2003, hoe: “Manompoa An’i Jehovah Amin’ny Fo Manontolo.” (1 Tant. 28:9) Inona avy no hianarantsika amin’io fivoriambe io?
Hamelabelatra ilay lahateny hoe “Ampio ny Hafa Hanompo An’i Jehovah Amim-pifaliana”, ny mpiandraikitra ny faritra. Hisy fanadinadinana amin’io lahateny io, ka hasongadina amin’izany ny fifaliana azon’ireo mpitory nanampy sy nampianatra ireo olona maniry hanompo an’i Jehovah. Azo antoka fa hahazo fampiononana sy fampaherezana ny rehetra mandritra ilay lahateny voalohany hataon’ny mpandahateny mpitsidika, hoe “Tandremo ny Fonao eto Amin’ity Tontolo Mikorontana Ity.” Ny lahatenin’ny batisa no hamarana ny fotoam-pivoriana maraina.
Hiresaka ny amin’ny fomba azontsika anampiana ny hafa ilay lahateny amin’ny tolakandro hoe “Miezaha Manampy ny Hafa.” Inona no azon’ny ray aman-dreny atao mba hiarovana ny fon’ny zanany amin’ny fitaoman-dratsy sy hanampiany azy ireo hanatona an’i Jehovah? Hanolotra fanipazan-kevitra mahasoa sy ny fomba azo ampiharana izany ilay lahateny hoe “Ampio ny Zanakao Hanompo An’i Jehovah Amim-pifaliana.”
Hararaotintsika ve ny fandaharana rehetra ataon’i Jehovah mba hahasalama sy hampahatanjaka hatrany ny fontsika ara-panahy? Hanasongadina fandaharana lehibe efatra mila ataontsika tsy tapaka mba hahasalama ara-panahy hatrany, ilay lahateny farany hataon’ny mpandahateny mpitsidika hoe “Manompoa Hatrany An’i Jehovah Amin’ny Fo Manontolo.” Manao ahoana ny habetsahan’ny fotoana lanintsika sy ny ezaka ataontsika hivavahana amin-kafanam-po, hianarana ny Tenin’Andriamanitra, hitoriana amin-jotom-po, ary hiarahana amin’ny Kristianina hafa? Misy lafiny sasany tokony hohatsaraintsika ve amin’ireo?
Manasa antsika i Jehovah hoe: “Ampiekeo famaizana ny fonao, sy tenim-pahalalana ny sofinao.” (Ohab. 23:12) Manaova fandaharana dieny izao àry, mba ho tonga amin’io andro handraisana fampianarana mahasoa avy amin’ny Soratra Masina io. Hahazo hery ianao, ka hanohy hanompo an’i Jehovah amin’ny fo manontolo sy amim-pifaliana.