Ampiasao Amin’ny Fomba Tsara Indrindra Ireo Gazetintsika
1 Rehefa manatona trano heva fivarotan-gazety ianao, inona no hitanao? Gazety. Eny amin’ny fivarotana eny an-joron-dalana, inona no misarika ny sainao? Gazety. Inona no mampamokoka ny faktera eo ambanin’ny havesatry ny kitapony? Gazety. Araka izany, inona no vakin’ny olona maro? Gazety. Nasehon’ireo fanadihadiana fa tanora 9 amin’ny 10 eo anelanelan’ny 10 ka hatramin’ny 18 taona, ary isan-jato mitovy amin’izany amin’ny olon-dehibe no mamaky fara fahakeliny gazety iray isam-bolana. Izao tontolo izao dia liana amin’ny gazety.
2 Azontsika atao ve ny hanao izay hahaliana ireo olona tso-po amin’ny Ny Tilikambo Fiambenana sy ny Mifohaza!? Eny, raha toa ISIKA ka mahatsiaro foana Ny Tilikambo Fiambenana sy ny Mifohaza! Inona no afaka manampy antsika? Diniho ireto fanoloran-kevitra ireto:
◼ Vakio ireo gazety: Ny mpiandraikitra mpitety faritany iray dia nanao tatitra fa, amin’ny antsalany, dia mpitory 1 amin’ny 3 monja ao anatin’ny fizaran-taniny no mamaky manomboka amin’ny voalohany ka hatramin’ny farany ny nomerao tsirairay amin’ny Ny Tilikambo Fiambenana sy ny Mifohaza! Ary ianao? Rehefa mamaky ny lahatsoratra tsirairay ianao, dia manontania tena toy izao: ‘Iza no hankasitraka itỳ fanazavana itỳ — ny reny iray, ny agnostique iray, ny mpandraharaha iray, ny tanora iray ve?’ Ao amin’ny gazetinao manokana dia mariho ny hevitra iray na roa izay azonao ampiasaina rehefa manolotra ilay gazety. Avy eo, dia eritrereto ny fomba mety hanairanao ny fahalianana amin’ilay foto-kevitra ao anatin’ny fehezanteny iray na roa monja.
◼ Manàna fanafarana gazety voafaritra: Apetraho amin’ilay rahalahy mikarakara ny gazety ny fanafaranao gazety araka ny zava-misy, ka voafaritra ny isany isaky ny nomerao. Amin’izany fomba izany ianao sy ny fianakavianao dia hanana tahirin-gazety tsy tapaka sy ampy.
◼ Ampidiro ao amin’ny fandaharam-potoana ny andro fanelezana gazety tsy tapaka: Kongregasiona maro no manokana andro iray voatondro ho amin’ny fanambarana amin’ny alalan’ny gazety, voalohany indrindra. Afaka manohana ny Andro Fanelezana Gazety alamin’ny kongregasiona ve ianao? Raha tsia, dia miezaha mampiasa fotoana sasany amin’ny fanompoana mba hanaovana fanambarana eny amin’ny arabe amin’ny alalan’ny gazety amin’ny fomba tsy tapaka sy hizaranao ny gazety isam-baravarana sy amin’ireo lalana fizarana gazety.
◼ Tsarovy foana “Ny Tilikambo Fiambenana” sy ny “Mifohaza!”: Mitondrà gazety any aminao rehefa manao dia na miantsena ianao. Manolora azy ireny rehefa miresaka amin’ny mpiara-miasa, ny mpifanila trano, ny mpiara-mianatra, na ny mpampianatra ianao. Ny mpivady iray izay manao dia matetika amin’ny fiaramanidina dia mampiasa hevitra iray ao amin’ny gazety vao haingana mba hanombohana resaka amin’ny mpandeha mipetraka eo akaikiny. Nahita fanandraman-javatra nahafinaritra maro izy ireo. Ny tanora sasany dia mitondra tsy tapaka any an-tsekoly lahatsoratra izay heveriny fa hahaliana ny mpampianatra azy ireo na ireo mpiara-mianatra. Mitondrà gazety any aminao rehefa manatontosa irakiraka ianao, ary rehefa vita ny raharahanao dia atolory amin’ny mpivarotra izy ireny. Maro amintsika no mividy lasantsy tsy tapaka; nahoana raha manolotra ny gazety amin’ilay mpivaro-dasantsy? Ataovy akaiky ho azo raisina izy ireny rehefa mitsidika ireo havana, rehefa mampiasa fitateram-bahoaka ianao, na rehefa miandry olona nifanaovana fotoana ianao. Afaka mieritreritra ny amin’ny tarehin-javatra hafa mifanentana ve ianao?
