Miderà An’i Jehovah eo Amin’ny Fiangonana Lehibe
1 I Jehovah Andriamanitra no Mpampianatra Lehibe, ka nanao ny fivoriana izy mba hianarantsika ny lalany. (Isaia 30:20, 21; 54:13) Ny mpanompo mahatoky sy malina no asainy mandamina ireny fivoriana ireny, ary anisan’izany ny fivoriamben’ny vondrom-paritra fanaontsika isan-taona. (Matio 24:45-47) Fotoana tena tsara hanomezam-boninahitra an’i Jehovah ny fivoriambe. Miombom-pihetseham-po amin’i Davida, izay nihira toy izao, isika: “Hisaotra Anao eo amin’ny fiangonana lehibe aho; hidera Anao eo afovoan’ny olona maro aho.” (Sal. 35:18) Ho anisan’ireo “fiangonana” hanatrika ny Fivoriamben’ny Vondrom-paritra “Mankatoava An’Andriamanitra” ve ianao amin’ity taona ity? Raha izany, dia hanampy anao hiomana hanatrika azy io ny fanazavana manaraka.
2 Miomàna dieny izao hanatrika mandritra ny telo andro: Tena ilaina ny miomana tsy misy hataka andro, mba hanatrehana ny fivoriambe. Karakarao dieny izao àry izay rehetra ilaina, mba hanatrehanao mandritra ny telo andro. Tsy ho diso anjara amin’ilay sakafo ara-panahy mampahery horaisina any ianao amin’izay. Raha mila mangataka andro tsy hiasana ianao, dia ataovy dieny izao izany. Raha tsy Vavolombelona ny vadinao, dia aza miandry ho efa am-poto-moty vao miresaka aminy momba ny zavatra kasainao hatao mifandray amin’ny fivoriambe. Ataovy antom-bavaka izay zava-tsarotra atrehinao. Matokia fa hanampy anao i Jehovah, ary hataony “lavorary izay kasainao.” (Ohab. 16:3) Tsara koa raha ampianao ny olona ampianarinao Baiboly, mba hiomana hanatrika mandritra ny telo andro.
3 Ahoana no ahafahantsika vahoakan’i Jehovah miara-midera azy, mandritra ny Fivoriamben’ny Vondrom-paritra “Mankatoava An’Andriamanitra”? Tafiditra amin’izany ny fitondran-tenantsika. Hoy ny lehiben’ny toerana iray nanaovana fivoriambe: “Rehefa nahita ny fivoriambenareo izahay, dia nampirisika ny fivavahana hafa te hampiasa an’ity toerana ity, mba ho tonga hijery ny fomba fikarakaran’ny Vavolombelon’i Jehovah fivoriambe. Tomombana tsara mantsy ny fomba fandaminanareo zavatra.” Mandray anjara amin’izany fiderana mendrika an’ilay Andriamanitsika izany isika tsirairay, amin’ny alalan’ny fomba fitafy sy ny taovolontsika, ny fiaraha-miasantsika ary ny fitondran-tenantsika.—1 Pet. 2:12.
4 Fomba fitafy sy taovolo: Tokony ho maotina ny fomba fitafy sy taovolontsika, ho fiderana an’i Jehovah. (1 Tim. 2:9) Izao no voalaza ao amin’ny boky Sekolin’ny Fanompoana, eo amin’ny pejy faha-132: “Tsy manafintohina ny hafa tsy amin’ny antony ny olona maotina. Tsy misarika be loatra ny sain’ny hafa ho amin’ny tenany koa izy.” Lasa fahazarana ny manao akanjo tsy maotina any amin’ny tany maro. Tena faly anefa i Jehovah, rehefa miezaka ny ho solontena mendrika azy ianao. (Asa. 15:14) Marina fa mety ho kianja fanaovana fanatanjahan-tena na toeran-kafa fialam-boly no hanaovana ny fivoriambe, nefa ho toeram-pivorian’ny “fiangonana lehibe” ilay izy mandritra ny telo andro. Tokony hanao fitafiana mendrika an’i Jehovah àry isika, satria izy no ambony indrindra eran’izao rehetra izao.—1 Tant. 29:11.
5 Tokony hasiantsika fiheverana koa ny fomba fitafy sy ny taovolontsika isan’andro aorian’ny fotoam-pivoriana. Te hanao akanjo mampahazo aina kokoa angamba isika, rehefa hiala voly na hisakafo any amin’ny hotely. Tokony ho mendrika ny olona “milaza ho mpivavaka amin’Andriamanitra” foana anefa ny fomba fitafy sy ny taovolontsika. (1 Tim. 2:10) Tsy hoe rehefa akanjo be mpitia eo amin’izao tontolo izao, dia azo ekena. (1 Jaona 2:16, 17) Manampy antsika ny sary ao amin’ny boky sy gazetintsika, satria mampiseho akanjo maotina sy milamina tsara ho an’ny lehilahy sy ny vehivavy amin’ny fotoana samihafa. Raha eny amintsika foana koa ny karatry ny fivoriambe, dia hampahatsiahy antsika izany fa Kristianina isika amin’ny fotoana rehetra.—2 Kor. 6:3, 4.
