Fitafiana sy Fihaingoana Mendrika
1 “Tsy misy tahaka anareo Vavolombelon’i Jehovah! Tsara fanahy sy manao fitafiana mendrika ary mahay manaja ianareo.” Izany no tenin’ny solontenan’ny hotely iray momba an’ireo rahalahy sy anabavy nanatrika fivoriamben’ny vondrom-paritra, tamin’ny herintaona. Hoy koa ny mpiasan’ny hotely tany amin’ny fivoriambe iray hafa: “Hita fa mampifaly an’Andriamanitra ny fomba fitafinareo.” Tena voamariky ny olona ireo mpamonjy fivoriambe, hany ka tiantsika ho “mendrika ny vaovao tsara” ny fomba fitafintsika. Mahatonga azy ireo hidera antsika izany, ary mampiharihary fa mpanompon’Andriamanitra isika. (Fil. 1:27) Mety àry ny hieritreretana mialoha momba ny fitafiana sy fihaingoana, rehefa miomana ho amin’ny fivoriambe isika.
2 Hoy i Jakoba mpianatra: ‘Ny fahendrena avy any ambony dia madio aloha.’ (Jak. 3:17) Sarotra indraindray ny maneho taratry ny fahadiovana sy fahamaotinana eo amin’ny fitafiantsika. Mampirisika ny olona hanao fitafiana tsy maotina, manaitaitra ny filan’ny nofo, ary sampontsampona mantsy ny tontolon’i Satana maloto fitondran-tena. Tsy mety amintsika anefa izany. (1 Jaona 2:15-17) Koa rehefa manapa-kevitra momba ny fitafiana sy fihaingoana isika, dia tokony hihevitra ny fampitandreman’ny Baiboly mba ‘handa izay mifanohitra amin’ny sitrapon’Andriamanitra sy ny fanirian’izao tontolo izao, ary hisaina, eto amin’ity tontolo ankehitriny ity.’ (Tit. 2:12) Tsy tiantsika ho tafintohina mihitsy noho ny fitafiantsika, na ny rahalahintsika, na ny mpiasan’ny hotely, na ny mpitazana.—1 Kor. 10:32, 33.
3 Fitafiana maotina sy milamina tsara: Manontania tena toy izao rehefa miomana ho amin’ny fivoriambe ianao: ‘Maotina ve ny fitafiako, sa misarika be ny saina ho amin’ny tenako? Manaja ny fihetseham-pon’ny hafa ve ilay izy? Mampiseho tratra na fohy kely ve ny akanjoko? Sa manara-batana na mifinjifinjy? Madio sy tsy mamofompofona ve ny fitafiako? Hadio sy hilamina toy ny mpanompon’Andriamanitra ve aho rehefa miala voly aorian’ny fivoriambe, sa hisavoritaka, ho ara-damaody na baranahiny be loatra ny fitafiako, ka tsy ho mendrika ny hanao karatry ny fivoriambe? Hahatonga ahy tsy ho sahy hitory tsy ara-potoana ve ny fitafiako?’—Rom. 15:2, 3; 1 Tim. 2:9.
4 Hahasoa antsika ny soso-kevitr’ireo Kristianina matotra. Tokony hanontany ny vadiny ny vehivavy raha mety hanafintohina ny hafa na tsia ny fomba fitafiny. Afaka manampy ny zanany tanora ny ray aman-dreny kristianina amin’io lafiny io. Ny anabavy manana fitondran-tena mendrika koa dia afaka ‘manampy ny vehivavy tanora hahatsapa tena, hisaina’ ary hanao fitafiana mendrika, “mba tsy hitenenan-dratsy ny tenin’Andriamanitra.” (Tit. 2:3-5) Misy sary maro mampiseho akanjo maotina sy milamina tsara ao amin’ireo boky sy gazetintsika.
5 Manomeza voninahitra an’i Jehovah: Tsy ireo manana anjara amin’ny fandaharana ihany, fa isika rehetra koa no afaka manome voninahitra an’i Jehovah, any amin’ny fivoriamben’ny vondrom-paritra. Mazava ho azy fa hanome voninahitra azy ny fitondran-tena sy fitenintsika. Ny fitafiana sy ny fihaingoantsika anefa no zavatra voalohany marihin’ny olona. Enga anie isika rehetra hanome voninahitra an’i Jehovah amin’ny fitafiana sy fihaingoana mendrika!—Sal. 148:12, 13.
[Fanontaniana]
1. Nahoana no tokony hoeritreretina ny momba ny fitafiana sy fihaingoana, rehefa miomana ho amin’ny fivoriambe isika?
2. Nahoana no sarotra ny manao fitafiana sy fihaingoana maotina?
3. Inona avy no fanontaniana hanampy antsika handinika ny fitafiantsika?
4. Inona no azon’ny hafa atao mba hanampiana antsika hanao fitafiana maotina?
5. Inona no azontsika rehetra atao mba hanomezana voninahitra an’i Jehovah any amin’ny fivoriambe?
[Efajoro, pejy 5]
Inona no Manampy Antsika Hanao Fitafiana Mendrika?
◼ Tenin’Andriamanitra
◼ Fandinihan-tena
◼ Soso-kevitry ny hafa
◼ Boky sy gazetintsika