◼ Manomàna fomba fampiseho gazety fohy: Kendreo ny tsy hilaza afa-tsy zavatra kely, nefa lazao mazava izany. Aoka ianao ho feno hafanam-po. Tohino ny fo. Aoka ho voafaritra tsara izay lazainao. Mifantena hevitra iray avy ao amin’ny lahatsoratra iray, lazao amin’ny teny fohy izy io, ary atolory ireo gazety. Ny fomba fampiseho tsara indrindra dia ny mametraka fanontaniana iray momba ny foto-kevitra iray mahaliana ary avy eo dia ny manondro lahatsoratra iray izay manome ny valiny araka ny Soratra Masina. Diniho ny ohatra vitsivitsy ny amin’ny fomba azo anaovana izany:
3 Raha manasongadina lahatsoratra iray momba ny fitomboan’ny tahan’ny heloka bevava ianao dia ho azonao atao ny hanontany toy izao:
◼ “Inona no ilaina mba hahatonga hety ny hatoriantsika amin’ny alina tsy misy tahotra ny heloka bevava?” Mety tsy hanantena ny hihatsaran’ny zavatra ilay tompon-trano. Afaka mamaly ianao fa olona maro no mihevitra mitovy amin’izany ary manampy teny fa manana fanazavana izay inoanao fa hahaliana azy ianao. Avy eo, dia resaho ny hevitra iray mifanentana hita ao amin’ilay lahatsoratra.
4 Rehefa manolotra lahatsoratra iray momba ny fiainam-pianakaviana dia ho azonao atao ny hilaza toy izao:
◼ “Olona maro no mahita fa tena zava-tsarotra ny fahazoana fivelomana sy ny mamelona fianakaviana amin’izao andro izao. Boky maro be no nosoratana ny amin’ilay foto-kevitra, nefa na dia ireo manam-pahaizana aza dia tsy mitovy hevitra ny amin’ireo vahaolana amin’ny zava-manahirana antsika. Mety hisy ve any ho any toerana azontsika aleha mba hahazoana fitarihana azo ianteherana?” Avy eo dia tondroy ny fanazavana voafaritra tsara ao amin’ilay gazety izay mampiseho ny fahendrena hita ao amin’ny Baiboly.
5 Ho azonao atao ny handray itỳ tari-dresaka itỳ rehefa manasongadina lahatsoratra iray momba ny zava-manahirana ara-tsosialy:
◼ “Ny ankamaroan’ny olona dia ao anatin’ny fanerena amin’izao andro izao. Tsy nikasa velively ny hiainantsika amin’izao fomba izao Andriamanitra.” Avy eo, dia asehoy ny fomba ahafahan’ny fanazavana miorina amin’ny Baiboly ao amin’ilay lahatsoratra manampy antsika hiezaka handresy ireo zava-manahirana amin’ny fiainana ankehitriny ary manome fanantenana ny amin’ny vahaolana iray maharitra amin’ny hoavy.
6 Mandaitra ny fanambarana eny amin’ny arabe: Tao amin’ny nomeraon’ny L’Informateur (Ny Fanompoantsika Ilay Fanjakana) tamin’ny Janoary 1940 (anglisy) no nampirisihana voalohany ny mpitory mba handamina andro manokana isan-kerinandro ho amin’ny fanambarana eny amin’ny arabe, ka hampiasana ireo gazety. Manao fanambarana eny amin’ny arabe ve ianao indraindray? Raha manao izany ianao, tena mandaitra tokoa ve ny fomba ampiasainao? Voamarika fa ny mpitory sasany dia mijoro eny an-joron-dalana be olona sady mifampiresaka, ary anefa olona maro no mandalo eo akaikiny tsy voamariny akory. Toy izay hijoro mifanakaiky sady mitana ireo gazety, dia mandaitra kokoa ny misaraka sy manatona ny olona. Ireo olon-tsy fantatra dia mety hijanona sy hihaino vetivety raha toa ka hatonin’ny olona iray monja izy, nefa vitsy no hanan-kevitra hanatona antokon’olona varian-dresaka. Koa satria isika misarika be dia be ny saina eny amin’ny arabe, dia ilaina manokana ny fisehoana ankapobe tsara sy ny fitafiana amim-pahamaotinana, araka ny mahamendrika ny mpanompon’Andriamanitra. — 1 Tim. 2:9, 10.