6 Hajao ny latabatr’i Jehovah: Rehefa hamaky ny Soratra Masina i Ezra, dia ‘nitsangana ny olona rehetra’, ho fanajana sy ho fiomanana hihaino ny toromarika homena azy. “Nampandry sofina hihaino” izy rehetra avy eo, rehefa namaky i Ezra. (Neh. 8:3, 5, 6) Nihaino tamim-panajana izy ireo, satria niaiky fa i Jehovah no niresaka taminy. Toy izany koa ve no ataontsika mandritra ny fivoriambe?
7 Manao fanasambe ho antsika ilay Tompo Fara Tampony eo amin’izao rehetra izao. (Isaia 25:6; 1 Kor. 10:21) Hataontsika tanjona ny hanatrika ny fivoriambe mandritra ny telo andro, raha tena mankasitraka ny toerantsika eo amin’ny latabatr’i Jehovah isika. Efa nikarakara ny filasiana sy ny fitaterana ary ny andro tsy hiasana ve ianao? Efa noeritreretinao koa ve ny fotoana hatokanao hiomanana sy hankanesana any amin’ny fivoriambe? Hataonao ampy tsara ve izany, mba ho tonga aloha ianao, ka hahita toerana, hifanerasera amin’ireo rahalahy, ary hiara-midera an’i Jehovah amin’izy ireo amin’ilay hira sy vavaka fanokafana?—Sal. 147:1.
8 Hihaino tsara ny fandaharana isika, raha manaja ny latabatr’i Jehovah, fa tsy hiresadresaka, na hisakafo, na hivezivezy eny amin’ny lalantsara. Manome sakafo ara-panahy tena ilaintsika amin’izao fotoana izao i Jehovah, amin’ny alalan’ny mpanompo mahatoky sy malina. (Matio 24:45) Ilay fandaharana manontolo no ilaintsika rehetra, ka tsy misy tokony hatao an-tsirambina. Tokony hiara-mipetraka amin’ny zanany ny ray aman-dreny, ary hanampy azy ireo handray soa feno.—Deot. 31:12.
9 Angatahina isika hitondra sakafo antoandro, fa tsy hitady sakafo any ivelan’ny toerana hanaovana fivoriambe. Mendri-piderana ny ankamaroan’ny mpanatrika, satria nanaraka tsara izany toromarika izany. Antenaina fa isika rehetra mihitsy no hanao izany amin’ity taona ity! (Heb. 13:17) Ho afaka hifampahery amin’ireo rahalahintsika isika amin’izay. Hampisy firaisan-tsaina sy fiadanana koa izany, ka hanome voninahitra an’i Jehovah.—Sal. 133:1.
10 Fanampiana manokana: Nilaza ny apostoly Paoly fa nisy rahalahy “nanampy sy nankahery” azy. (Kol. 4:7-11) Nanome ny zavatra sasany nilain’i Paoly, ohatra, izy ireo. Ahoana no hahafahanao ‘hanampy sy hankahery’ ny hafa mandritra ny fivoriambe? Mila ampiana angamba ny mpitory be taona, ny kilemaina, ary ny mpanompo manontolo andro, amin’ny resaka fitaterana na filasiana. Ny mpianakaviny no tompon’andraikitra voalohany amin’izany. (1 Tim. 5:4) Afaka manampy azy ireo anefa ny mpiray finoana, rehefa tsy afaka manao izany ny mpianakaviny. (Jak. 1:27) Tokony hiresaka amin’ireo mila fanampiana manokana ao amin’ny fianarana bokiny ny mpiandraikitra tsirairay, mba ho azo antoka fa ho vita aloha ny fiomanany rehetra hanatrika fivoriambe.
11 Fanatrehana fivoriambe hafa: Ampirisihina hanatrika ny fivoriambe anendrena ny fiangonany ny mpitory, mba ho ampy ny toerana, ny boky hozaraina, ny filasiana, sy ny sisa. Tokony hanoratra any amin’ny Biraon’ny Sampana ny anti-panahy mikasa hanatrika fivoriambe hafa, mba hahafantaran’ny Biraon’ny Fivoriambe hoe aiza izy no hanatrika.
12 Ilaina ny mpiasa an-tsitrapo: Nanome modely tonga lafatra i Jesosy, rehefa nanetry tena ka nikarakara izay nilain’ny hafa. (Lioka 9:12-17; Jaona 13:5, 14-16) Toy izany ny toe-tsain’ireo mpiasa an-tsitrapo any amin’ny fivoriambe. Tsy ho ela dia hangataka mpiasa an-tsitrapo ny Komitin’ny Fivoriambe, mba hiara-miasa amin’ireo sampan-draharaha isan-karazany any amin’ny fivoriambe. Ny anti-panahy indrindra no mila mirotsaka amin’izany sy manaiky izay asa anendrena azy. Ohatra tsara ho an’ny rehetra eo anivon’ny fiangonana ny fahazotoan’izy ireo.—1 Pet. 5:2, 3.
