Valin’ny Fanontanianareo

◼ Ahoana no ahazoantsika ny gazety Ny Tilikambo Fiambenana sy Mifohaza!?

Amin’ny alalan’ny fiangonana no tokony hakan’ny mpitory rehetra ny gazetiny, afa-tsy ny gazety amin’ny soratra Braille sy kasety, izay alefa maimaim-poana any amin’ireo mahafeno fepetra hahazo izany. Tokony hohafarana amin’ny alalan’ny Fanafaran’ny Fiangonana (M-202) kosa ny gazety amin’ny sora-baventy sy amin’ny fiteny vahiny.

Ataovy azo antoka fa hahazo haingana ireo nomerao tsirairay amin’ny gazety ny olona ao amin’ny faritaninao, izay nangataka mba hanaterana izany tsy tapaka. Afaka maka gazety sy boky hafa any amin’ny Efitrano Fanjakana ireo voaroaka. Tsy tokony ho anisan’ireo olona fanateran’ny mpitory gazety tsy tapaka anefa izy ireny.

Ny hany famandrihana hokarakarain’ny sampana eto Madagasikara, dia ny an’ireo tsy afaka ny hahazo gazety amin’ny alalan’ny mpitory eo anivon’ny fiangonana. Azon’ny Komitin’ny Fanompoana alefa atỳ amin’ny biraon’ny sampana ny famandrihana, rehefa tsy misy fomba hafa ankoatra izany hahazoan’ilay olona ny gazetiny. Tokony hasian’ny mpitan-tsoratra taratasy fohy miaraka amin’ilay fangatahana, manamarina fa efa nodinihin’ny Komitin’ny Fanompoana ilay famandrihana ary nekeny ny hanaovana izany.

Midika izany fa tsy tokony hisy mpitory hanoratra atỳ amin’ny biraon’ny sampana mba hangataka famandrihana. Haverina any amin’ny fiangonana ilay fangatahana, raha misy mpitory na olona liana manao toy izany.

◼ Ahoana kosa no ahazoan’ny voafonja ny gazetiny?

Ny mpitory tonga mitsidika ilay voafonja no hanome gazety azy, raha afaka manome ireo gazety ilain’ny voafonja ilay fiangonana misahana ny fitoriana ao. Raha tsy izany kosa, dia azon’ilay voafonja atao ny manoratra amin’ny biraon’ny sampana ary mangataka famandrihana. Aza hadinoina fa afaka mahazo ny gazetiny amin’izany fomba resahina eto izany koa ny olona voaroaka izay migadra.