7 Ireo lalana fizarana gazety: Ireo izay manana lalana fizarana gazety dia mahapetraka gazety maro na dia voasa tsy tapaka aza ireo faritany. Ireo lalana fizarana gazety dia loharano tsara dia tsara mety hahazoana fampianarana Baiboly any an-tokantrano.
8 Rehefa manao fiverenana mitsidika tsy tapaka ianao mba hametraka ireo gazety, dia ho hitanao fa hitombo ny hafanana sy ny fisakaizana eo aminao sy ilay tompon-trano. Arakaraka ny hifankahalalanareo tsara kokoa no hahamora kokoa ny miresaka momba ireo foto-dresaka araka ny Soratra Masina. Izany dia mety hitarika ho amin’ny fanombohana fampianarana Baiboly ahitam-bokatra any an-tokantrano. Any amin’ireo fitsidihana izay ahitana fankasitrahana miharihary an’ireo gazety, dia manolora famandrihana. Ary tadidio fa isaky ny mifandray amin’ilay tompon-trano ianao dia azonao taterina ho fiverenana mitsidika iray izany.
9 Ny anabavy iray dia nitondra gazety tsy tapaka ho an’ny vehivavy iray izay nandray azy ireny foana nefa nilaza hoe: “Tsy mino izay lazainao amiko aho”. Tamin’ny fitsidihana iray tatỳ aoriana, ilay anabavy dia nifanena tamin’ny vadin’ilay ramatoa tao an-trano. Rehefa avy nanao resaka tamim-pisakaizana, dia nisy fandaharana noraisina mba hanombohana fampianarana Baiboly. Ilay anabavy dia ninamana tamin’ireo zanakalahy telo izay nanjary nianatra koa. Tamin’ny farany, ilay reny sy ireo zanakalahy dia nanolotra ny fiainany ho an’i Jehovah ary natao batisa. Hatramin’izao dia 35 amin’ny mpianakaviny no nanaiky ny fahamarinana. Izany rehetra izany dia noho ilay anabavy nanolokolo ny lalany fizarana gazety!
10 Misy fomba maro hanombohana lalana fizarana gazety. Afaka manomboka lalana fizarana gazety ianao amin’ny fitanana an-tsoratra fotsiny ny olona nametrahanao gazety ary amin’ny fanaovana fandaharana mba hiverina isan-tapa-bolana miaraka amin’ireo nomerao farany indrindra. Ny fomba iray koa dia ny fampiasana ny filazana eo ambanin’ny lohateny hoe “Ao Amin’ny Nomerao Manaraka”. Rehefa miverina ianao, dia lazao amin’ilay tompon-trano fa anananao ilay lahatsoratra noresahinao teo aloha. Na, rehefa manao ilay fiverenana mitsidika, dia ho azonao atao ny hilaza toy izao: “Rehefa namaky itỳ lahatsoratra itỳ aho, dia nieritreritra fa mety hahaliana anao izy itỳ (...)” Avy eo dia manomeza fanazavana vitsivitsy fohy momba ilay lahatsoratra ary atolory izy io. Rehefa avy nahavita ilay fitsidihana dia mariho eo amin’ny fandraisanao an-tsoratra isan-trano ireto lafiny dimy tsotra ireto: 1) ny anaran’ilay tompon-trano, 2) ny adiresin’ilay tompon-trano, 3) ny daty nitsidihana, 4) ireo gazety voapetraka, sy 5) ny lahatsoratra nasongadina. Ny mpitory sasany dia tena nahomby tamin’ny fampitomboana lalana fizarana gazety, ka nahangona hatramin’ny fitsidihana 40 na mihoatra teo amin’ny lisitr’izy ireo!
11 Faritany be fivarotana: Gazety maro no voapetrak’ireo mpitory izay miasa amin’ny faritany be fivarotana. Efa nanandrana ny asa isam-pivarotana ve ianao? Ireo tatitra dia manondro fa any amin’ny kongregasiona sasany dia voafetra ihany ny fandraisana anjara amin’itỳ lafiny amin’ny fanompoana itỳ. Amin’ny voalohany, dia matahotra ny hitsidika ireo olona manao raharaham-barotra ny sasany, nefa rehefa avy manandrana azy io fotoana vitsivitsy izy ireo dia mahita azy io ho sady mahaliana no mahafa-po. Nahoana no tsy mangataka amin’ny mpitory iray na mpisava lalana iray ampy fanandraman-javatra mba hanampy anao hanomboka?