13 Fitoriana tsy ara-potoana: Betsaka ny fotoana azontsika hararaotina hiderana an’i Jehovah amin’ny molotsika, rehefa eny an-dalana ho any amin’ny fivoriambe sy rehefa miverina. (Heb. 13:15) Aoka isika hanararaotra hitory amin’ny olona eny amin’ny manodidina ny toerana ilasiantsika, na any amin’ny hotely isakafoantsika. Ho feno zava-tsarobidy ara-panahy ny saina sy ny fontsika, ka aoka isika hizara izany amin’ireo olona mihaona amintsika.—1 Pet. 3:15.
14 Tsy andrintsika mihitsy ny hiderana an’i Jehovah eo anivon’ny ‘fiangonana.’ (Sal. 26:12) Koa enga anie àry isika hiara-midera an’i Jehovah, mandritra ilay Fivoriamben’ny Vondrom-paritra “Mankatoava An’Andriamanitra.”
[Fanontaniana]
1, 2. Fotoana tena tsara hanaovana inona ny fivoriambe, ary ahoana no anaovantsika izany?
3. Inona no vokatry ny fitondran-tenantsika eo amin’ny olon-kafa?
4, 5. Tokony hanao ahoana ny fitafiantsika mandritra ny fotoam-pivoriana sy aorian’izany, mba ho maotina sy mendrika ny Kristianina?
6. Inona no ohatra tsara navelan’ny olona tamin’ny andron’i Ezra?
7, 8. Ahoana no ampisehoantsika fa manaja ny latabatr’i Jehovah isika?
9. Inona no angatahina amintsika mandritra ny sakafo antoandro, ary nahoana?
10. Ahoana no ikarakarana ny mpitory mila fanampiana manokana?
11. Nahoana isika no tokony hiezaka hanatrika ny fivoriambe anendrena ny fiangonantsika?
12. Inona no toe-tsaina tokony hananantsika, ho fankasitrahana ny fandaminana atao amin’ny fivoriambe?
13, 14. Inona no fotoana hafa azontsika hararaotina hiderana an’i Jehovah?
[Efajoro, pejy 5]
Fampahatsiahivana Momba ny Fivoriambe
◼ Fandaharam-potoana: Hanomboka amin’ny 9.30 maraina ny fivoriambe mandritra ireo telo andro. Hipetraka eny amin’ny lampihazo ny mpitari-draharaha, minitra vitsivitsy alohan’ny hanombohan’ny fotoam-pivoriana, ary hisy mozikan’ilay Fanjakana halefa. Tokony haka toerana daholo isika amin’izay fotoana izay, mba hanombohana ilay izy amin’ny fomba mendri-kaja. Hifarana amin’ny 5.05 hariva ny fivoriambe ny zoma sy asabotsy, ary amin’ny 4.10 hariva kosa ny alahady.
◼ Famandrihan-toerana: Izay olona miray fiara na trano aminao ihany no azonao amandrihana toerana.
◼ Fanomezana: Betsaka ny vola lany hikarakarana fivoriamben’ny vondrom-paritra. Afaka mampiseho ny fankasitrahantsika isika, rehefa manao fanomezana an-tsitrapo ho an’ny asa maneran-tany, any amin’ny Efitrano Fanjakana na any amin’ny fivoriambe.
◼ Fotoam-pivoriana ho an’ny marenina: Hadika amin’ny baikon’ny moana ny fandaharana manontolo, amin’ny fivoriambe ataon’ny Antananarivo faha-3. Ampirisiho ny mpitory sy ny olona liana rehetra izay marenina, mba hanatrika io fotoam-pivoriana manokana io.
◼ Sakafo antoandro: Iangaviana ianareo hitondra sakafo antoandro, fa tsy hitady sakafo any ivelan’ny toerana hanaovana fivoriambe. Azo atao ny mitondra harona azo apetraka eo ambany seza. Tsy azo atao kosa ny mitondra tavoahangy mora vaky sy zava-pisotro misy alkaola ary harona lehibe loatra mety hanelingelina ny hafa.
◼ Fandraisam-peo: Tsy azo ampifandraisina amin’ny fitaovana elektrika na fanamafisam-peon’ny fivoriambe, ny fitaovana fandraisam-peo anao manokana. Azonao atao ny mampiasa fitaovana fandraisam-peo raha tsy manelingelina ny mpanatrika izany.
◼ Fakana sary: Aza mampiasa flash raha maka sary ianao mandritra ny fotoam-pivoriana.
◼ Telefaonina entin-tanana: Aza atao manelingelina ny hafa ny telefaoninao.
◼ Fitsaboana vonjimaika: Ilazao ny mpikarakara ny mpanatrika hitanao eo akaiky eo, raha misy toe-javatra ilana fitsaboana vonjimaika. Izy no hampilaza ny Sampan-draharahan’ny Fitsaboana Vonjimaika, mba hisy olona za-draharaha hijery izay mitranga ary hitondra fanampiana.