“Tiava An’i Jehovah, ry Olony Masina Rehetra”
Hankalazaina ny 4 Aprily ny Nahafatesan’i Jesosy
1 Ny Kominista no nitondra tany Ukraine, taona maro lasa izay. Te hahita ny toeram-pivorian’ny Vavolombelona ireo manam-pahefana, ka narahiny maso tsara izy ireo, indrindra rehefa akaiky ny andro hankalazana ny Sakafo Harivan’ny Tompo. Nanahirana foana izany, satria fantapantatr’izy ireo ny datin’ilay fankalazana. Inona no nataon’ireo rahalahy? Nivory tao anaty lakalin’ny tranon’ny anabavy iray izy ireo. Tsy nisy nanampo hoe hisy hivory tao, satria hatreny an-dohalika ny rano tao. Nanamboatra gorodona avo noho ilay rano anefa ireo rahalahy. Iva be koa ny valindrihana tao, ka voatery nitampify teo ambonin’ilay gorodona ry zareo, nefa tsy nampaninona azy izany satria faly izy ireo nankalaza ny Fahatsiarovana.
2 Tena tapa-kevitra ireo rahalahintsika tany Ukraine ny hankatò ilay didy mba hankalaza ny nahafatesan’i Jesosy. Nampiharihary ny fitiavany an’Andriamanitra izy ireo tamin’izany. (Lioka 22:19; 1 Jaona 5:3) Enga anie isika hanovo hery avy amin’izany, ka ho eo rehefa hankalazaina ny Sakafo Harivan’ny Tompo amin’ny 4 Aprily, na dia miatrika zava-manahirana aza. Hasehontsika fa miombon-kevitra amin’ny mpanao salamo isika, raha izany no ataontsika. Hoy mantsy izy: “Tiava an’i Jehovah, ry olony masina rehetra.”—Sal. 31:23.
3 Ampio ny olona hampitombo ny fitiavany an’Andriamanitra: Ny fitiavana an’Andriamanitra koa dia manosika antsika hanasa olon-kafa hiara-mankalaza amintsika ny Fahatsiarovana. Nampirisika antsika tsirairay ny takelaka fanampiny amin’ny Fanompoantsika Ilay Fanjakana Febroary 2004, mba hanao lisitra ny olona kasaintsika hasaina amin’ny Fahatsiarovana. Miezaka hanasa ny olona tsirairay ao anatin’ilay lisitra ve ianao? Makà fotoana hanazavana aminy ny hevitr’ilay fankalazana. Izao hatao mba hampirisihana azy ireo hanatrika ny Fahatsiarovana: Ampahatsiahivo azy amin-katsaram-panahy ny daty sy ny ora, ary alaivo any an-tranony izy raha ilaina.
4 Manaova ezaka manokana, amin’io fotoana io, mba hiarahabana tonga soa an’ireo nanaiky ilay fanasanao, ary ataovy izay tsy hahasakodiavatra azy ireo. Inona no azonao atao mba hanampiana azy ireny hampitombo ny fitiavany an’i Jehovah? Aoka ianao ho vonona hamaly ny fanontaniany, ary ho mailaka hanasa azy ireny hianatra Baiboly, rehefa mety ny hanaovana izany. Asao izy hanatrika ny fivorian’ny fiangonana. Ny anti-panahy indrindra no tokony hanisy fiheverana an’ireo Kristianina tsy mitory intsony, izay manatrika ilay fankalazana. Tokony hitsidika an’ireny olona ireny izy ireo. Azony atao koa ny mampiasa ireo hevitra novelabelarina nandritra ilay fankalazana mba hampirisihana azy ireo hanohy indray ny fanompoany.—Rom. 5:6-8.
5 Ampitomboy ny fitiavanao an’i Jehovah: Hitombo ny fitiavantsika an’i Jehovah sy ny Zanany, raha saintsainintsika ny momba ilay fanomezana, dia ny vidim-panavotana. (2 Kor. 5:14, 15) Hoy ny anabavy iray mpanatrika Fahatsiarovana efa hatramin’ny ela: “Miandry amim-pifaliana ny Fahatsiarovana isika. Mihamisy heviny kokoa ho antsika izy io isan-taona. Tadidiko aho nijoro tao anatin’ny tranom-paty, 20 taona lasa izay, nijery ny nofo nangatsiakan’i Dada malalako. Nanjary tena nankasitraka ny hasarobidin’ny vidim-panavotana aho tamin’izay. Hevitra natao hianarana fotsiny izy io tamiko, talohan’izay. Haiko tsara daholo ny andinin-teny momba azy io, sy ny fanazavana azy! Rehefa nidonam-pahoriana anefa aho, vao tena nientam-po nieritreritra izay hotanterahina ho antsika amin’ny alalan’io vidim-panavotana io.”—Jaona 5:28, 29.
6 Mihamanatona ny datin’ny Fahatsiarovana ho an’ity taona ity. Makà àry fotoana hanomanana ny fonao ho amin’ilay fankalazana. (2 Tant. 19:3) Saintsaino ilay famakiana Baiboly manokana amin’ny Fahatsiarovana, izay hita ao amin’ny Fandinihana ny Soratra Masina Isan’andro—2004 sy ny Kalandrie 2004. Misy koa mamaky ny toko 112-116 amin’ny boky Lehilahy Niavaka, mandritra ny fianaram-pianakavian’izy ireo. Ny hafa indray manao fikarohana fanampiny, ka mampiasa ireo fitaovana fianarana omena amin’ny alalan’ny mpanompo mahatoky sy malina. (Matio 24:45-47) Afaka manao vavaka amim-pahatsorana mahakasika io fanomezana (vidim-panavotana) io isika rehetra. (Sal. 50:14, 23) Enga anie àry isika hanohy hisaintsaina momba ny fitiavan’i Jehovah antsika, ary hitady fomba hampisehoana ny fitiavantsika azy.—Marka 12:30; 1 Jaona 4:10.