12 Misy soa maromaro azo amin’ny fiasana isam-pivarotana. Vitsy dia vitsy no tsy tratra an-trano, fara fahakeliny mandritra ireo ora fanaovan-draharaham-barotra! Ireo mpanao raharaham-barotra mazàna dia manaja, na dia mety tsy ho liana manokana amin’ny Baiboly aza izy ireo. Manomboha aloha be; azo inoana fa horaisina tsara kokoa ianao. Rehefa avy nampahafantatra ny tenanao ianao, dia ho azonao atao ny hilaza fa mahalana ianao vao mahita ireo mpanao raharaham-barotra any an-tranony, koa mitsidika azy ireo minitra vitsivitsy monja eo amin’ny toeram-piasany àry ianao mba hanolotra ireo nomerao farany indrindra amin’ny Ny Tilikambo Fiambenana sy ny Mifohaza! Mariho fa mpanao raharaham-barotra maro no mankasitraka ireo gazetintsika satria ilain’izy ireo ny haharaka ireo fisehoan-javatra eo amin’izao tontolo izao, kanefa izy ireo tsy manam-potoana firy hamakian-teny. Ireo gazety dia manolotra fanazavana mampisaintsaina avy amin’ny fomba fijery hafa, tsy misy fitsarana an-tendrony ara-pivavahana, ara-politika na ara-barotra. Mety ho azo ampitomboina amin’ireo olona liana hita eny amin’ny faritany be fivarotana, ny lalana fizarana gazety.
13 Miomàna amin’ny maha-fianakaviana: Mandritra ny fianaram-pianakavianao dia mety hisy fotoana sasany ho azo atokana mba hiaraha-midinika izay lahatsoratra ao amin’ireo gazety farany indrindra mety ho azo ampiasaina ao amin’ny faritaninareo. Ireo mpianakavy — tafiditra amin’izany ny ankizy — dia afaka mifandimby mba hanao fanazaran-tena amin’ny fomba fampisehony sy amin’ny fandresena ireo fanoherana fahita apoitra, toy ny hoe: “Sahirana aho”, “Manana ny fivavahanay manokana izahay”, na “Tsy mahaliana ahy izany”. Ny fiaraha-miasa tsara dia mahatonga hety ny handraisan’ny fianakaviana manontolo anjara tsy tapaka amin’ny fizarana gazety.
14 Afaka manampy ireo mpitarika ny fianarana ny boky: Na inona na inona fotoana azo anaovana izany, dia ataovy any amin’ny toerana fanaovana fianarana ny boky ireo fivoriana ho amin’ny fanompoana amin’ny Andro Fanelezana Gazety, toy izay any amin’ny Efitrano Fanjakana no hivory ny kongregasiona manontolo. Ireo izay miandraikitra ireo fivoriana ho amin’ny fanompoana eny amin’ny saha dia tokony ho voaomana tsara, hanana fanoloran-kevitra voafaritra tsara ho an’ilay antokon’olona. Izany dia mety hahatafiditra fomba fampiseho iray modely sy hevitra iray na roa avy ao amin’ireo nomerao vao haingana izay mety ho azo ampiasaina mba hanairana ny fahalianana eo an-toerana. Ireo fivoriana ho amin’ny fanompoana eny amin’ny saha — tafiditra amin’izany ny fandaminana ilay antokon’olona — dia tokony ho fohy, tsy haharitra mihoatra ny 10 ka hatramin’ny 15 minitra. Tokony hanao izay hahazoana antoka ireo mpitarika ny fianarana ny boky fa ampy ny faritany mba hahafahan’ilay antokon’olona hiasa mandritra ny fe-potoana manontolo hanompoana eny amin’ny saha.
