Fampahatsiahivana Momba ny Fahatsiarovana

Hankalazaina ny alakamisy 24 Martsa ny Fahatsiarovana amin’ity taona ity. Tokony hijery akaiky ireto zavatra ireto ny anti-panahy:

◼ Rehefa manapaka ny amin’ny ora hanaovana ilay fankalazana, dia ataovy azo antoka fa tsy hampandalovina ny mofo sy ny divay raha tsy aorian’ny filentehan’ny masoandro.

◼ Tokony hampahafantarina ny rehetra, anisan’izany ny mpandahateny, ny ora sy ny toerana marina hanaovana ilay fankalazana.

◼ Tokony hokarakaraina sy hatao vonona ilay karaza-mofo sy divay ilaina.—Jereo Ny Tilikambo Fiambenana 15 Febroary 2003, pejy 14-15.

◼ Tokony hoentina sy halamina mialoha any amin’ilay toeram-pivoriana, ny vilia sy vera, ary latabatra sy lamban-databatra mety tsara.

◼ Tokony hodiovina tsara mialoha, ny Efitrano Fanjakana na ny toerana hanaovana ilay fivoriana.

◼ Tokony hofantenana sy homena toromarika mialoha momba ny andraikiny sy izay tokony hataony, ireo mpikarakara ny mpanatrika sy mpanolotra ny mofo sy divay. Tokony hampahatsiahivina izy ireo mba hanao fitafiana sy taovolo mendrika.

◼ Tokony hifandamina tsara ireo fiangonana, raha fankalazana mihoatra ny iray no hatao ao amin’ny Efitrano Fanjakana iray. Amin’izay ny olona dia tsy hitangorona ao amin’ny efitrano na eny amin’ny lalantsara sy ny sisin-dalana, na koa eny amin’ny sisin’arabe sy ny parking.