Ahoana no Azontsika Anampiana ny Vady Tsy Vavolombelona?
1 Mifandray tsara amin’ny fiangonana ny sasany amin’izy ireny, nefa miahotra ny ho tonga mpanompon’Andriamanitra. Nilaza toy izao ny vadin’ny anabavy iray: “Ilay hoe handeha hitety trano no tena nampiahotra ahy.” Ny hafa indray angamba mila miala amin’ny fahazarana tsy araka ny Soratra Masina. Mety hihevitra koa izy ireo fa tsy ho arany mihitsy ireo fandaharana ara-panahy maro ataon’ny vadiny. Ahoana no azontsika anampiana azy ireo?
2 Manehoa fiheverana manokana: Mety hanaiky ny fahamarinana ara-baiboly ny olona, rehefa hitany fa miahy azy manokana isika, ary mahamarika izay zavatra mampanahy azy. (Fil. 2:4) Rehefa lasa Vavolombelon’i Jehovah ireny olona ireny atỳ aoriana, dia matetika miresaka momba ny fiahiana sy fitiavana nasehon’ireo Vavolombelona. “Niahy ahy manokana i José, anti-panahin’ny fiangonana”, hoy ny vadin’ilay anabavy noresahintsika tetsy ambony. “Nampahery ahy izy, ary izany no tena nahatonga ahy hianatra tsara tamin’ny farany.” Tadidin’ny vadin’ny anabavy iray hafa fa niezaka niresaka momba izay nahaliana azy, ireo rahalahy nitsidika azy. “Niova tanteraka ny fomba fijeriko ny finoan’ny vadiko”, hoy izy. “Tena manam-pahalalana ireo namany, sady afaka miresaka zavatra isan-karazany.”—1 Kor. 9:20-23.
3 Manomeza fanampiana azo tsapain-tanana: Mety hanohina ny fon’ny vady tsy Vavolombelona koa ny fanampiana azy amin-katsaram-panahy. (Ohab. 3:27; Gal. 6:10) Simba ny fiaran’ny vady tsy Vavolombelona iray, ka nisy tanora Vavolombelona tonga nanampy azy. “Tena nanohina ahy tokoa izany”, hoy izy. Nanamboatra ny fefy manodidina ny tanànany ny vadin’ny anabavy iray izay tsy Vavolombelona. Nandany andro iray manontolo ny rahalahy iray mba hanampiana azy. Lasa mpinamana ry zareo rehefa niara-niasa sy niresadresaka. Nanatona an’ilay rahalahy ilay ramose, tapa-bolana tatỳ aoriana ary nilaza hoe: “Tonga izao ny fotoana hanaovako fiovana sasantsasany eo amin’ny fiainako. Ahoana raha ampianarinao Baiboly aho?” Nandroso haingana izy, ary Vavolombelona vita batisa amin’izao fotoana izao.
4 Aoka isika hanohy hanampy ny vadin’ireo mpiray finoana amintsika, rehefa mitady izay mendrika ao amin’ny faritanintsika.—1 Tim. 2:1-4.