15 Manehoa fankasitrahana ireo gazety: Ilay lahatsoratra hoe “Fampiasana Tsara Ny Tilikambo Fiambenana sy ny Mifohaza!” navoaka tao amin’ny Ny Fanompoantsika Ilay Fanjakana tamin’ny Jolay 1993 dia nilaza izao hevi-dehibe izao: ‘Tsy very ny lanjan’ny Ny Tilikambo Fiambenana sy ny Mifohaza! na dia tsy voapetraka ao anatin’ny volana iray na roa aorian’ny daty nivoahany aza izy rehetra. Ny fanazavana raketiny dia tsy manjary mihem-bidy noho ny fandehan’ny fotoana (...) Ny famelana ireo gazety tranainy kokoa hiangona sy ny tsy fampiasana azy ireo mihitsy dia fanehoana tsy fankasitrahana ireo fitaovana sarobidy ireo (...) Tsy ho tsara kokoa ve ny hanaovana ezaka manokana mba hametrahana azy eny an-tanan’ireo olona liana toy izay hanilika ireo nomerao tranainy ka hanadino azy ireny?’
16 Amin’izao andro izao dia olona tso-po maro no eo am-pikarohana ny fahamarinana. Ny fanazavana ao anatin’ny gazety iray dia mety ho izay ilainy mba hitarika azy ireo ho amin’ny fahamarinana! Nomen’i Jehovah mba hotorintsika ny hafatra iray mampientam-po, ary ireo gazetintsika dia mandray anjara tena lehibe amin’ny fitondrana ilay hafatra ho an’ny hafa. Hahatsiaro bebe kokoa ny fanelezana gazety ve ianao amin’ny hoavy? Hampihatra ny sasany amin’ireto fanoloran-kevitra ireto ve ianao amin’itỳ faran’ny herinandro itỳ? Hahazo fitahiana tondraka ianao raha manao izany.
Fanoloran-kevitra azo ampiharina:
◼ Vakio mialoha ireo gazety ary fantaro ireo lahatsoratra.
◼ Mifantena lahatsoratra iray izay miresaka momba ny zavatra mahaliana ny ankamaroan’ny olona ao amin’ny fiaraha-monina misy anao.
◼ Manomàna fomba fampiseho iray izay hifanentana amin’ny olona isan-karazany, na lehilahy na vehivavy na tanora izany. Asehoy hoe amin’ny fomba ahoana no mahakasika ilay tompon-trano ilay gazety ary ny fomba handraisan’ny fianakaviana manontolo soa amin’izy io.
◼ Manaova planina mba hanao ny asa fanompoanao eny amin’ny saha amin’ny fotoana maha-ao an-tranony ny ankamaroan’ny olona. Ny kongregasiona sasany dia mandamina fanaovana fanambarana amin’ny takariva amin’ny alalan’ny gazety.
◼ Hazony ho fohy sy mivantana ny fomba fampisehonao.
◼ Aza miteny haingana loatra. Raha toa ka tsy liana ilay olona iresahanao, ny firesahana haingana kokoa dia tsy hanampy. Miezaha mba ho tony, ary omeo fahafahana hamaly ilay tompon-trano.
Rehefa manolotra ireo gazety isan-trano:
◼ Aoka ianao ho sariaka sy hanana feo mahafinaritra.
◼ Manehoa hafanam-po momba ireo gazety.
◼ Miresaha miadana sy mazava tsara.
◼ Foto-kevitra iray ihany resahina; tairo fohy ny fahalianana, ary asehoy ilay tompon-trano ny mampisy vidiny azy io.
◼ Lahatsoratra iray monja asongadina.
◼ Gazety iray ihany asongadina, ka atolory ho toy ny namany ilay hafa.
◼ Omeo eny an-tanan’ilay tompon-trano ireo gazety.
◼ Ampahafantaro ilay tompon-trano fa mikasa ny hiverina ianao.
◼ Manàna famaranan-kevitra mampiseho fisakaizana sy manorina raha toa ka lavina ireo gazety.
◼ Mandraisa fanamarihana an-tsoratra isan-trano ny amin’izay fahalianana sy gazety voapetraka rehetra.
Ireo fahafahana mametraka gazety:
◼ Fanambarana isan-trano
◼ Fanambarana eny amin’ny arabe
◼ Asa isam-pivarotana
◼ Lalana fizarana gazety
◼ Fanambarana amin’ny takariva
◼ Rehefa manao fiverenana mitsidika
◼ Fitsidihana ireo olona nianatra Baiboly taloha
◼ Rehefa manao dia, miantsena
◼ Rehefa miresaka amin’ny havana, ny mpiara-miasa, ny mpifanila trano, ny mpiara-mianatra, ny mpampianatra
◼ Eny amin’ny fitateram-bahoaka, any amin’ny efitrano fiandrasana