Derao i Jehovah Noho ny Famindram-pony
Hahatsiaro ny Nahafatesan’i Kristy Isika ny 24 Martsa
1 Hoy ny mpanao salamo: “Aoka hidera an’i Jehovah ireo noho ny famindrampony sy ny fahagagana ataony amin’ny zanak’olombelona!” (Sal. 107:8) Ny hoe mamindra fo Andriamanitra, dia tsy midika fotsiny hoe tsara fanahy sy mangoraka ny vahoakany izy. Manazava izany ireto teny fiderana nampanoratiny ireto: “Ny famindramponao, Jehovah ô, no nanohana ahy.” (Sal. 94:18) Tena fanehoana famindram-po miavaka tokoa ny nanomezan’i Jehovah antsika ny Zanany lahitokana!—1 Jaona 4:9, 10.
2 Ahoana no anehoantsika fankasitrahana an’ilay ‘Andriamanitra mamindra fo’, amin’izao ankatoky ny Fahatsiarovana ny nahafatesan’i Kristy izao? (Sal. 59:17) Tokony hisaintsaina ireo andro farany niainan’i Jesosy tetỳ an-tany isika tsirairay. (Sal. 143:5) Tsara ny hanaovantsika ilay famakiana Baiboly manokana ao amin’ny Fandinihana ny Soratra Masina Isan’andro—2005. Azontsika atao koa ny manao fikarohana ao amin’ny toko faha-112-116 amin’ny boky Lehilahy Niavaka sy ny boky ara-baiboly hafa. Saintsaino izay vakinao, ary mifantoha tanteraka amin’izany. (1 Tim. 4:15) Tsy hoe mampahery antsika fotsiny ny fianarana ny Tenin’Andriamanitra sy ny vavaka, fa mampiseho koa fa tia an’i Jehovah isika.—Matio 22:37.
3 Ataovy izay hankasitrahan’ny hafa an’Andriamanitra: Tamin’ny taon-dasa, dia 16 760 607 no nanatrika ny Fahatsiarovana naneran-tany. Nanoratra tamin’ny ben’ny tanàna ny rahalahy tao amin’ny tanàna kely iray any Liberia, mba hilazana ny fikasany hankalaza ny Sakafo Harivan’ny Tompo. Nomen’ilay ben’ny tanàna alalana àry izy ireo hampiasa ny kianja filalaovam-baolina. Nampandre sy nanasa ny mponina tao amin’ilay faritra hanatrika azy io koa ilay ben’ny tanàna. Dimy monja no mpitory tao amin’io tanàna kely io, nefa 636 no nanatrika ny Fahatsiarovana!
4 Tiantsika koa ny hanasa olona betsaka araka izay azo atao, hanatrika ny Fahatsiarovana. Nahoana raha atao lisitra ny olona tianao hasaina? Misy fanasana hanatrika azy io ny fonon’ny Mifohaza! 8 Martsa sy Ny Tilikambo Fiambenana 15 Martsa. Azo ampiasaina koa ny taratasy fanasana amin’ny Fahatsiarovana. Soraty mazava tsara ao ambadika, ny ora sy toerana hanaovana ilay fankalazana, ary omeo iray avy ny olona asainao. Tsidiho indray izy ireo rehefa manakaiky ny 24 Martsa, ary hamafiso ny fotoananareo.
5 Ahoana no ampirisihana ny mpianatra Baiboly, izay mbola tsy mivory, mba hanatrika ny Fahatsiarovana ka handray soa avy amin’izy io? Isaky ny mampianatra azy ianao, dia manokàna minitra vitsivitsy hampisehoana aminy fa zava-dehibe io fankalazana io. Misy fanazavana tsara momba izany ao amin’ny Tilikambo Fiambenana 15 Martsa 2004 pejy 3-7, sy ny boky Fanjohian-kevitra pejy 115-119.
6 Raiso tsara ireo vahiny: Raiso tsara sy iresaho ireo vahiny. (Rom. 12:13) Miaraha mipetraka amin’ny olona nasainao, ary omeo Baiboly sy fihirana izy. Tena irintsika horaisina tsara ny rahalahy sy anabavy tsy mitory intsony, nefa niezaka ny ho tonga. Mety hanjary hifanerasera tsy tapaka amin’ny fiangonana indray izy ireo, rehefa anehoantsika fitiavana sy fiahiana. (Lioka 15:3-7) Fankalazana faran’izay masina ny Fahatsiarovana, koa aoka àry isika hanao izay rehetra azo atao mba hanasana ny hafa hidera an’i Jehovah miaraka amintsika, satria “mahagaga ny famindrampony.”—Sal. 31:21.
[Fanontaniana]
1. Ahoana no nanehoan’i Jehovah famindram-po tamintsika?
2. Ahoana no anehoantsika fankasitrahana an’i Jehovah?
3, 4. a) Ahoana no anahafantsika ny toe-tsain’ireo rahalahy tany Liberia? b) Iza avy no kasainao hasaina amin’ny Fahatsiarovana?
5. Ahoana no ampirisihana ny olona ampianarintsika Baiboly mba hanatrika ny Fahatsiarovana?
6. Nahoana no zava-dehibe ny handraisana tsara ireo tonga amin’ny Fahatsiarovana?